Johani 9:22-40

²²Bazazi bakwe babawambi izi zintu, mukuti babakutite Majuda. Mukuti Majuda chiba babazuminzene kale kuti iye yete alizumine kuti nji Kreste mubamuhindikile kunze yamasinagoge.

²³Chebaka lyezi, bazazi bakwe nibati, “Mukulwana, mumubuze.”

²⁴Mukuti chibabahitite tobole nibasumpa mukwame yabakubanga chihofu ni chibati kwali, “Uhe ikanya kwa Ireeza. Twizi kuti uzu mukwame mutendi wazive.”

²⁵Linu uzo mukwame netaba, “Kanizi nandi mutendi wazive. Chimwi chinizi: Nibali nimuhofu, imi hanu chinibona.”

²⁶Kuzwaho nibamuti, “Chinzi chabatendi kwako? Abeyalula buti menso ako?”

²⁷Abetabi, namiwambila kale, imi kamutekelezi! Chinzi hamusaka kuzuwa chimwi hape? Kamusaki kuba barutwana bakwe nanwe, nandi musaka?

²⁸Nichibamutuka imi nibati, “Umurutwana wakwe, imi iswe tubarutwana ba Mushe.

²⁹Twizi kuti Ireeza abawambi kwa Mushe, imi katwizi kuti uzu uzwa kuhi.”

³⁰Mukwame netaba nabacho, Ichi chikomosa, kuti kamwizi kwazwa, kono abeyaluli menso angu.

³¹Twizi kuti Ireeza katekelezi batendi bazive, kono haiba muntu ulibekite kwa Ireeza ni kutenda intato yakwe, umutekeleza.

³²Kutanga kumatangilo achisi kana kubeni kuzuweka kuti kwina ichabeyaluli menso amukwame yabazalwa neli muhofu.

³³Haiba uzu mukwame kazwi kwa Ireeza, kakwina chiti nabatendi.”

³⁴Nibamwitaba nibati, “Iwe ubazalilwa muzive kumaniniza, imi utuluta?” Hahobulyo nibamusohela kunze.”

³⁵Jesu abazuwi kuti babamuhindikili hanze yesinagoge. Hamusangana nati, “Uzumina ku Mwana Muntu na?”

³⁶Netaba nati, “Njeni uzo, Simwine, kokuti nizumine kwali?”

³⁷Jesu nati kwali, “Ubamuboni, imi njeyena yowamba nawe.”

³⁸Mukwame nati, “Simwine, nizumina” imi namulapela.

³⁹Jesu nati, “Kuatulwa chinibezili mwechinu chisi kokuti basaboni babone imi kokuti bana babona basanduke zihofu.”

⁴⁰Balikene ku Bafalisi babena naye babazuwi izi zintu imi nibamubuza, “Kana naswe bulyo tubahofu?”