Ioanej 5:1-39

¹MURIN mepukat ran lapalap eu en Juj oko pwaida; Iejuj ap kotilan Ierujalem.

²Len pil eu mi Ierujalem impan im en jip, me ad a Petejda ni lokaia en Ipru; im limau mi impa,

³Me jomau toto mi lole: Me majkun, o me danidan, o me motor mia, auiaui lao pil o pan mokimokid.

⁴Pwe akai anjau tounlan amen kin koti don le o kamokideda pil o, a meamen me madan tion maj nan pil o ni a mokimokid, iei me kin maureda jan a jomau kan karoj, me mi re a.

⁵A aramaj amen mia, me jomauki par jileijokwalu.

⁶Iejuj lao kotin majani men et a wonon, ap kotin mani, me a wonon anjau warai, ap kotin majani on i: Koe jo men kelailada?

⁷Ol jomau potoan on i: Main, jota nai aramaj, me pan wa ia di won ni pil o anjaun a mokideda. Pwe ni ai kokodi, amen kin madan mo i.

⁸Iejuj ap kotin majani on i: Uda, ale ki om, kokowei!

⁹Aramaj o ap madan kelailadar, kida ki e, alu wei, a ran o ran en japat.

¹⁰Juj oko ap indai on me kelailadar: Ran wet ran en japat. A jota pun koe en wewa jili ki om.

¹¹A japen irail: Me kakela ia da, majani on ia: Ale ki om koko wei!

¹²Irail ap kalelapok re a: Ij aramaj o me indai on uk: Ale ki om kokowei?

¹³A me kelailadar jaja i, pwe Iejuj kotila janer, pwe pokon mi waja o.

¹⁴Kadekadeo Iejuj kotin diaradar i nan im en kaudok o ap kotin majani on i: Kilan, koe kelailadar, koe der pil wia dip, pwe me jued kot jan maj de ko don uk!

¹⁵Aramaj o ap koieila, kaireki Juj oko, me Iejuj kakeladar i.

¹⁶I me Juj oko ap raparapaki Iejuj, o majamajan, pwen kamela i, pweki a kotin wiadar meakan ni ran en japat.

¹⁷Iejuj kotin japen irail: Jam ai kin dodok kokodo, a nai pil ian dodok.

¹⁸I me Juj oko ap majamajan melel, en kamatala i, pweki a kotin kawela ran en japat o pil majani, me dene Kot Jam a, o a kaparoki on pein i Kot.

¹⁹Iejuj ap kotin japen majani on irail: Melel melel I indai on komail, a jota kak, Na en pein wia meakot, pwe i eta, me a kilan ren Jam, me a wiada. Pwe me a kin wiada, iei me Na pil kin wiada.

²⁰Pwe jam pok on Na o kajanjale on i karoj, me pein i kin wiada. O a pan kajale on i wiawia kan, me lapa jan met akan, pwe komail en puriamui kila.

²¹Pwe duen Jam kin kapikapirida me melar akan, kamaur ir ada, iduen Na pil kamaureda me a mauki.

²²Pwe jota me Jam kin kadeikada, pwe a kotiki on Na kadeik o.

²³Pwe karoj en wauneki Na, dueta ar wauneki Jam. Me jota wauneki Na, jota kin wauneki Jam, me kadar i dor.

²⁴Melel, melel I indai on komail, meamen ron ai padak o pojon, me kadar ia do, a aneki maur joutuk. A a jota pan panalan kadeik o, pwe a japale jan mela japal on maur.

²⁵Melel, melel I indai on komail, anjau kokodo, iei a leler, me melar akan pan ronada nil en Nain Kot, a me ronadar pan maureda.

²⁶Pwe duen Jam a udan maur, iduen a ki on Na, en pil udan maur.

²⁷O a kotiki on i manaman, en kaunda kadeik o, pweki Nain aramaj i.

²⁸Der puriamuiki met, pwe anjau kokodo me irail, me mi nan joujou kan, pan ron nil a.

²⁹Irail ap pan pwarada: Me wiadar me mau, en maureda, pwen memaur, a me wiadar mejued, en maureda, pwen panalan kadeik o.

³⁰Jota me I kak wiada jan pein nai, duen me I kin ron, iduen I kin kadeikada, o ai kadeik me pun, pwe I jota kin rapaki injen ai, pwe kupur en i, me kadar ia do.

³¹Ma I kadede pein nai, ai kadede jota melel.

³²Amen me kadede ia, a I aja melel, me a kadede ia me melel.

³³Komail me ilakilan Ioanej, i ari me kadede melel.

³⁴A I jota kin ale kadede ren aramaj, a iet me I indawei, pwe komail en dorola.

³⁵I me jer umpul o marain eu, a komail men perenki a marain anjau kij.

³⁶A ai kadede me lapa jan en Ioanej. Pwe dodok kan, me Jam o kotiki on ia, I en kapwaiada, iei dodok kan, me I kin wiawia, me kadede ia, me Jam kadar ia dor.

³⁷A Jam, me kadar ia dor, pein i kadede ia. Komail jota ronadar nil a, o jota kilan mom a.

³⁸O a majan jota kin kot re omail, pwe komail jota pojon, me a kadarador.

³⁹Komail kin kalelapok nan kijin likau kan, pwe komail lamelame, me maur joutuk mi lole. Ari, iei irail, me kin kadede ia.