ZABURA 72:4-19

⁴Kína ni tó yã bo kũ talakanↄ nna, ani takaside nɛ́nↄ sura ba, ani gbãnamↄnnɛrinↄ dúgu zↄ̃.

⁵Anigↄ̃ kun lákũ ifãntɛ̃ dìgↄ̃ kun nà, lán mↄvura dìgↄ̃ kun nà wɛ̃̀ kũ wɛ̃̀ɛo.

⁶Anigↄ̃ de lán kabura legũ bà, lán mↄtↄ kũ àdi pisi zĩtɛaa bà.

⁷Gbɛ̃ mananↄ ni ↄ tá a gↄrↄa, nnamana nigↄ̃ zↄ̃kↄ̃ ari mↄ súngↄ̃ kun doro.

⁸Ani kí ble zaa ísira bara la kũ bara direo, sɛna zaa Yuflati ari gɛna andunia lɛ́a.

⁹Buri kũ ò kú gbáranna gũnnↄ ni su ò kútɛnɛ, a ibɛrɛnↄ ni wútɛ kũ kùaao a arɛ.

¹⁰Tasisi kína kũ ísira bara kínanↄ ni táfe bonɛ, Seba kũ Sɛba kínanↄ ni su ò gba danɛ.

¹¹Kínanↄ ni su ò kútɛ a arɛ ń pínki, buri sĩnda pínki ni donyĩ.

¹²Zaakũ ani wɛ̃ndade kũ ń wiki dↄnↄ bomɛ, ani takaside kũ ò kpanyĩri vĩronↄ sura ba.

¹³Ani gbãnasaridenↄ wɛ̃nda gwa, ani takasidenↄ bo ga lɛ́i.

¹⁴Ani ń bo gbãnamↄnnɛrinↄ kũ gbɛ̃ pãsĩnↄ ↄĩ, zaakũ à ye ń arukↄtɛnaairo.

¹⁵Luda kína dↄ̃ kũ aafiaao! Ògↄ̃ a gba Seba bùsu wuraa, ògↄ̃ wɛ́ kɛnɛ Ludaa lakanaa sari, ògↄ̃ sa mana onɛ gↄrↄ sĩnda pínki.

¹⁶Ǹ tó burapↄnↄ kɛ a bùsun manamana, a lánↄ gↄ̃ da sĩ̀sĩnↄ musu síi, ò nɛ́ i ò pia lán Lɛbana lákpɛ bà, ò gbã lán kàsapli bà sɛ̃̀ntɛ.

¹⁷Ǹ tó a tↄ́ gↄ̃ kun gↄrↄ sĩnda pínki lán ifãntɛ̃ bà, buri sĩnda pínki ni arubarika le a gãi, oni a tↄ́ nna sí.

¹⁸Arubarikaden Dikiri Luda, Isarailanↄ Luda! Àkũ mɛ́ àdi yãbonsarɛnↄ kɛ ado.

¹⁹Ògↄ̃ a tↄ́ gakuride bo gↄrↄ sĩnda pínki! À tó a gakuri da anduniala pínki! Aami! Aami!