Tɛnɛ Faalaaliiti 1:1-32

¹Salɔmɔn é ɠɛni ga Davide ná-doun zunui, ta Izelayɛle masagi, naa ná-tɛnɛ faalaaliiti:

²Ti ɠɛ ungi ɠa ga ti nu ɠala ga ɠimalai, ti nu ɠɛʋele ɓɛtɛ, é kpɔɛiti gaaɠa, niiti ti woni ga keleɠelegi.

³Ti nui ɠala ga siɛ ʋelei ná-eteai zu, keleɠelegi ʋɔ, é lelebo, é zɔle, é zoloo su.

⁴Ti ɠi pagɔi ve naati zea, niiti ti la dɛ faa mɔinmɔin kwɛɛni, ti faaɠwɛgi ta kidafaawui ve zunu loungoiti zea.

⁵Ɠima nui woilo, toɠa ta ɓɔ ná-soofaalai ʋa, zɔi keleɠelegai, naa ɠa ziɛ ʋele ʋagɔi zɔlɔɔ.

⁶Ta zoo ti tɛnɛ faalaalii ma lɔɔɠuzu vai tanigaani kwɛɛ, ta ɠima nuiti daawooiti ma lɔɔɠuzu vaiti poluʋɛti.

⁷Ɠɔoɠɔ GALAGI ɠaazuluabai ɠa é ga faaɠwɛgi lɔɔzeizuʋɛ, faaɠaaɠaalala nui ɠa ɗa ɠimalai ʋɛlɛʋɛlɛ ta kalagi.

⁸Dòun zunu, woilo, è dama ga faaɠwɛgi, è sɔlɔɔsu è-ɠɛɛ ya, mina è-lee ná-tɛnɛ gooiti da ɠoba.

⁹Mazɔlɔɔ ta ɠɛ ga masa bɔɔlɔ pagɔi è unba, ta ɠɛ ga kɔbu ani ʋagɔi è ɠɔbu.

¹⁰Dòun zunu, ni faa ɲɔu ɠɛ nuiti ta pɔ, ti è ɠaazulɛ, mina yeezei bu.

¹¹Ta ɠɛna ma: «Ʋilɛ gi ʋolu! Ade li de nuiti teʋesuʋɛ maaɓɔun, de ta ʋaa, de laalɛ nui ta wu lein nɔ, anɛɛ ni é la faa ɠaazani.

¹²De ti-ma vului ɓɔle, eɠɛʋelei gɔvɛalaazu a ɗa kɛ la, ti ɲɛɛlɛ ɲɛgɛlɛin ga naati kɛʋele, niiti ti yeizu kabai zu.

¹³Ade ti-ɠɔli pagɔiti seɠe, de da-ʋɛlɛiti buulaave da.

¹⁴Ɗa ɗɔnɔ zɔlɔɔsu gi ʋɔ, ada ɓɔsu wali ɓɔlɔ ɠilagi ma ade pɛ!»

¹⁵Dòun zunu, mina ʋilɛ ti ʋolu, è ʋa ziɛ ga ta-ʋelei, maaɠooza ta-ʋelei ʋa.

¹⁶Mazɔlɔɔ ti-ɠɔɠɔiti suvilɛʋɛ faa ɲɔu ɠɛɛ vai zu, ti zuvilɛʋɛ ɲamai ʋuu zu.

¹⁷Mazɔlɔɔ toɠa ga fuun faa, wɔnii ɗa tumɔi ɠa, é ɗa zei tuɠɔ.

¹⁸Kɛlɛ tiya ɓɔɠɔi ɠa ti yaavai zeizu ɓɔɠɔ luɠɔ, tiya ɓɔɠɔi ti-yɛnvui ɠa ti balii laazu tuɠɔ.

¹⁹Zekana naati gaaɓelazuʋɛ la, niiti ti ta-ɓɛtɛi wosu ga kakama vaiti su, tɔnɔ ɲɔi ɠa ɗa sɔlɔɔ nui undaaʋili.

²⁰Ɠimalai ɠa kpeei loozu taazuʋɛ peleiti su, toɠa wooɠulazu maaɓɔ bosuʋɛti.

²¹É toligi wo maaɓɔ bosuʋɛ, é ná-keela wooi wo taa loaʋɛ, é ɠɛ:

²²«Ɠimalala nuiti, wa ɠimalala vaiti nɛɛzu ʋɛ, eyɛsu yeelɛ? Ɲɛɛɠulasu nuiti, wo-yiimai ɠa ɠɛɛzu ga ɲɛɛɠulasui, eyɛsu yeelɛ? Faaɠaaɠaalala nuiti, wa yɛsu faaɠwɛgi wɔinzeɠezu, eyɛsu yeelɛ?

²³À woilo nà-tɛnɛ gooiti ma! Wɛlɛ nà nà-keleɠelegi ve wo ya, nà dàawooiti dɛɛ ga woye.

²⁴Tɔɔzei gè wo lolini, wo ɠɛlɛ, tɔɔzei gè yeeleteni, nu nɔpɛ ge la ma wɛlɛ woni,

²⁵wo nà-tɛnɛ gooiti kpein pilini ya, wo la vaani nà-zelilomaiti bu,

²⁶naa ɠa é ba, nà ɓalaagi, nà wo ɲɛɛ, siɛgi zu maanɔɠɔi ʋaazu wo ʋɔ, nà ɲɛɛɠula wo zu, siɛgi zu kidaaʋiligi zeelizu la wo ma,

²⁷siɛgi zu kidaaʋiligi ʋaazu la wo ʋɔ, eɠɛ fiilɛ wolai, siɛgi zu maanɔɠɔi zeelizu la wo ma, eɠɛ tɔngɔlɔ fiilɛi, siɛgi zu koozuʋiligi ta kidaaʋiligi ʋaazu la wo ʋɔ.

²⁸Naazu, ta wooɠula mà, gè la ti wooɠaaʋotega, ta gàiziɛ, ti la kàa.

²⁹Toɠa ɠɛ ɠana, tɔɔzei ti faaɠwɛgi wɔinzeɠeʋɛ, ti la yiimazeɠeni ga Ɠɔoɠɔ GALAGI ɠaazuluabai,

³⁰tɔɔzei ti la vaani nà-tɛnɛ gooiti bu, ti laaɓɛɛluni ga nà-zelilomaiti,

³¹ti ziɛ ʋelei ma lɔnɔgi ɠa a ɠɛ ga ti-ɠɔnɔgi, ti ɓɔɠɔ lɛnɛ gooiti ta ɠɛ ga ti-laamianigi, eyɛsu mɔtai yɛ.

³²Mazɔlɔɔ ɠimalala nui ná-kakagi ɠa ɗa paa, faaɠaaɠaalala nui ná-ziizoolɛlalai ga ɓɔɠɔ, naa ɠa a ɗa too ya.