ZABURA 119:32-98 - Luda yã takada kũ Bisã yão

³²Madì wã n yãditɛnanↄ zɛ́i, zaakũ n ma laakarii kpàtɛmɛnɛ.

³³Dikiri, ǹ n yãdannɛnanↄ zɛ́ mↄmɛnɛ de màgↄ̃ kũna ari ma wɛ̃̀ndi lɛ́n.

³⁴Ǹ ma gba ↄ̃ndↄ̃ màgↄ̃ n doka kũna, màgↄ̃ zĩ kɛa kũ nɛ̀sɛdoo.

³⁵Ǹ ma da n yãditɛnanↄ zɛ́n, zaakũ abirekũ mɛ́ àdi kámagu.

³⁶Ǹ tó ma swɛ̃̀ tá n yãnↄa, àsun tá bĩni zɛ́nlo.

³⁷Ǹ ma wɛ́ go pↄ́ pãnↄa, ǹ ma wɛ̃̀ndi dãkpã lákũ n ò nà.

³⁸Ǹ yã kũ n ò papa makũ n zↄ̀bleriinɛ, lɛ́ kũ n sɛ̀ n vĩnakɛrinↄnɛɛ.

³⁹Ǹ tó sↄ̃sↄ̃na kũ madì a vĩna kɛ goma, zaakũ n dokayãnↄn mana.

⁴⁰Má ye n ↄdↄkii fá, ǹ ma wɛ̃̀ndi dãkpã n manakɛ gũn.

⁴¹Dikiri, ǹ mↄ́ ǹ gbɛ̃kɛ kɛmɛnɛ, ǹ ma sura ba lákũ n ò nà,

⁴²gbasa mà yã we ma sↄ̃̀sↄ̃rinↄa, zaakũ matɛni n yã náani kɛ.

⁴³Ǹsun yãpura yã sí ma lɛ́nlo, zaakũ n dokayãnↄn ma wɛ́ dↄi.

⁴⁴Manigↄ̃ n doka kũna ari gↄrↄ sĩnda pínki.

⁴⁵Manigↄ̃ tɛ́ aafia, zaakũ ma n ↄdↄki wɛ̀tɛ.

⁴⁶Mani n yãnↄ o kínanↄ arɛ, wé'i ni ma kũro.

⁴⁷N yãditɛnanↄ dì ma pↄ gba, zaakũ má yei.

⁴⁸Ma gã̀a sɛ̀ n yãditɛna kũ má yeinↄnɛ, madì laasun lɛ́ n yãdannɛnanↄa.

⁴⁹Ǹ dↄ yã kũ n ò n zↄ̀bleriinɛn, zaakũ n tò ma wɛ́ dↄi.

⁵⁰Yã kũ àdi ma laakari kpátɛ ma warikɛnan dí, n lɛ́sɛna mɛ́ àdi ma wɛ̃̀ndi dãkpã.

⁵¹Karambaanidenↄ tɛni ma fobo lakanaa sari, bee kũ abireo madì zã n dokaaro.

⁵²Madì dↄ n dokayã kũ à kú zaa zĩnↄn, akũ òdi ma nɛ̀sɛ yĩda kũmɛnɛ, Dikiri.

⁵³Madì pↄ fɛ̃ manamana, kũ yãvãnikɛrinↄ dì pã kpá n dokai yãi.

⁵⁴Madì lɛ̀ sí n yãdannɛnanↄ musu ma kunna andunia díkĩna gũn.

⁵⁵N yã dìgↄ̃ dↄmagu gwãani, Dikiri, madìgↄ̃ n dokayãnↄ kũna.

⁵⁶Ma dↄ́nɛ kɛ̀ kũ yã birenↄo, zaakũ madìgↄ̃ n ↄdↄki gwa.

⁵⁷Dikiri, mↄkↄ̃mmɛ ma baka ũ, ma lɛ́ sɛ̀ kũ mani n yã ma.

⁵⁸Madì kútɛ kɛnnɛ kũ nɛ̀sɛdoo, ǹ sùru kɛ kũmao lákũ n ò nà.

⁵⁹Ma a yãkɛnanↄ laasunn lɛ̀, akũ ma ɛra n dokayãnↄa.

⁶⁰Mani wã, mani zɛzɛro, de mà n yãditɛnanↄ da.

⁶¹Bee kũ gbɛ̃ vãninↄ bàa fĩ̀kãmai, n dokayãnↄ ni sãmaguro.

⁶²Madì futɛ mà sáabu kɛnnɛ lizãndo n dokayã mananↄ musu.

⁶³N vĩnakɛri pínki gbɛ̃nnamɛ ma ũ, gbɛ̃ kũ òdi n ↄdↄki gwanↄ.

⁶⁴Dikiri, n gbɛ̃kɛ andunia pà, ǹ n yãditɛnanↄ damɛnɛ.

⁶⁵N a mana kɛ̀ makũ n zↄ̀bleriinɛ, lákũ n ò nà, Dikiri.

⁶⁶Ǹ wɛ́zɛ̃ kũ dↄ̃naao damɛnɛ, zaakũ ma n yãditɛnanↄ sì.

⁶⁷De ń kpɛ́ ǹ ↄ tↄ̃ma, má sãtɛnamɛ, ama tera sà má n yã kũna.

