Tɛnɛ Faalaaliiti 10:4-30

⁴Zɔi é la yeeʋɛa faa ʋa, naa ɠa ɗa ɠɛ ga bala nu, kɛlɛ zeemaleʋebogi ɠa ɗa nu ɓɛtɛ.

⁵Nii é ani ɠaalɛɛzu ba, foɠo undaaɠulazuʋɛ, naa ɠa ga doun zunui, nii keleɠelegai, kɛlɛ zɔi é ɲiizu molo leʋe ziɛgi zu, doun zunui ɠa ga naa, nii ɓaa ɠa ɠula ma.

⁶Tuyaiti ta ʋuuni telebo nui unmaʋɛ, kɛlɛ nu ɲɔi laawooiti ta ɗa tooma vai maalɔɔɠu.

⁷Telebo nui ná-kizɛsui ɠa ɗa ɠɛ ga tuyai taɠiligaani bɛ, kɛlɛ zeemai ɠa ɗa wo nu ɲɔiti daaseigi ma.

⁸Zɔi ɠigi ma ziimaʋɛ, naa ɠa ɗa deveiti so, kɛlɛ nui é kpɔɛzuɠula ɲakaiti bosu, naa ɠa ɗa ɓɔɠɔ loo ya.

⁹Zɔi é ziɛzu sɔledai zu, naa ɠa ziɛzu ziilɛigi zu, kɛlɛ zɔi é ziɛzu ga pele zuzeigiti, naa ʋolu ɠa ɠula.

¹⁰Nii é gaamai lɔɔɠuzu bɔɔlaiti ba, naa ɠa ti ɓɔlɔzu, kɛlɛ zɔi é zelii losu ti ma gaamai zu, naa ɠa ʋaazu ga ziilɛigi.

¹¹Telebo nui laawooiti ta ga zɛnvu ɗɛungi, kɛlɛ nu ɲɔi laawooiti ta ɗa tooma vai maalɔɔɠu.

¹²Wɔinzeɠemai ɠa ɗa sakpegi ɠaazo, kɛlɛ nɛɛbɛi ɠa ɗa faaɠaazagi pɛ suvaayɛ.

¹³Keleɠele nui laawooi ɠa ɗa ɠɛ ga ɠima ɓɔɛi, kɛlɛ faaɠaaɠaalala nui ʋoluʋɛ nɔnɔi ɠa ga kpakɔi.

¹⁴Ɠima nuiti ta ɗa faaɠwɛgi ɠaalɛ ba, kɛlɛ siɛgi zu faaɠaaɠaalala nui ɓɔɛzu la, maanɔɠɔi maa la mɔ ɠoozani ba.

¹⁵Kpɛtɛ nui yeaɠɔligi ɠa bɛ ga taa wolai siɠigi ma, kɛlɛ bala nui ná-maawɔin ɠa ɗa koloɠolo.

¹⁶Telebo nui ná-tɔnɔgi ɠa ɗa lo tuɠɔ, é zɛnvui wo, kɛlɛ nu ɲɔi zɔlɔɔgi ɠa ɗa ɠɛ ga faa ɲɔu ɠɛ anii.

¹⁷Zɔi é woilosu tɛnɛ gooi ma, naa zɛnvu ʋelei zeɠea, kɛlɛ zɔi é ɠɛlɛzu zelilomai ʋa, naa ɓɔɠɔ loa ya.

¹⁸Wooveledai ɠana, ɗa wɔinzeɠemai lɔɔɠuna, zɔi é leʋesu ga tɔɠɔ ɠoloɠologi ɠɛa, naa ɠa ga ɠimalala nui.

¹⁹Zɔi é kpɔɛi zuɠulazu gola, é la ɓega tɔ koloɠologi ɠɛɛzu, kɛlɛ zɔi a laaʋɛ zo, naa ɠa ga zunui, nii ɠi pagɔi ma.

²⁰Telebo nui laawooiti ta ga walii ɲadegai, kɛlɛ tosu la faa ɲɔu ɠɛ nuiti ta-ɠisiɛi ʋa.

²¹Telebo nui laawooiti ta ɗa ɓɔ nuɓusɛ mɔinmɔin ba, kɛlɛ ɠimalala nuiti ta ɗa za, tɔɔzei ti ʋalagɛ faaɠaaɠai ma.

²²Ɠɔoɠɔ GALAGI laa luyai ɠa a ɗa kulagaanɛɛzui ve, é la koozuʋili faa nɔpɛ pilɛga polu.

²³Faa ɲɔi ɠɛɛ vai ɠa ga ɠaɠo faa ɠimalala nui ya, eɠɛʋelei ɠimalai ɠɛɛ vai la ga ɠaɠo faa ɠima nui ya.

²⁴Nii nu ɲɔi luazu ba, naa ɠa a ɗa sɔlɔɔ, kɛlɛ nii telebo nuiti ta wɔin ɠɛ, naa ɠa ɗa ve ti ya.

²⁵Siɛgi zu tɔngɔlɔ fiilɛi leʋesu da, nu ɲɔi ɠa ɗa ɲɛɛlɛ! Kɛlɛ telebo nui ɠa loni ani ma, nii é ná eyɛsu ɠɔ.

²⁶Eɠɛʋelei ani ɓodai a ɗa kɛ la ga nu ɲiigai, duului ɓalaa ga ʋuuna nu ɠaazuʋɛ a ɗa kɛ la, zekana ɲaka nui la, naati bɛ niiti ti teʋesu.

²⁷Ɠɔoɠɔ GALAGI ɠaazuluabai ɠa ɗa nui ná-eteai zuɠooza, kɛlɛ faa ɲɔu ɠɛ nui ná-konagiti su ɠa ɗa ɓuɠa.

²⁸Telebo nui ná-maaɓɔungi ʋolu ɠa ɠɛ ga koozunɛɛi, kɛlɛ faa ɲɔu ɠɛ nuiti ta-ɠitogi ɠa ɠoloɠolo.

²⁹Ɠɔoɠɔ GALAGI ná-pelei ɠa ga siɠigi wooɠɛɠila nuiti maaɠoolii zu, kɛlɛ toɠa ga naati koloɠolo saɓu, niiti ti faa ɲɔi ɠɛɛzu.

³⁰Telebo nui la ɲiikpiga eyɛsu pɛ, kɛlɛ faa ɲɔu ɠɛ nuiti ti la yɛga zooi zu.