ZABURA 119:45-175 - Luda yã takada kũ Bisã yão

⁴⁵Manigↄ̃ tɛ́ aafia, zaakũ ma n ↄdↄki wɛ̀tɛ.

⁴⁶Mani n yãnↄ o kínanↄ arɛ, wé'i ni ma kũro.

⁴⁷N yãditɛnanↄ dì ma pↄ gba, zaakũ má yei.

⁴⁸Ma gã̀a sɛ̀ n yãditɛna kũ má yeinↄnɛ, madì laasun lɛ́ n yãdannɛnanↄa.

⁴⁹Ǹ dↄ yã kũ n ò n zↄ̀bleriinɛn, zaakũ n tò ma wɛ́ dↄi.

⁵⁰Yã kũ àdi ma laakari kpátɛ ma warikɛnan dí, n lɛ́sɛna mɛ́ àdi ma wɛ̃̀ndi dãkpã.

⁵¹Karambaanidenↄ tɛni ma fobo lakanaa sari, bee kũ abireo madì zã n dokaaro.

⁵²Madì dↄ n dokayã kũ à kú zaa zĩnↄn, akũ òdi ma nɛ̀sɛ yĩda kũmɛnɛ, Dikiri.

⁵³Madì pↄ fɛ̃ manamana, kũ yãvãnikɛrinↄ dì pã kpá n dokai yãi.

⁵⁴Madì lɛ̀ sí n yãdannɛnanↄ musu ma kunna andunia díkĩna gũn.

⁵⁵N yã dìgↄ̃ dↄmagu gwãani, Dikiri, madìgↄ̃ n dokayãnↄ kũna.

⁵⁶Ma dↄ́nɛ kɛ̀ kũ yã birenↄo, zaakũ madìgↄ̃ n ↄdↄki gwa.

⁵⁷Dikiri, mↄkↄ̃mmɛ ma baka ũ, ma lɛ́ sɛ̀ kũ mani n yã ma.

⁵⁸Madì kútɛ kɛnnɛ kũ nɛ̀sɛdoo, ǹ sùru kɛ kũmao lákũ n ò nà.

⁵⁹Ma a yãkɛnanↄ laasunn lɛ̀, akũ ma ɛra n dokayãnↄa.

⁶⁰Mani wã, mani zɛzɛro, de mà n yãditɛnanↄ da.

⁶¹Bee kũ gbɛ̃ vãninↄ bàa fĩ̀kãmai, n dokayãnↄ ni sãmaguro.

⁶²Madì futɛ mà sáabu kɛnnɛ lizãndo n dokayã mananↄ musu.

⁶³N vĩnakɛri pínki gbɛ̃nnamɛ ma ũ, gbɛ̃ kũ òdi n ↄdↄki gwanↄ.

⁶⁴Dikiri, n gbɛ̃kɛ andunia pà, ǹ n yãditɛnanↄ damɛnɛ.

⁶⁵N a mana kɛ̀ makũ n zↄ̀bleriinɛ, lákũ n ò nà, Dikiri.

⁶⁶Ǹ wɛ́zɛ̃ kũ dↄ̃naao damɛnɛ, zaakũ ma n yãditɛnanↄ sì.

⁶⁷De ń kpɛ́ ǹ ↄ tↄ̃ma, má sãtɛnamɛ, ama tera sà má n yã kũna.

⁶⁸Ń mana, akũsↄ̃ n yãkɛnanↄn mana, ǹ n yãditɛnanↄ damɛnɛ.

⁶⁹Bee kũ karambaanidenↄ yãsira nàma, madìgↄ̃ n ↄdↄki gwa kũ nɛ̀sɛdoo.

⁷⁰Ń sã dì, àdi yã maro, makũ sↄ̃ ma pↄ nna n dokaa.

⁷¹N ↄtↄ̃manaa kɛ̀mɛnɛ mana, de mà le mà n yãdannɛnanↄ dada.

⁷²Doka kũ à bò n lɛ́n manamɛnɛ de wura kũ andurufu mɛ̀n dúbu ũgbangbanↄla.

