ZABURA 18:4-25

⁴Gó'itɛ vlɛ̃̀ kũmao, ípaka kũ àdi ń kakatɛ tɛni ma ble.

⁵Mira bànↄ lìkamai, ga tankutɛ kpàkpamɛnɛ ma arɛ.

⁶Kũ má kakũnna, ma Dikiri sìsi, ma wiki lɛ̀ ma Ludaa, akũ à ma kòtoo mà zaa a bɛa, ma wiki kà à kĩnaa, à gɛ̃̀ a sãn.

⁷Zĩtɛ lùkaluka à yĩ̀gãyĩgã, kpinↄ dègedege ari ń zĩnin. Ò lùkaluka kũ à pↄ fɛ̃̀ yãi.

⁸Túsukpɛ bò a yĩn, tɛ́ kũ àdi ń kpata bò a lɛ́n, a yↄ̃̀nↄ tɛn tɛ́ kɛ a arɛ.

⁹À musu wɛ̃̀ à kìpa, legũ sìsi a gɛ̀sɛ gbáru.

¹⁰Àtɛn vura dina kɛrubu kpɛ, àtɛn yàa kɛ ĩala.

¹¹À gusira dà a zĩdala, ludambɛ sira kũ̀ a kúkila.

¹²Zaa a gakuri tɛ́kɛnaa gũn legũ tɛn sisi, legũgbɛ tɛn kↄtɛ, legũ tɛn pi pãsĩpãsĩ.

¹³Dikiri pàta zaa musu, Luda Musude kòto dↄ legũpũtãna ũ.

¹⁴À kàa fã̀ ma ibɛrɛnↄa à ń fãkↄ̃a, à tò legũ pìḿma à pɛ̀ḿma.

¹⁵Kũ n pataḿma Dikiri, kũ n pↄ́ bò n yĩn, ísira zĩtɛ bò gupuraa, andunia zĩni gↄ̃̀ katɛna punsi.

¹⁶À ↄ bò zaa musu à ma kũ, à ma bo swada gũn.

¹⁷À ma si ma ibɛrɛ gbãna ↄ̃i kũ ma zãnguri kũ ń gbãna demalanↄ.

¹⁸Ò lɛ̀tɛma ma sunyĩkɛgↄrↄa, ama Dikiri zɛ̀ kũmao.

¹⁹À ma bo à ma gba mɛ̀poroki, à ma sura bà kũ à yemai yãi.

²⁰Dikiri yã kɛ̀mɛnɛ ma nɛ̀sɛmana lɛ́n, à fĩna bòmɛnɛ ma gbãsĩsarikɛna lɛ́n.

²¹Zaakũ má Luda yãditɛnanↄ kũna, mádi yã vãni kɛ ma a Luda tònlo.

²²A dokayãnↄ dìgↄ̃ domɛnɛ arɛ pínki, mádi kpɛ li yã kũ à dìtɛnↄnɛro.

²³Ma kunna taari vĩ Dikirinɛro, má a zĩda kũna durunna sari.

²⁴Dikiri fĩna bòmɛnɛ ma nɛ̀sɛmana lɛ́n, zaakũ à è má kun gbãsĩ sari.

²⁵Náanidemɛ n ũ náanidenↄnɛ, taarisaridemɛ n ũ taarisaridenↄnɛ.