ZABURA 27:1-13

¹Dauda lɛ̀ɛ. Dikirimɛ ma gupura ũ kũ ma surabariio, dín mani vĩna kɛnɛɛ? Dikirimɛ ma utɛki ũ, dí vĩnan mani kɛɛ?

²Tó gbɛ̃ vãninↄ sìmagu de ò ma kɛ yákiyaki ke tó ma ibɛrɛnↄ kũ ma zãngurinↄ lɛ̀tɛma, ò gɛ̃̀ sí ò lɛ́tɛ.

³Bee tó zĩ̀karinↄ lìkamai, ma kù ni vĩro, bee tó gbɛ̃nↄ fùtɛma kũ zĩ̀io, ma laakari nigↄ̃ kpatɛna.

⁴Yã mɛ̀n don matɛn gbɛka Dikiria, yã pìn matɛn wɛtɛ manamana. Má ye màgↄ̃ kú Dikiri ↄnn ari ma wɛ̃̀ndi lɛ́n, de mà le màgↄ̃ a arɛ wɛtɛ a kpɛ́n gwe, má wɛ́ dↄ a manakɛnaai.

⁵Ani ma utɛ a kpɛ́n warikɛgↄrↄa, ani ma gwa a bizakutan, ani ma zɛ gbɛ̀ɛ musu aafia.

⁶Ma mì ni bo ma ibɛrɛ kũ ò likamainↄ pↄ́la, má sa o Dikiri ↄnn kũ ayuwiikɛnaao, má lɛ̀ sí mà a sáabu kpá.

⁷Tó ma n sisi Dikiri, ǹ wema, ǹ ma wɛ̃nda gwa, ń ma yã ma.

⁸Ma nɛ̀sɛ tɛn lɛ́ dama mà n arɛ wɛtɛ, Dikiri, matɛni n arɛ wɛtɛ.

⁹Ǹsun n mìkpɛrɛ zu makũ n zↄ̀bleriinɛro, ǹsun kpɛ dↄmɛnɛ kũ pↄfɛ̃oro. Ma kpanyĩriimɛ n ũ, ǹsun ma zukũnaro, Luda ma surabarii, ǹsun ma tónlo.

¹⁰Tó ma de kũ ma dao pã kpàmai, Dikiri ni ↄ likamai.

¹¹Dikiri, ǹ ma da n zɛ́a, ǹ domɛnɛ arɛ zɛ́ súsu gũn ma wɛ́tãmmarinↄ yãi.

¹²Ǹsun tó ma ibɛrɛnↄ pↄyeina kɛmɛnɛro, zaakũ sèeda ɛ́kɛdenↄ tɛn yã dima, gbɛ̃ pãsĩnↄ tɛn yĩ fɛ̃ma.

¹³Má yã díkĩna náanikɛna, kũ Dikiri ni yã mana kɛmɛnɛ andunia díkĩna gũn.