Olcueih 10:4-30

⁴Palyal kut loh a saii tah vawtthoek tih, kut aka haam tah boei.

⁵Khohal ah aka yoep capa long tah a cangbam tih, cangah vaengah aka ip capa loh yah a bai.

⁶Aka dueng kah a lu dongah yoethennah om dae, halang kah a ka long tah kuthlahnah khaw a phah.

⁷Aka dueng poekkoepnah tah yoethennah la om dae, halang tah a ming pawn ni.

⁸Lungbuei aka cueih loh olpaek te a doe tih, aka ang tah a hmui a lai a caehdoelh pah.

⁹Thincaknah neh aka pongpa tah ngaikhuek la cet dae, a longpuei aka kawn sak khaw amah ming uh bitni.

¹⁰Mik neh aka mikhip loh nganboh a paek tih, aka ang tah a hmui a lai a caehdoelh pah.

¹¹Aka dueng kah a ka tah hingnah thunsih la om tih, halang kah a ka loh kuthlahnah te a uep.

¹²Hmuhuetnah loh tingtoehnah a haeng. Tedae lungnah long tah dumlai boeih a dah,

¹³Hmuilai dongah aka yakming loh cueihnah a dang tih, lungbuei aka talh kah a nam ham rhuiboeng om.

¹⁴Aka cueih rhoek loh mingnah a khoem uh tih aka ang kah a ka tah a porhaknah yoei.

¹⁵Khorha khuikah, hlanglen kah a boei a rhaeng tah amah kah a sarhi la om tih, a khodaeng te tattloel rhoek kah porhaknah la om.

¹⁶Aka dueng kah thaphu tah hingnah la om tih halang kah cangah tah tholhnah la poeh.

¹⁷Thuituennah aka ngaithuen tah hingnah caehlong la pawk tih toelthamnah aka hnawt tah kho a hmang.

¹⁸Hmuhuetnah aka phah kah a hmuilai khaw a honghi la om tih, theetnah aka haeh khaw ang.

¹⁹Olka a yet vaengah dumlai khaw a mueh moenih, tedae a hmuilai aka tuem ni lungming la a om.

²⁰Aka dueng kah ol tah cak a coelh bangla om tih halang kah a lungbuei tah tih vilvel mai ni.

²¹Aka dueng kah hmuilai loh muep a kok tih aka ang tah a lungbuei a talh dongah duek.

²²BOEIPA kah yoethennah tah boei tih, te te patangnah a koei thil moenih.

²³Aka ang ham tah nueihbu te khonuen rhamtat la a saii dae, cueihnah long tah hlang taengah lungcuei la om.

²⁴Halang kah rhihnahkoi tah amah taengla a pawk pah tih aka dueng kah a ngaihlihnah khaw a doo pah ni.

²⁵Cangpalam loh a paan vaengah halang tah pai thai pawt vetih aka dueng kah khoengim tah kumhal ah pai ni.

²⁶Kolhnaw tah a tueih rhoek hamla a no dongah a thuui bangla, a mik dongah hmaikhu bangla a om pah.

²⁷BOEIPA hinyahnah loh khohnin a thap tih halang kah a kum tah a rhaem pah.

²⁸Aka dueng rhoek kah ngaiuepnah tah kohoenah la om tih halang rhoek kah ngaiuepnah tah paltham.

²⁹BOEIPA kah longpuei he thincaknah ham tah lunghim la om tih boethae aka saii ham porhaknah la om.

³⁰Aka dueng tah kumhal duela tuen pawt dae halang rhoek tah diklai ah khosa mahpawh.