Huan 14:5-21

⁵Kagi ni Tomas kuwo kandin, “Buyag, waro koy mataga ko hondoi ka ogdolog. Ogmomonu koy naan,” kagi rin, “oyow ogpakabatuk koy to dalan nu?”

⁶Kagi ni Hisus kuwo kandin, “Koddi ka dalan woy koddi ka kamalogotan, woy koddi ka ogligkatan to kouyagan now. Waro agad hontow no ogpokohondio to Amoy ku no Magboboot ko kono ogbayo koddi.

⁷Kuntoon, su nataga kow on man koddi, songo ogkataga kow on porom to Amoy ku. Nò, ligkat kuntoon no pigtokod now on ka Amoy ku woy nakakita kow on kandin.”

⁸Kagi ni Pilipi kuwo kandin, “Buyag, ipapitow nu kanami ka Amoy nu no litos on ian kanami.”

⁹Nig-inso ni Hisus kandin, “Pilipi, nalugoy ad kai to kaniu no wara a now pad matagoi? Sikan no otow no nigkita koddi songo nakakita to Magboboot no Amoy ku. Manio to sikan pad atag ka kagi nu to, ‘Ipapitow nu ka Amoy nu?’ ”

¹⁰Woy nig-inso si Hisus to, “Waro ka naan mogtuu, Pilipi, to Amoy ku woy sikoddi, sagboka ro ka lawa noy? Waro mogligkat to koddi no goinawa ka kagi ku kaniu; nigligkat to Amoy ku no duon kai to koddi. Kandin ian ka ligkatan to oghimuon ku.

¹¹Tuui now ro to sikoddi, duon a to Amoy ku woy ka Amoy ku, songo duon kai to koddi. Ko kono kow ogtuu to soini, tuu kow on ian koddi tongod to mgo koin-inuan no pighimu ku.

¹²Malogot soini ignangon ku kaniu,” kagi ni Hisus. “Ka sikan no otow no ogtuu koddi, ogpokohimu to ogkounawa to koddi no oghimuon woy labow ka kandin no oghimuon su og-uli a dio to Amoy ku.

¹³Agad nokoy no ogbuyuon now koddi, ko oghingaranan now ka ngaran ku, oghimuon ku soini oyow ogkasayo ka Amoy ku pinabayo koddi no anak din.

¹⁴Ko ogbuyu kow, agad nokoy to koddi no ngaran, oghimuon ku soini.”

¹⁵“Ko duon goinawa now koddi,” kagi ni Hisus, “ogtumanon now ka mgo insugu ku kaniu.

¹⁶Ogbuyu a to Amoy ku oyow ogbogayan kow to duma no Talagbulig no ogdurumaruma kaniu taman to waro katamanan.

¹⁷Kandin ka Gimukud to Magboboot no ogpasabut kaniu to malogot bahin to Magboboot. Kono ogpakatinawo kandin ka mgo otow no wa nigtuu koddi kai to soin no kalibutan su kono ogpakakita kandin woy su waro dan tokora kandin. Di sikaniu, ogtokoron now ro su og-ugpo man kai to goinawa now no kono ogkaawo.”

¹⁸Kagi pa ni Hisus, “Oghipanow a di kono kow ogbalagaron no waro duma now; oglibong a ro kai.

¹⁹Konad on no malugoy no kono ogpakakita koddi ka mgo otow no waro nigtuu. Di sikaniu, ogkakitaan a now ro. Woy su nouyag a man, songo ogkouyagan kow.

²⁰Ko ogpokouma ka allow to igkootawi ku to kamatayon ku, ogkataga kow on to salupung a to Amoy ku. Woy ogkataga kow to songo unawa ka nasalupung kinow ro.

²¹Sikan no mgo otow,” kagi ni Hisus, “ko ogtinawoon dan ka mgo insugu ku woy ko ogtumanon dan, sikan ian ka mgo otow no duon goinawa ran koddi. Ka sikan no mgo otow no duon goinawa koddi, songo duon goinawa to Amoy ku kandan. Agad sikoddi, dakol ka goinawa ku kandan woy songo ogpatokod a kandan.”