Proveps-Knare Nomaniza 1:1-32

¹Ama avontafera knare nomanizamofo ke Israeli vahe'mokizmi kini ne' Solomoni, Deviti nemofo krente'ne.

²Ama knare nomanizamofo ke'mo'a, knare antahi'za neramino, tavumro ante ke nerasmino, taza hinketa oku'ama me'nea kea keta antahita hugahune.

³Knare antahintahi neramino, tazeri fatgo nehanigeta, fatgo avu'ava nehuta, fatgo huta refko nehuta, maka vahe'mofona mago avamente knare avu'avara huzmantegahune.

⁴Hagi ama ana nanekemo'a, antahi'zama'a omane'nesia vahera knare antahintahi nezaminkeno, ne'mofara antahiza nezaminke'za knare hu'za maka zana refko hugahaze.

⁵Knare antahintahima eri'nesimo'a, ama nanekea nentahinkeno rempi hunemina, mago'ane ama' antahizana e'nerinkeno, antahi amama hania ne'mo'a, avumro kea erigahie.

⁶Ama nanekemo'a zamaza hina, knare antahintahi eri kene, avame kea antahi ama nehuta, antahi'zane vahe'mo'zama hu'naza kene, ruzahu ruzahu fraki kea erigahaze.

⁷Anumzamofonku kore hunteno agorga'a manizana, antahizama erizamofo agafa'a me'ne. Hu'neanagi neginagi vahe'mo'za knare antahi'zane avumro kegura amagena humigahie.

⁸Mofavre'nimoke, negfama kavumro kema hania kea amage nentenka, negrerama rempima hugamisia kea ha'ontagio.

⁹Ana kavumro kemo'a, avasase zanu anunte fetori anteankna nehuno, anankempi pasesu nofi anteankna hugantegahie.

¹⁰Mofavre'nimoke, kumi vahe'mo'za kefoza huogu kavazuma hanazana, ana kefozana osutfa huo.

¹¹Tagrane egeta frakineta hazenkezmi omne vaheku ome zmahamneno hnagenka, ovutfa huo.

¹²Fri vahe kumamo'ma vahe'ma zamasgahu nevaziankna huta, zamasimuma eri'za mani'naza vahera zmahe frisune.

¹³Mika zgo'amo mareri zantamima zmaheta hnaresuna zantamina refko huta nontifi eri antevi'neteta,

¹⁴musufama erisuna zgoa refko hugamigahunanki, tagrane enoma hanagenka,

¹⁵mofavre'nimoke, zamagranena ovutfa huo, zamagrama vanarega ovuo.

¹⁶Na'ankure ame hu'za kumira nehu'za, vahera zmahe'za korana eri neragize.

¹⁷Nmamo negesigenka krifu anaginte'sanana, ana namamo'a krifufina ohenigeno, krifumo'a amnezankna hugahie.

¹⁸Anahu kna hu'za, vahe'mo'za ruvahe zmahe'naku hazanagi, zamagra'a zamahe nefrize.

¹⁹E'inahu kanteti'ma musufama fenoma erizamo'a, kahe frigahie.

²⁰Knare antahintahizamo'a mago a'kna hu'neakino, kama vu'za e'za nehazafi oti'neno kezanetino, vahe atru hu'za nemanizafi ranke huno kezatino ke nehie.

²¹Ana a'mo'a tusi kereso nehaza kamofo atuparegati kezatino, rankumapi ufre kafante mni'neno kea nehie.

²²Antahiza omane vahe'motma nama'a zupa musena hutma antahizantmi omane vahera manigahaze? Kiza zokago kema knare antahizanku'ma nehzazana, taganetma omanigahafi?

²³Nagrama i'oma hugantoa kema amage'ma antesanke'na, nagu'a neramina, knare antahi'zani'a rempi huramigahue.

²⁴Hianagi kema nehugenka antahi nonaminka, kagrite etragote'za nehugenka antahi nonamine.

²⁵Kavumro'ma negantogenka, keni'a nontahinka, osuo huazama nehanku,

²⁶ana nona'a kagrite'ma esia hazenkegura, kagiza regahue. Tusi'a hazenke zamo kazeri kagateresige'na, Nagra kagiza regahue.

²⁷Zahoko'mo hiaza huno hazenke zamo'ma tmazeri agaterenkeno, hankro zaho'mo hiaza huno tinko'mo refitege, hazenke'zamo ene kore'zamo tmagritera egahie.

²⁸Ana hanige'za zamagra zmazama hanugura kezatigahazanagi, nagra kenona huozamigahue. Zamagra nagrikura hakre snazanagi, onagegahaze.

²⁹Na'ankure zamagra, antahi'zama erizankura zamesra hunente'za, Ra Anumzamofona kore hunte zamagesa ontahi'naze.

³⁰Nagrama zamavumro antoankea erinetre'za, zmazeri fatgo huankea amage onte'naze.

³¹E'ina hu'negu zamagrama hu'nesaza zamuzmamofona rga'a nesageno, oku'ma hu'naku retroma hu'nesaza zamavu'zmavamofo nona'a havi miza erigahaze.

³²Antahintahizmi omane vahe'mokizmia, neginagi zmavu'zmavamo zamahe nefrinkeno, knare hu'none hu'zama hanaza zamo, zamahe frigahie.