ZABURA 73:13-28

¹³Ase ma nɛ̀sɛ pura pãn yá? Ma a ↄ bↄ̀tɛ taarin swáswa pãmɛ yá?

¹⁴Ndìgↄ̃ ma gbɛ̃ gↄrↄ sĩnda pínki, ndìgↄ̃ ma sã gágamɛnɛ lákũ gu dìgↄ̃ dↄ nà.

¹⁵Tó ma zɛ kũ yã dí taka onaao, abirekũ nigↄ̃ de bona n gbɛ̃nↄ kpɛ yã ũmɛ.

¹⁶Kũ ma laasunn lɛ̀ yã pìia de mà dↄ̃, à kɛ̀mɛnɛ zĩ'ũ.

¹⁷Sé kũ ma gɛ̃ Luda kúkia, gbasa ma wɛ́ kɛ̃̀ lákũ oni láka nà.

¹⁸N ń dá guzãrɛ kpa yãpura, ndì ↄ sↄ̃ńyĩ ò lɛ́tɛ ò kakatɛ.

¹⁹Òdi gↄ̃ kakatɛna pↄ́ ũ kãnto, vĩnapↄnↄ dì ń le ò láka.

²⁰Lákũ nana dì gɛ̃tɛ kũ ĩao nà tó gbɛ̃ vù, tó n futɛ Dikiri, ǹ tó ò gɛ̃tɛ lɛ.

²¹Kũ ma nɛ̀sɛɛ yàka, akũsↄ̃ ma pↄ sira kũ̀,

²²ma kɛ yↄ̃nkↄ, má yãke dↄ̃ro, ma gↄ̃nnɛ lán nↄ̀bↄsɛ̃ntɛ bà.

²³Bee kũ abireo madìgↄ̃ kú kũnwo, ń ma kũna ma ↄplaa.

²⁴Ndì domɛnɛ arɛ kũ n lɛ́dammao, ĩni láka ǹ ma sí n gakuri gũn.

²⁵Dín ma wɛ́ dↄi musu n baasii? N baasiro pↄ́ke ni tɛni ma dɛ andunia gũnlo.

²⁶Bee tó ma mɛ̀ kũ ma swɛ̃̀ɛo tɛn láka, Ludamɛ ma swɛ̃̀ gbãnaleki ũ, àkũmɛ ma baka ũ gↄrↄ sĩnda pínki.

²⁷Gbɛ̃ kũ ò kɛ̃̀mmanↄ ni láka, ĩni gbɛ̃ kũ ò bò n kpɛnↄ kakatɛ.

²⁸Luda, ma nanyĩna mɛ́ à kɛ̀mɛnɛ nna, Dikiri Luda, ma n kɛ ma utɛki ũ, mani n yãkɛnanↄ babańnɛ.