⁷³N ↄ ma í kàsa à ma kɛ, ǹ ma gba ↄ̃ndↄ̃ mà n yãditɛnanↄ dada.

⁷⁴N vĩnakɛrinↄ ni ma e ò pↄnna kɛ, zaakũ n yãn ma wɛ́ dↄi.

⁷⁵Dikiri, má dↄ̃ kũ n dokayãnↄn mana, kũ ń náani vĩ yãin n ↄ tↄ̃̀ma.

⁷⁶Ǹ gbɛ̃kɛ kɛmɛnɛ de ma nɛ̀sɛ le à yĩda kũ, lákũ n ò makũ n zↄ̀bleriinɛ nà.

⁷⁷Ǹ mↄ́ ǹ wɛ̃nda dↄ̃mɛnɛ de màgↄ̃ kun, zaakũ n dokayãnↄmɛ ma pↄnna ũ.

⁷⁸Ǹ tó wé'i karambaanide kũ ò taari kɛ̀mɛnɛ pãnↄ kũ, makũ sↄ̃ mani laasun lɛ́ n ↄdↄkia.

⁷⁹Ǹ tó n vĩnakɛrinↄ su ma kĩnaa, gbɛ̃ kũ ò n yãnↄ dↄ̃nↄ.

⁸⁰Ǹ tó ma nɛ̀sɛ gↄ̃ yãke vĩro n yãnↄ musu de wé'i sún ma kũro yãi.

⁸¹N surabana yã tɛni ma swɛ̃̀ ble, n yãn ma wɛ́ dↄi.

⁸²Ma wɛ́ dↄdↄna n lɛ́sɛnaai ari ma wɛ́ wò, bↄrɛn ĩni ma nɛ̀sɛ yĩda kũmɛnɛɛ?

⁸³Má de lán bára bↄ̀kↄ kũ à túsukpɛ màa bà, bee kũ abireo n yãditɛnanↄ dì sãmaguro.

⁸⁴Makũ n zↄ̀bleri manigↄ̃ n dã ari bↄrɛɛ? Bↄrɛn ĩni wari dↄ ma wɛ́tãmmarinↄaa?

⁸⁵Karambaanidenↄ dì wɛ̀ɛ yↄ̃mɛnɛ mà zun, ń yã dì kↄ̃ sɛ́ kũ n dokaoro.

⁸⁶N yãditɛnanↄ pínki náani vĩ, ǹ kpámai, zaakũ òtɛn wɛ́ tãma pãmɛ.

⁸⁷À gↄ̃̀ fíti kũ oni láka kũmao andunian, makũ sↄ̃ mádi pã kpá n ↄdↄkinɛro.

⁸⁸Ǹ ma wɛ̃̀ndi dãkpã n gbɛ̃kɛ yãi, mani n yãnↄ da.

⁸⁹Dikiri, n yã dìgↄ̃ kun gↄrↄ sĩnda pínki, a zĩni pɛtɛna zaa musu.

⁹⁰Ń náani vĩ wɛ̃̀ kũ wɛ̃̀ɛo, n andunia kàtɛ, akũ à kpɛ́ kun.

⁹¹Pↄ́ sĩnda pínki kpɛ́ kun gbãra n doka yãi, zaakũ pↄ́ sĩnda pínki dì donyĩ.

⁹²Tó n dokamɛ ma pↄnna ũ yãro, de ma laka ma warikɛnaa gũn.

⁹³N ↄdↄki ni sãmagu zikiro, zaakũ a gãin n ma wɛ̃̀ndii dã̀kpã.

⁹⁴N pↄ́mɛ ma ũ, ǹ ma sura ba, zaakũ ma n ↄdↄki wɛ̀tɛ.

⁹⁵Gbɛ̃ vãninↄ tɛni ma dã ò ma dɛ, ama ma laakari kú n yãnↄa.

⁹⁶Ma è kũ pↄ́ mana sĩnda pínki zaka lɛ́ kummɛ, ama n yãditɛnanↄ zↄ̃kↄ̃ lɛ́ vĩro.

