YOHAAN 5:1-39

¹Dhali ’ko’di mii yan mo tani ayuḵ jin yuḵu mmotul ’kup̱ gi ’Kwani Yahuuda/ ’dishki’d mo dhala Yesus ya’d ka gagamis e Pa Urushaliim mo be.

²Dhali ara al yi’de/ diki’d e Pa Urushaliim e ’twaŋkala goŋ ḵa’bal mo jin yuḵkunu ki ’twaŋ ’Kwani Ibraniyiin ka Beeṯ/hisda mo, a’di jin ’kokin ma lambalanyi mudhe’d mo be.

³Dhali mo yansan a’di ta mo jin ishkin ma waambuhany ’kwani kun aṯẖa mom’bi’th mo dhali kun takina ja’da/ mo dhali kun ta ŋwol mo dhali kun ḵu’thkina is guŋkuru/ mo, mmoc̱or yi’de/ mmobaŋgal is mo,

⁴haala man’doyu gwo gi Tap̱a thulki’d ki me’da tiya eya al mo dhali mmobaŋgal yi’de/ is mo. Dhali a’diyin jin thulki yi’de/ nṯwa/a/ ’ko’di yi’de/ baŋgalkunu is mo tani a’di wac̱ki’d ’peni ’ba’th yin jin ’koshki a’di mo be.

⁵Wathin ṯal ’de/ diki’d, a’di jin ’ba’thki’d ki yil iss ’de/ i’ce’dka ’kume’d mo dhali pekwara mo.

⁶Dhali ka Yesus p̱arki a’di e mo mmo/isha a’di ’ko’da ’cesh ki rash rash mo tani a’di ki o a’di gwo mo ki: /E ŋap̱an ki /e minu wac̱ mowa?

⁷Dhali wathi/ jin ’batha’d a’di ki thoḵ a’di gwo mo ki: Tap̱a, aha/ dara gi wathi/ mmokar aha/ eya al mo ki yi’de/ baŋgalki is mo, dhali ki aha/ dina mmoya mo tani jaŋ kamu/ thulki’di ṯwa/a/ ki aha/ mo be.

⁸Dhala Yesus ki o a’di gwo mo ki: Cuyi mis mo dhali ’deka cim pini dhali yayi mo.

⁹Dhali ki jahanne/ wathi/ wac̱kunu mo dhali a’di ’de’kki’da cim piti mo dhali ya bway pa mo be. Dhali acim yansan a’di ta’da cim ma pesu/ mo be.

¹⁰Dhali wakan ’Kwani Yahuuda/ ki o wathi/ jin wac̱kunu gwo mo ki: A’di ta’da cim ma pesu/ mo. A’di diki ta mii jin dhala gwoŋḵan /e bway mo mmoḵala cim pini mo be.

¹¹Hili a’di ki thoḵ uni gwo mo ki: Wathi/ jin wac̱ki aha/ mo tani a’di ki o aha/ gwo mo ki: ’Deki acim pini mo ma dhali yayi mo.

¹²Dhali uni ki thoḵ a’di gwo mo ki: Ki wathi/ jana i/o /e gwo kan mo? mmo/o gwo mo ki: ’Deki acim pini dhali yayi mo?

¹³Dhali wathi/ jin wac̱kunu mo tani a’di diki mish wathi/ mo haala Yesus borki is piti mo haala dhana waambuhany ’kwani caaca mo e mo c̱aan mo be.

¹⁴Dhali yan’ko’d Yesus ki gam a’di e gu’b gi mondheleladhelel mo dhali o a’di gwo mo ki: Hili mo mo ma. /E ’borkina is mo. Dhalku/ miinthusa kamu/ ki mii mii doḵ/e mo jin mina jiŋ kamu/ jin shi/ashi/ mmobol yansan e mo diki ’kosh /e mo.

¹⁵Dhali wathi/ yaki’d mo dhali ṯor ’Kwani Yahuuda/ gwo mo ka Yesus a’di iwac̱ki a’di mo be.

¹⁶Dhali gom mii yan kan mo tani a’di ṯoca ’Kwani Yahuuda/ aYesus ’kus mo haali/ a’di miiki mii yansan ka cim ma pesu/ mo be.

¹⁷Hila Yesus thoḵ uni gwo mo ki: Ababam pem di’d naskina/ mmomiiya ṯu’c mo. Dhali aha/ si’da/ dina mmomiiya ṯu’c mo.

¹⁸Dhali gom gwo yan kan mo tani ’Kwani Yahuuda/ ’baar mo ŋap̱kina ŋap̱ mo ka dun dara’d mo mmo’kosh a’di mo haali/ a’di ilu/ yisa ’ce’dki jasa cim ma pesu/ yisa, hili si’da/ a’di yuḵki’da Arumgimis ki Com mo mmokar is piti mmonyaḵa nyaḵ ka Arumgimis mo be.

¹⁹Dhali Yesus ki thoḵ uni gwo mo ki: Ka jiŋ gana/ ka jiŋ gana/ aha/ ṯora um gwo mo ki: Ya/ moli toŋ kamu/ mii ki bwam piti mo hili jasi a’di jin p̱arkina a’di Com e mo mmomii mo. Haali/ to yin jin miikina a’di mo tani wakan si’da/ Ya/ a’di miiki uni mo be.

