Yoane 14:5-21

⁵Ana Tom̃as piun petania, pisape “Sup̃e, imimi memninue ga lele nap̃a ko opisa ke osape ova ea, ana sanape ne yoko mekilia mrapa na vaen ea?”

⁶Ana Yesu pisape “In na nepe purp̃es nen mrapa, in na nepe purp̃es nen lelagaena, in na nepe purp̃es nen malena. Pe yar re tai kilia va ma puna ne Ata sa ve kom re pun inu.

⁷Visae amiu apisu kilale inu, asape in na nepe ai, naga sa ga nap̃a apisu kilale m̃ena Ata. Ana nanagane, amiu apisu ke pa naga narui, sane siar na ne p̃ane, amiu akilia naga ve lelaga.”

⁸Ana Pilip piun petania, sape “Sup̃e, sur ne naga ke nene narui nap̃a sinemiminia, mesape mevisu Arimata. Awis, sa ko na ovisa lologia li naga van imimi, yoko mekekaran vap̃isi.”

⁹Ana Yesu pisatam̃ea, pisape “?Pilip, nesike nemio amiu tol kas via rui, ana ko pe opisu kilale ruru re in poli wa? Sa nap̃a nepisa ke pa rui, yar nap̃a pisu inu, naga sa nap̃a pisu ke pa Ata narui. ?Ana sanape na ko opiun ke sina ga osape nevisa lologia li Ata nae ma e peni van amiu?

¹⁰?Ko na omlelaga sane inu, in na e Ata, a Ata e inu, po ko na pe omlelaga re e poli? Visena la nap̃a nepisa ke pan amiu la, pe sa re nap̃a inu ga taaga ne nepis ke e kiau kia poli, ana Ata nap̃a teke e inu naga kila ke kiena yum̃aena la nene pimi p̃arpoyo e inu.

¹¹Popon amiu alelaga e sur la nap̃a nepisa, sane in na e Ata, a Ata na e inu. Visae ve alelaga re e inu vanon ga kiau visena la nene, monar alelaga ga vanon yum̃aena la nap̃a amiu apisu in na nekila ke pa rui.

¹²“Nepisa pe lelaga pan amiu, sane yar nap̃a sa lelaga e inu, yoko naga m̃ena kilia kila yum̃aena la sane in na nemiyum̃aen ke ne. Yoko neligan si yo neva si puna ne Ata, ana siraunia neligan Ninuna vitomi, ana naga kilia kila kile kerkeviu la sanene, taulu nap̃a amiu apisu pa rui.

¹³Nepisaar pan amiu, sane sur ya ne aviunia e kiau kia, yoko in na nekila ga van amiu. Yoko nekila ga ve sanene vam amiu, vena kilaen kia kiena ne Ata naga kilia va laa metava ve keviu likan amiu, e yum̃aena la nap̃a inu, sane narina, nemiyum̃aenia.

¹⁴Sanene na, sur ya nap̃a aviun tan inu, yoko nekila van amiu.”

¹⁵Ana Yesu pisa m̃ena pan imimi, pisape “Visae amiu sinemiu sii inu pe lelaga, monar auarar ruru kiau navisaluaena lala.

¹⁶Yoko in na ve nesu re si nemio amiu, ana yoko neviun tan Ata vena ligan yar tap̃ena tai vim kus leleu vena iila amiu. Naga nap̃a yoko imi, yoko sulue ga amio amiu,

¹⁷naga pe Ninuna na visawalen visena lelaga. Yeririna na yemalolo na yomarava nini tap̃atete atol naga, vanon tap̃atete akilia avisu kilale naga, pe akilia re nena, ana yoko amiu akilia ruru naga vanon naga ke narui nap̃a amio amiu nanagane, a yoko sike lue ga e amiu.

¹⁸“Kiau nalogena lala, tap̃atete neligan kare amiu nap̃a asum̃a sane ninuyu ga la poli. Peraga, yoko nowasup̃e si neimin amiu.

¹⁹Narin aora teke ga wa, pe piavi re nena, yoko yeririna na yomarava nini tap̃atete avisu in sina. Ana amiu ga yoko avisu nap̃a in na nemal sina ga, ana vanon nap̃a nemal, amiu m̃ena yoko amal.

²⁰E legiena nene nap̃a avisunu nemal sina, amiu akilia sane in na e Ata, a amiu e inu, a in na e amiu.

²¹Naga nap̃a sinena sii inu pe lelaga, naga pe naga nap̃a p̃uarar ruru kiau navisaluaena lala a mlogear la. Naga nap̃a sinena sii inu sanene, yoko Ata sinena siia, amio in m̃ena sineu siia, nakekaten ke naga vena nekila naga kilia inu laa sane.”