⁹⁷Má ye n dokai à kɛ̀ zↄ̃kↄ̃ fá, madìgↄ̃ laasun lɛ́a zaa kↄnkↄ ari ↄkↄsi.

⁹⁸N yãditɛnanↄ dì tó ma ↄ̃ndↄ̃ gↄ̃ de ma ibɛrɛnↄ pↄ́la, zaakũ à kú ma swɛ̃̀n gↄrↄ sĩnda pínki.

⁹⁹Ma wɛ́zɛ̃ de ma yãdannɛrinↄ pↄ́la ń pínki, zaakũ ma laasun dìgↄ̃ kú n yãnↄamɛ.

¹⁰⁰Ma ↄ̃ndↄ̃ de marenↄ pↄ́la, zaakũ madìgↄ̃ n ↄdↄkinↄ gwa.

¹⁰¹Madì mì kɛ̃ zɛ́ vãni sĩnda pínkia de mà le màgↄ̃ n yã kũna yãi.

¹⁰²Mádi kɛ̃ n dokayãnↄaro, zaakũ mↄkↄ̃n mɛ́ n dàmɛnɛ.

¹⁰³N yãnↄn nnamɛnɛ à kɛ̀ zↄ̃kↄ̃, à nna de zↄ́la ma lɛ́n.

¹⁰⁴N ↄdↄki dì ma gba laakarii, abire yãi ma zã sãtɛna zɛ́ sĩnda pínkin.

¹⁰⁵N yãmɛ fitila ũ ma gbánɛ, àdi gu pumɛnɛ zɛ́n.

¹⁰⁶Ma la dà ma zɛo kũ manigↄ̃ tɛ́ n dokayã mananↄi.

¹⁰⁷Ma wɛ́tãmmanaa kɛ̀ zↄ̃kↄ̃, Dikiri, ǹ ma wɛ̃̀ndi dãkpã lákũ n ò nà.

¹⁰⁸Ǹ ma sáabukpana sí, gbasa ǹ n dokayãnↄ damɛnɛ, Dikiri.

¹⁰⁹Madìgↄ̃ ma zĩda da karii gũn, bee kũ abireo n dokayãnↄ dì sãmaguro.

¹¹⁰Yãvãnikɛrinↄ tankutɛ kpàkpamɛnɛ, ama mádi zã n ↄdↄkiaro.

¹¹¹N yãnↄmɛ ma túbi ũ ari gↄrↄ sĩnda pínki, mↄ́kↄ̃nↄmɛ ma pↄnna ũ.

¹¹²Ma swɛ̃̀ kú n yãdannɛnanↄa ari ma wɛ̃̀ndi lɛ́n.

¹¹³Ma zã nɛ̀sɛpladenↄn, má ye n dokai.

¹¹⁴Mↄkↄ̃mmɛ ma utɛki kũ ma sɛ̃gbakoo ũ, n yãn ma wɛ́ dↄi.

¹¹⁵À gomala ákↄ̃nↄ yãvãnikɛrinↄ de màgↄ̃ ma Luda yãditɛnanↄ kũna.

¹¹⁶Ǹgↄ̃ ma kũna lákũ n ò nà, manigↄ̃ kun, ǹsun tó tãmaa ma nɛro.

¹¹⁷Ǹ ma sɛ́ musu de mà bo aafia, ma wɛ́ nigↄ̃ pɛ́ n yãdannɛnanↄa.

¹¹⁸Ndì gí gbɛ̃ kũ ò zã̀ n yãdannɛnaaanↄi, ń manafikikɛna bi pãmɛ.

¹¹⁹Ndì andunia yãvãnikɛrinↄ kↄ́tɛ lán mↄ̀gbↄ̃ↄ bà, abire yãin má ye n yãnↄi.

¹²⁰Ma mɛ̀ɛ dì futɛ n vĩna yãi, n dokayãnↄn naasi vĩmɛ.

