Zinama Tumatumae 1:1-32

¹Hire sari na zinama tumatumae te Solomone sa baṉara pa Izireli, sa tuna koreo Devita,

²pude toka nigo pude dogoro vagia sa ginilagilana lohina d meke lulia sa tinarae pa mua tinoa; pude va bakali sari na zinama gilaedi.

³Pude boka lulia sa tinarae te Tamasa pa hahanana tinoa meke sa kinoa va leana, pude taveti gua sapu toṉoto, ṉoṉo, meke sapu leana la pa tie.

⁴Pude va tumatumae ia sa tie sapu pupuhu, meke ponia ginilagilana na tinumatumae koasa tie vaqura.

⁵Mani va avoso sa tie gilagilana pude mani gilagilana nono latu, meke mani ta turaṉa sa tie tumaena.

⁶Pude boka ta rupaha koa rini sari na zinama tumatumae na vina padapadae, sari zinama tadi na tie gilagilana sapu tome ginuadi.

⁷Sa pinamaṉana e Zihova si na pinodalaena sa tinumatumae hinokara, ba sa tie duduvilina si kilua sa ginilagilana lohina meke sa linulina sa tinarae pa hahanana tinoa.

⁸Tuqu, mu va avosia sa vina tumatumae tanisa tamamu, mu lopu kilu pania gua sapu totozi nigo sa tinamu.

⁹Na havoro si arini pude va sari ia sa batumu, na pakupaku pude va leleana ia sa ruamu.

¹⁰Tuqu, pude toketoke igo ri na tie kaleadi, si koromu va tabei si arini.

¹¹Pana zama si arini, “Mae luli gami; mada tome, mada seke va mate ia si keke tie, mada va mate hoboria keke sapu loke nana ginugua.

¹²Sipu korapa toadi meke leadi, si mada garunu lani pa lovu, mada onolo toa i, guari pu gore la pa popoa tadi tie matedi!

¹³Kote vagi gita soku likakalae arilaedi, meke va siṉi ni tiṉitoṉa hinikodi sari nada vetu.

¹⁴Mae, somana koa gami, mada variva hia ni sari tinago kote hikoi gita!”

¹⁵Tuqu, mu lopu ene luli sari tie arini; lopu neti nia nenemu koari na dia siraṉa.

¹⁶Ura sari nenedia si bebeno la pa sinea; hiva tuturei variva mate.

¹⁷Namu loke laena pude vekoa sa sipata sipu korapa doṉo toto atu dia mo sari na kurukuru tapuru!

¹⁸Sari tie arini si tome sipata meke ta saputu ni teledia; vekoi rini pude va mate pule ni.

¹⁹Gua asa sa vina betodi ri na tie hikohiko; sa dia tinavete sea si hoke hiko pani sari dia tinoa.

²⁰Sa ginilagilana lohina si titioko ululae koari na sisiraṉa; korapa kukili vura pa vasina varivarigarana meke pa maketi,

²¹koa rini pa siraṉa nomana si velavela vala beto sa, meke pa sasada nuquru pa vasileana si zama si asa:

²²“Gamu pu pupuhu, vea seunae gua si hiva koa pupuhu si gamu? Vea seunae gua si kote koa va sisire nia gamu sa ginilagilana? Gamu na tie duviduvili, vegua ke kana ia gamu sa tinumatumae?

²³Be va avosi gamu sari qua ginegese atu, si kote tozi va bakala ia rau sa buloqu koa gamu, meke vata gilana ni gamu sari qua binalabala.

²⁴Ba sipu etulau gamu totoso titioko si rau, meke loke tie si va avoso totoso sipusipu gamu rau,

²⁵sipu kilui gamu sari qua vinari tokae pa binalabala, meke lopu va tabei sari qua ginegese atu,

²⁶si kote hobequ meke hegere totoso kamo gamu tinasuna, kote va sisire si rau totoso holoqoru si gamu,

²⁷totoso tarazuzu sa popoa guana totoso raneboṉi, totoso raza sa kinolura guana vivirua, totoso opoadumu gamu na tinasigiti na sinoliṉi.

²⁸Totoso asa si tiqe kote tioko mae au gamu ba kote koroqu olaṉa; kote hata sisigiti au gamu, ba lopu kaqu dogoro au gamu.

²⁹Sipu kana ia gamu sa ginilagilana, meke lopu vizatia gamu pude pamaṉa nia se Zihova,

³⁰sipu lopu hiva va tabei gamu sari qua vinari tokae pa binalabala, lopu liṉana la i gamu sari qua ginegese,

³¹si kaqu henai gamu sari na vuadi rina mia tinavete; sari vuadi sari mia sinekesekei si kaqu deṉani gamu.

³²Sa hinakohako tadi pu lopu goto si kote mate nia rini, meke pana lopu galagala ri na tie duviduvili si kote ta gore nia rini.