ZABURA 89:15-33

¹⁵Arubarikadenↄmɛ gbɛ̃ kũ ò ayuwiikɛmmanↄ ũ, kũ òdigↄ̃ táa o gupura kũ à kú n kurunyĩ, Dikiri.

¹⁶Òdigↄ̃ pↄnna kɛ kũ n tↄ́o gↄrↄ sĩnda pínki, òdi ĩa dã kũ n manakɛo.

¹⁷Zaakũ ń gakuri kũ ń gbãnaomɛ n ũ, n zɛna kũoo dì ó sɛ́ lei.

¹⁸Ó kína bi Dikiri pↄ́mɛ, ó sɛ̃gbako pì bi Isarailanↄ Luda pↄ́mɛ.

¹⁹N yã ò n yãmarinↄnɛ yã wɛ́gupu'enaa gũn n pì: Ma kpányĩ kɛ̀ gↄ̃saanɛ, ma kɛfɛnna sɛ̀ musu a gbɛ̃nↄ tɛ́.

²⁰Ma a zↄ̀bleri Dauda lè, ma a nísi kùa ma a dìtɛ.

²¹Manigↄ̃ a kũna ma ↄĩ, ma gã̀sã gbãna nigↄ̃ kú kãao.

²²Ibɛrɛ ke ni fↄ̃ à táfe síaro, gbɛ̃ vãni ke ni le à gbãna mↄnɛro.

²³Mani a wɛtɛrinↄ mì dɛ a arɛ, mani a zãngurinↄ nɛ.

²⁴Mani gbɛ̃kɛ kɛnɛ kũ náanio, oni a sɛ́ lei kũ ma tↄ́o.

²⁵Mani ísira nanɛ a ↄĩ, anigↄ̃ iko vĩ swanↄa.

²⁶Ani ma sísi à pi, má de a De ũ kũ a Ludao, a gbɛ̀si ũ kũ a surabariio.

²⁷Mani a kɛ ma daudu ũ, anigↄ̃ de andunia kínanↄ mìde ũ.

²⁸Manigↄ̃ gbɛ̃kɛ vĩ kãao gↄrↄ sĩnda pínki, ma bàka kũ à kú kãao gborona vĩro.

²⁹Mani tó a buri gↄ̃ kí ble gↄrↄ sĩnda pínki, a kpata nigↄ̃ kun lákũ ludambɛ dìgↄ̃ kun nà.

³⁰Tó a burinↄ pã kpà ma dokai, akũsↄ̃ odi tɛ́ ma yãditɛnanↄiro,

³¹tó ò bò ma yã kpɛ, akũsↄ̃ ò ma yãdannɛnanↄ kũnaro,

³²mani gò tↄ̃ḿma ń taarinↄ yãi, mani ń kɛ búgubugu ń vãnikɛnaa musu.

³³Ama gbɛ̃kɛ kũ má vĩ kãao ni lákaro, mani fↄ̃ mà náanisariyã kɛro.