ZABURA 68:2-13

²Lákũ túsukpɛ dì gɛ̃tɛ kũ ĩao nà, ǹ tó ò gɛ̃tɛ lɛ. Lákũ zↄ́saa dì yↄ́ tɛ́ sarɛ nà, yãvãnikɛrinↄ ni kakatɛ Luda arɛ lɛ.

³Gbɛ̃ mananↄ sↄ̃ ò pↄnna kɛ, ò yáa dↄ Luda arɛ, ò vĩvĩ kũ pↄnna zↄ̃kↄ̃ↄo.

⁴À lɛ̀ sí Ludanɛ à lɛ́ maa, à di ludambɛ lukua, à a tↄ́ bo, a tↄ́n Dikiri, à pↄnna wiki lɛ́ a arɛ.

⁵Kunna a kpɛ́ kũ à kú adonaa gũn, Luda bi tonɛnↄ demɛ, gyaanↄnↄ zɛkũnwodemɛ.

⁶Luda dì bɛ kɛ gbɛ̃ kũ à gbɛ̃ vĩronɛ, àdi purusunanↄ bↄtɛ à ń da nnamanan, sãgbãnadenↄ sↄ̃ onigↄ̃ kú gu kori gũmmɛ.

⁷Luda, kũ n do n gbɛ̃nↄnɛ arɛ, gↄrↄ kũ n táa ò kũńwo gbárannan,

⁸zĩtɛ yĩ̀gãyĩgã, ludambɛ legũ gbàrɛ n arɛ, mↄkↄ̃n Luda kũ n yã ò Sinai kpi musu, Luda, Isarailanↄ Luda.

⁹Luda, n mùsɛɛ pìsi ń bùsuua baala'i, n n gbɛ̃ busananↄ gbà gbãna.

¹⁰N gbɛ̃nↄ vùtɛ a gũn Luda, akũ n wɛ̃ndadenↄ gbà pↄ́ n manakɛ yãi.

¹¹Dikiri yã ò, akũ nↄgbɛ̃nↄ gↄ̃̀ a baarukparinↄ ũ dasi.

¹²Kínanↄ kũ ń zĩ̀karinↄ tɛn bàa lɛ́ likalika, nↄgbɛ̃ kũ ò gↄ̃̀ bɛnↄ tɛni ń pↄ́nↄ kpaatɛtɛ.

¹³Bee kũ a wutɛ a kpàsa guragura, andurufu í kú ma potɛ̃nɛ dɛ̀mbɛrɛnↄa, a kãnↄ tɛn tɛ́ kɛ lán wuraa bà.