¹²¹Ma yã kɛ̀ a zɛ́a súsu, ǹsun ma tó ma wɛ́tãmmarinↄnɛro.

¹²²Ǹ zɛnkpɛkɛ sɛ́ makũ n zↄ̀bleriinɛ de mà bo mana, ǹsun tó karambaanidenↄ ma wɛ́ tãro.

¹²³Ma wɛ́ dↄ n surabanaai ari ma kpasa, matɛni n lɛ́sɛna mana dã.

¹²⁴Ǹ yã kɛmɛnɛ n gbɛ̃kɛ gũn, ǹ n yãdannɛnanↄ da makũ n zↄ̀bleriinɛ.

¹²⁵N zↄ̀bleriimɛ ma ũ, ǹ ma gba laakarii de mà n yãnↄ dↄ̀rↄ dↄ̃.

¹²⁶Yãkɛna gↄrↄ kà, Dikiri, zaakũ òtɛn bo n doka kpɛ.

¹²⁷Má ye n yãditɛnanↄi de wurala, bee wura baasanaa.

¹²⁸Ma è n ↄdↄki mana, abire yãi sãtɛna zɛ́ pínki dì kɛmɛnɛro.

¹²⁹N yãnↄn demɛnɛ yãbonsarɛ ũ, abire yãi má kũna ma swɛ̃̀n.

¹³⁰N yã bↄkↄtɛnaa dì gu puńnɛ, àdi nɛ̀sɛdodenↄ gba laakarii.

¹³¹Ma lɛ́ wɛ̃na, matɛn wesa bo fɛ̀ɛkuu, zaakũ n dokayãnↄ ni tɛni ma dɛ.

¹³²Ǹ arɛ dↄma ǹ sùru kɛ kũmao, lákũ ndì kɛ gbɛ̃ kũ ò ye n tↄ́inↄnɛ nà.

¹³³Ǹ ma da zɛ́a lákũ n ò nà, ǹsun tó yã vãni ke kí blemaro.

¹³⁴Ǹ ma bo gbɛ̃ takikɛrinↄ ↄĩ de mà n ↄdↄki gwa.

¹³⁵Ǹ ãn were makũ n zↄ̀bleriia, ǹ tó mà n yãdannɛnanↄ dↄ̃.

¹³⁶Wɛ́'i tɛn pla ma wɛ́n kũ ò n doka kũnaro yãi.

¹³⁷Dikiri, ń mana, n dokayãnↄn zɛ́ vĩ.

¹³⁸N n yãnↄ dìtɛ a zɛ́a, ò náani vĩ manamana.

¹³⁹Ma ibɛrɛnↄ sã̀ n yãn, akũ ń yã ma kũ gbãna manamana.

¹⁴⁰Ò n yã yↄ̃̀ ò gwà à sãnkara ke vĩro, makũ n zↄ̀bleri, má yei manamana.

¹⁴¹Pↄ́ken ma ũro, òdi ma gya bo, bee kũ abireo n ↄdↄki dì sãmaguro.

¹⁴²N yãmanakɛna lakana vĩro, n doka yãpura vĩ.

¹⁴³Wari kũ yã'ũmmanaao ma le, ama n yãditɛnanↄmɛ ma pↄnna ũ.

¹⁴⁴N yãnↄn mana gↄrↄ sĩnda pínki, ǹ ma gba laakari de màgↄ̃ kun.

¹⁴⁵Madì n sísi kũ nɛ̀sɛdoo Dikiri, ǹ wema, manigↄ̃ n yãditɛnanↄ kũna.

¹⁴⁶Madì lɛ́ zunyĩ ǹ ma sura ba, manigↄ̃ n yãnↄ kũna.

¹⁴⁷Madì futɛ gudↄo mà wiki lɛ́mma, n yãn ma wɛ́ dↄi.

¹⁴⁸I dì na ma wɛ́a gwãaniro de mà le mà laasun lɛ́ n yãa yãi.

¹⁴⁹Ǹ ma yã ma n gbɛ̃kɛ yãi, Dikiri, ǹ ma wɛ̃̀ndi dãkpã lákũ n yãzɛdekɛ de nà.