⁶⁸Ń mana, akũsↄ̃ n yãkɛnanↄn mana, ǹ n yãditɛnanↄ damɛnɛ.

⁶⁹Bee kũ karambaanidenↄ yãsira nàma, madìgↄ̃ n ↄdↄki gwa kũ nɛ̀sɛdoo.

⁷⁰Ń sã dì, àdi yã maro, makũ sↄ̃ ma pↄ nna n dokaa.

⁷¹N ↄtↄ̃manaa kɛ̀mɛnɛ mana, de mà le mà n yãdannɛnanↄ dada.

⁷²Doka kũ à bò n lɛ́n manamɛnɛ de wura kũ andurufu mɛ̀n dúbu ũgbangbanↄla.

⁷³N ↄ ma í kàsa à ma kɛ, ǹ ma gba ↄ̃ndↄ̃ mà n yãditɛnanↄ dada.

⁷⁴N vĩnakɛrinↄ ni ma e ò pↄnna kɛ, zaakũ n yãn ma wɛ́ dↄi.

⁷⁵Dikiri, má dↄ̃ kũ n dokayãnↄn mana, kũ ń náani vĩ yãin n ↄ tↄ̃̀ma.

⁷⁶Ǹ gbɛ̃kɛ kɛmɛnɛ de ma nɛ̀sɛ le à yĩda kũ, lákũ n ò makũ n zↄ̀bleriinɛ nà.

⁷⁷Ǹ mↄ́ ǹ wɛ̃nda dↄ̃mɛnɛ de màgↄ̃ kun, zaakũ n dokayãnↄmɛ ma pↄnna ũ.

⁷⁸Ǹ tó wé'i karambaanide kũ ò taari kɛ̀mɛnɛ pãnↄ kũ, makũ sↄ̃ mani laasun lɛ́ n ↄdↄkia.

⁷⁹Ǹ tó n vĩnakɛrinↄ su ma kĩnaa, gbɛ̃ kũ ò n yãnↄ dↄ̃nↄ.

⁸⁰Ǹ tó ma nɛ̀sɛ gↄ̃ yãke vĩro n yãnↄ musu de wé'i sún ma kũro yãi.

⁸¹N surabana yã tɛni ma swɛ̃̀ ble, n yãn ma wɛ́ dↄi.

⁸²Ma wɛ́ dↄdↄna n lɛ́sɛnaai ari ma wɛ́ wò, bↄrɛn ĩni ma nɛ̀sɛ yĩda kũmɛnɛɛ?

⁸³Má de lán bára bↄ̀kↄ kũ à túsukpɛ màa bà, bee kũ abireo n yãditɛnanↄ dì sãmaguro.

⁸⁴Makũ n zↄ̀bleri manigↄ̃ n dã ari bↄrɛɛ? Bↄrɛn ĩni wari dↄ ma wɛ́tãmmarinↄaa?

⁸⁵Karambaanidenↄ dì wɛ̀ɛ yↄ̃mɛnɛ mà zun, ń yã dì kↄ̃ sɛ́ kũ n dokaoro.

⁸⁶N yãditɛnanↄ pínki náani vĩ, ǹ kpámai, zaakũ òtɛn wɛ́ tãma pãmɛ.

⁸⁷À gↄ̃̀ fíti kũ oni láka kũmao andunian, makũ sↄ̃ mádi pã kpá n ↄdↄkinɛro.

⁸⁸Ǹ ma wɛ̃̀ndi dãkpã n gbɛ̃kɛ yãi, mani n yãnↄ da.

⁸⁹Dikiri, n yã dìgↄ̃ kun gↄrↄ sĩnda pínki, a zĩni pɛtɛna zaa musu.

⁹⁰Ń náani vĩ wɛ̃̀ kũ wɛ̃̀ɛo, n andunia kàtɛ, akũ à kpɛ́ kun.

⁹¹Pↄ́ sĩnda pínki kpɛ́ kun gbãra n doka yãi, zaakũ pↄ́ sĩnda pínki dì donyĩ.

⁹²Tó n dokamɛ ma pↄnna ũ yãro, de ma laka ma warikɛnaa gũn.

⁹³N ↄdↄki ni sãmagu zikiro, zaakũ a gãin n ma wɛ̃̀ndii dã̀kpã.

⁹⁴N pↄ́mɛ ma ũ, ǹ ma sura ba, zaakũ ma n ↄdↄki wɛ̀tɛ.

⁹⁵Gbɛ̃ vãninↄ tɛni ma dã ò ma dɛ, ama ma laakari kú n yãnↄa.

⁹⁶Ma è kũ pↄ́ mana sĩnda pínki zaka lɛ́ kummɛ, ama n yãditɛnanↄ zↄ̃kↄ̃ lɛ́ vĩro.

⁹⁷Má ye n dokai à kɛ̀ zↄ̃kↄ̃ fá, madìgↄ̃ laasun lɛ́a zaa kↄnkↄ ari ↄkↄsi.

⁹⁸N yãditɛnanↄ dì tó ma ↄ̃ndↄ̃ gↄ̃ de ma ibɛrɛnↄ pↄ́la, zaakũ à kú ma swɛ̃̀n gↄrↄ sĩnda pínki.