²⁰Haali/ Ababa a’di enki Ya/m piti mo dhali ṯor a’di aris to ’baar mo a’di jin miikina a’di ki is piti mo. Dhali adhan mii kun can kun boli gwansan e mo tani mina a’di iṯor a’di i e mo ki um mini mer mo be.

²¹Haali/ me’d jin ’de’kkin ma Baba uni kun wukin mo dhali c̱i uni moŋ’koki/e mo tani wakan si’da/ Ya/ c̱iki uni moŋ’koki/e mo uni gun ona bwa a’di mo be.

²²Dhala Baba diki dwall jan ṯal ’deŋ kamu/ gwo mo, hili aris gwon dwalli ’baar mo tani c̱ikina a’di Ya/ mo be ka ris ’kwani ’baar mo mini taḵ Ya/ mo,

²³ma me’dyin si’da/ taḵkina uniya Baba mo. A’di jin diki taḵ Ya/ mo tani diki taḵa Baba mo a’di jin hashki a’di mo be.

²⁴Ka jiŋ gana/, ka jin gana/ aha/ ona um gwo mo ki: A’diyin jin ciḵki gwom pem mo dhali gam a’di is mo a’di jin hashki aha/ mo tani a’di ita’d gi mondiki/e ki sule/ sule/ ya ye ’ba/ mo be. A’di midi diki yayu/ e miiwaḵ gi gwon dwall mo hili a’di ’ciṯẖki’d mo ’peni mowu mo ntagi moŋ’koki/e ki sule/ sule/ ya ye ’ba/ mo be.

²⁵Ka jiŋ gana/, ka jiŋ gana/ aha/ ṯora um gwo mo ki: Mo midi p̱u’du/ mo dhali a’di diki’d shwane/ mo, ki uni kun wukin mo mini ciḵ ’twa/ gi Ya/ ma Arumgimis mo, dhali uni gwansan kun ciḵkin mo tani mini ’ko ki e mo be.

²⁶Haali/ me’d jin tan ma Baba gi mondiki/e e is piti mo tani wakan si’da/ a’di c̱iki a’di Ya/m piti mo mmota gi mondiki/e e is piti mo be.

²⁷Dhali a’di c̱iki a’di moshirri ’baar mo mmotor mii ’twa/a ’cesh gi gwon dwall mo haali/ a’di ta Ya/ gi ’Kwani mo be.

²⁸Dhalku/ ki mer gom gwo yansan mo haali/ mo midi p̱u’du/ mo ka ris ’kwani ’baar mo kun ’kokin mo e jis jwa mo tani mini ciḵ ’twam piti mo be

²⁹dhali uni mini piyu/ ka pije/ mo uni gwansan kun miiki miim ’boron mo e mo jin pinu e moŋ’koki/e mo dhali uni gwansan kun miiki tonthus mo tani uni mini piyu/ e momiiwaḵ mo be.

³⁰Aha/ mola toŋ kamu/ mii ki moshirr pem mo. Me’d gwo jin ciḵkika/ mo tani aha/ ki dwall gwo mo. Dhali gwon dwall pem kun dwallka/ mo tani ta kuŋ ḵar/e mo haali/ aha/ dinaki ŋap̱i mmomii ki bwam pem mo, hili jasi ki bwa gi a’di jin hashki aha/ mo be.

³¹Waḵki/ aha/ ona gwo gom is pem mo tani gwo jin ṯorka/ gom is pem mo tani diki ta jiŋ gana/ mo be.

³²Jamu/ diki’d jin ta’da man/o gwo gom aha/ mo dhali aha/ misha ki gwo jin ṯora a’di mo gom aha/ mo tani ta gwoŋ gana/ mo be.

³³Um hashki ’kwani eya Yohaan mo dhali a’di ta’da man/o gwo mo gom gwoŋ gana/ mo be.

³⁴Hili aha/ dinaki bu’th gwo jin ṯoru ’peni ’kwani mo, hili aha/ ona gwo yansan ki um minu woṯẖ mo be.

³⁵A’di ta o’d jin shwaki’d mo dhala lamba/ jin ’twaḵki mo mo, dhali um okina bwa mo mmo’kuny bwa mo mmo’ko ari’ceenne/ mo e moŋkush piti mo be.

³⁶Hili gwo jin okunu mo gom aha/ mo a’di ica’d mo mmobol gwo ma Yohaan e mo. Haali/ aṯu’c jin c̱ikin ma Baba aha/ mo mmothim a’di mo, aṯu’c gwansan gana/ kun dika/ mmomii mo tani uni ta iman/o gwo gom aha/ mo ka Baba a’di hashki aha/ mo be.

³⁷Dhali Ababa a’di jin hashki aha/ mo tani a’di ki is piti ta’da man/o gwo gom aha/ mo. ’Twam piti ’kona um ki ciḵ ki sule/ sule/ mo dhali ayir/em piti ’kona um ki p̱ar e ki sule/ sule/ mo be.

³⁸Dhali um ’kon kan ki dar gi gwom piti mmodi e um mo haali/ um ’koki gam a’di gwo is mo a’di jin hashkina a’di mo be.

³⁹Um ŋap̱kin ki burbur e bwaŋ Gwo ma Arumgimis kun ’kwarkunu mo haali/ um ṯoshkin ki um ta gi moŋ’koki/e ki sule/ sule/ ya ye ’ba/ mo e uni mo. Dhali uni itana man/o gwo gom aha/ mo be.