YOHAAN 9:22-40

²²Icom oki gwo wakansan mo haali/ uni ḵo/ki ’Kwani Yahuuda/ mo haali/ ’Kwani Yahuuda/ thosonki gwo mo jin gamu me’d mo waḵki/ wathin ṯal ’deŋ kamu/ midi ’taki pi gwo gom a’di mo mmo/o ki a’di ta’da Ḵrisṯẖos mo tani a’di minu ur ka pije/ ’peni gu’b gi montul is buni mo be.

²³A’di ta gwo jin ona icom gwo mo wakan mo ki: A’di cana yil mo be. Doṯi a’di mo ma.

²⁴Wakan doḵ/e me’di su/ mo tani uni ki yuḵ wathi/ jin taki’da ja’da/ mo dhali o a’di gwo mo ki: C̱iya Arumgimis mom’bor bwa i is mo ma. Aman misha ki wathi/ yansan ta’da manmii miinthus mo be.

²⁵A’di ki thoḵ uni gwo mo ki: Waḵki/ a’di ta’da manmii miinthus mo tani aha/ mola mo be. Jasi ton ṯal ’de/ a’di imishka/ mo ba/ me’d jin taka/ ja’da/ mo tani aha/ misha mo shwane/ mo be.

²⁶Uni ki thoḵ a’di gwo mo ki: Ki a’di mii’da ta i /e mo? Ki e ḵa’da a’di /e kata mo?

²⁷A’di ki thoḵ uni gwo mo ki: Aha/ ṯorkina um gwo mo hila/ dhali um ushki gwo ciḵ moyi. Ba tinta iŋap̱a um a’di mmociḵ doḵ/e sa/? Um si’da/ ŋap̱an mmowar ki imanciḵ a’di gwo mo ’taa?

²⁸Dhali uni sorki a’di mo mmo/o gwo mo ki: /E a’di itana manciḵ a’di gwo mo. Hili aman tana imanciḵa Musa gwo mo be.

²⁹Aman misha ka Arumgimis ṯorki’da Musa gwo mo. Hili gom gwo gi wathi/ yan mo tani aman mola mo mo jin yayina a’di ’peni cine/ mo be.

³⁰Dhali wathi/ ki thoḵ uni gwo mo ki: Ba mii yansan ta miimer mo be. Ki um ’koki mish mo jin yayina a’di ’peni cine/ mo dhali hili a’di ḵa’dki aha/ em pem mo be.

³¹Ana misha mo mo ka Arumgimis diki ciḵ ’twa/ gi imanmii miinthus mo hili waḵki/ jan ’de/ yin jin ta’da manluŋa Arumgimis mo dhali mii bwam piti mo tani Arumgimis ciḵki a’di ’twa/ mo be.

³²Hili ’pena dhamo/ ki suny suny mo me’d jin ṯelkina mony’cesh ’pen mo tani gwo yisa ciḵkunuwa ki jan ṯal ’deŋ kamu/ ḵa’dki’da kamu/ e mo a’di jin dhodhu ka ja’da/ mo.

³³Waḵki/ wathi/ yansan midi ’taki diki di ’peni Arumgimis mo tani a’di midi ’taki mol toŋ kamu/ mii mo be.

³⁴Dhali uni ki thoḵ gwo mo ki: /E jin dho’thkunu e miinthus kan mo tani dhali mina /e imish am gwo ṯora? Dhali uni ki ur a’di ka pije/ mo be.

³⁵Dhala Yesus ciḵki gwo ki uni urki a’di ka pije/ mo dhali a’di ki gam a’di ’kup̱ mo, dhali a’di ki o a’di gwo mo ki: /E gamki Ya/ ma Arumgimis gwo is mo ’taa?

³⁶A’di ki thoḵ a’di gwo mo dhali o gwo mo ki: Ki a’di jaye, Tap̱a, ki aha/ mina gam a’di gwo is mo?

³⁷Yesus ki thoḵ a’di gwo mo ki: /E mishki a’di mo dhali a’di a’dan be jin ṯorki /e gwo mo be.

³⁸A’di ki thoḵ a’di gwo mo ki: Tap̱a, aha/ gamkina gwo is mo. Dhali a’di ki luŋ a’di mo be.

³⁹Dhala Yesus ki o gwo mo ki: Gom gwon dwall mo tani aha/ p̱u’dkina i mony’cesh yansan mo, ki uni gwansan kun ’koki mish mo mo tani mini ’taki mish mo mo, dhali uni gwansan kun mishi mo mo tani mini war ka ja’da/ mo be.

⁴⁰’Kwani P̱arisiyiina tiya ’dishkin mo mmociḵ gwo jin ona a’di mo dhali uni ki o a’di gwo mo ki: A/am si’da/ de itana ja’da/ de?