¹⁵⁰Gbɛ̃ kũ òdi lɛ́ kpákũsũmainↄ kãni kũmao, ama ò zã̀ kũ n dokao.

¹⁵¹Ń kú kũmao kãni Dikiri, n yãditɛnanↄ pínki yãpura vĩ.

¹⁵²Zaa gìkɛna ma dↄ̃̀ n yãnↄa kũ n dìtɛ àgↄ̃ kun gↄrↄ sĩnda pínki.

¹⁵³Ǹ ma warikɛna gwa ǹ ma sura ba, zaakũ n doka dí sãmaguro.

¹⁵⁴Ǹ zɛ kũmao ǹ ma bo, ǹ ma wɛ̃̀ndi dãkpã lákũ n a lɛ́ sɛ̀ nà.

¹⁵⁵N surabanaa zã̀ kũ yãvãnikɛrinↄ, zaakũ òdi n yãdannɛnanↄ wɛtɛro.

¹⁵⁶N wɛ̃nda zↄ̃kↄ̃, Dikiri, ǹ ma wɛ̃̀ndi dãkpã lákũ n yãzɛdekɛ de nà.

¹⁵⁷Ma ibɛrɛ kũ òdi wɛ́ tãmanↄn dasi, ama mádi zã n yãnↄaro.

¹⁵⁸Má ye n náanisaridenↄ kãiro, kũ ò n yã kũnaro yãi.

¹⁵⁹Ǹ gwa lákũ má ye n ↄdↄkii nà. Dikiri, ǹ ma wɛ̃̀ndi dãkpã n gbɛ̃kɛ yãi.

¹⁶⁰N yã sĩnda pínki bi yãpuramɛ, n dokayãnↄn mana ò lakana vĩro.

¹⁶¹Gbãnadenↄ dì wɛ́ tãma pã, ama n yã vĩna dì ma kũ.

¹⁶²Madì pↄnna kɛ kũ n lɛ́sɛnaao, lákũ ma aruzɛkɛ zↄ̃kↄ̃ sɛ̀tɛ zĩ̀i gũn bà.

¹⁶³Ma zã manafikin, má ye a yãiro, n dokan má yei.

¹⁶⁴Madìgↄ̃ n táaki lɛ́ gↄrↄ do gɛ̃̀n supplapla kũ n dokayãnↄn mana yãi.

¹⁶⁵Gbɛ̃ kũ ò ye n dokainↄ aafia zↄ̃kↄ̃, yãke dì tó ò furo.

¹⁶⁶Ma wɛ́ dↄi ǹ ma sura ba, Dikiri, madì tɛ́ n yãditɛnanↄi.

¹⁶⁷Má n yãnↄ kũna, zaakũ má yei manamana.

¹⁶⁸Madì n ↄdↄki gwa madì n yãnↄ ma, zaakũ ma yãkɛna sĩnda pínki kú n ↄĩmɛ.

¹⁶⁹Ǹ tó ma wikilɛna n kĩnaa le, Dikiri, ǹ ma gba laakari lákũ n ò nà.

¹⁷⁰Ǹ tó ma aduakɛna n ki le, ǹ ma sura ba lákũ n lɛ́ sɛ̀ nà.

¹⁷¹N táakilɛna gↄ̃ da ma lɛ́n, zaakũ ndì n yãdannɛnanↄ damɛnɛ.

¹⁷²Mani lɛ̀ sí n lɛ́sɛnaa musu, zaakũ n yãditɛnanↄn mana pínki.

¹⁷³Ǹgↄ̃ kú kũ soruo ǹ ↄ dama, zaakũ ma zɛ kũ n ↄdↄkio.

¹⁷⁴Matɛni a ni dɛ ǹ ma sura ba, Dikiri, n dokamɛ ma pↄnna ũ.

¹⁷⁵Ǹ tó màgↄ̃ kun, manigↄ̃ n táaki lɛ́, ǹ tó n dokayãnↄ gↄ̃ ma kũna.