Zinama Tumatumae 10:4-30

⁴Na lima hakohakona si va kamo minalaṉa, ba sa lima sapu ṉaliṉali pa tinavete si va tagotago tie.

⁵Asa pu vagi ginani pa inuma pa totoso komiha si na koreo gilaena, ba asa pu puta pa totoso pakepakete si na koreo variva kurekurena.

⁶Na minana si toropae nia sa tie toṉoto, ba sari tie kaleadi si na ṉoṉovala mo si zama ni rini.

⁷Pude balabala pule la i sari tie toṉoto si na minana, ba sari pozadi ari tie kaleadi si kote popozu taloa.

⁸Sa tie sapu gilae pa bulona si va tabei sari na tinarae, ba sa tie memeakala si pekipeki meke kote kamoa tinasuna.

⁹Sa tie ṉoṉona si kote ene vata bulei si asa, ba asa pu lulia sa siraṉa koqina si kote ta poho vura.

¹⁰Asa pu putaputa kale mata si va gavoro tinalotaṉa, ba asa pu tozia sa hinokara si okoro nia sa binule.

¹¹Sari na zinama tanisa tie toṉoto si na bukaha tanisa tinoa, ba sari tie kaleadi si na ṉoṉovala mo si zama ni rini.

¹²Na vinari kanai si va gevuru vinaripera, ba sa tataru si taleoso ni sari doduru sinea.

¹³Sa ginilagilana lohina si ta dogoro koa ri na zinama tadi pu bakaladi, ba sa kolu si pude sekea mudina sa tie sapu lopu gilae.

¹⁴Sari tie gilagilana si hata ia sa tinumatumae, ba sari na zinama tanisa tie duvili si hata tinasuna.

¹⁵Na tinago si na ṉiha na varane pa totoso tinasuna tadi na tie tagotago, ba na hinabahuala si ṉovaladi sari tie malaṉa.

¹⁶Sa tinabara tadi tie toṉoto si na tinoa, ba sa hinia tadi tie kaleadi si na vina kilasa.

¹⁷Asa pu va taliṉa la ia sa tinarae si dogoria sa siraṉa la pa tinoa, ba arini pu lopu hiva tava toṉoto si turaṉa va sea tie.

¹⁸Asa pu tomea sa kinukiti si na tie kokoha, meke asa pu zama va kaleana ia si keke tie si na tie duvili.

¹⁹Pana soku sari zinama, si kamo mo sa kinaleana, ba gilae sa tie pu kopu nia sa meana.

²⁰Sa meana sa tie toṉoto si guana siliva viana, ba sa bulona sa tie kaleana si loke laena.

²¹Sa beruna sa tie toṉoto si na minana koari soku tie, ba sa tie duvili si loke nana binalabala leadi.

²²Sa minana te Zihova si va tagotago tie, meke lopu va somana nia tinasuna Sa.

²³Na tie duvili mo si qetu ni sari na tinavete kaleadi, ba sa tie sapu gilae si qetu nia sa ginilagilana lohina.

²⁴Sapu matagutu nia sa tie kaleana si kote raza nana mo koasa; ba sapu okoro nia sa tie toṉoto si kote ta poni nia sa.

²⁵Totoso hola taloa sa raneboṉi, si taloa tugo sari tie kaleadi, ba sari pu toṉoto dia si turu va nabu ninae rane.

²⁶Sa tie hakohakona koa rini pu garunia, si guana sile pa livo meke tuṉaha pa mata tie.

²⁷Sa pinamaṉana e Zihova si va gele tinoa, ba sari na tie kaleadi si tuturei mate.

²⁸Sa tie toṉoto si koa qetuqetu nana sina ronua sa sapu kote evaṉa, ba sa inokoro tadi na tie kaleadi si lopu kaqu tava gorevura.

²⁹Koa bule sari na tie toṉoto pa siraṉa te Zihova, ba sa siraṉa asa si na tinasuna koari na tie kaleadi.

³⁰Sari tie toṉoto si lopu kaqu ta rabutu palae, ba sari tie kaleadi si lopu kaqu koa hola koasa popoa.