Jon Nandaꞌafi 14:5-21

⁵Tomas nahaliꞌana naꞌi, “Dembinai, afaꞌ owaꞌ ogawaia inaꞌ nefeꞌ ani? Afaꞌ ina ogawa ufiaꞌw akwamba inaꞌ naꞌi negafeꞌakwi.”

⁶Eaꞌ Jisas naꞌipana naꞌi, “Aeꞌ atowe ufiaꞌw kofagewe ma basef endilisifi feloma ambal namili. Owaꞌ anin epen laꞌifina nefeꞌ negatagama Ahame anoꞌw ufiaꞌwa, owaꞌatin. Eaꞌ aeꞌ atowe.

⁷Iꞌi ipaꞌ pegawa aeꞌ, Pegawa Ahame aeꞌanai wapani. Eaꞌ deiꞌ apatolona. Deiꞌ atef ipaꞌ patolona pegawana.”

⁸Filip naꞌipana nahaliꞌana naꞌi, “Dembinai, inaꞌ himbaꞌmafa Ahamena ineꞌinai afaꞌ ma isimba eaꞌ sondahama afaꞌ.”

⁹Eaꞌ Jisas naꞌipana naꞌi, “Filip, nogota eaꞌ lautai ape agalomepa, inaꞌ owaꞌ ataꞌ negawa eaꞌ? Epen ami nagati aeꞌ eaꞌi, anin aꞌ nati Ahame aeꞌanai wapani. Deiꞌ maina inaꞌ ataꞌ nagaꞌi, aeꞌ igihimbaꞌmepa Ahame ipaꞌ?’

¹⁰Inaꞌ nahapifa aeꞌ ma negawa aeꞌ aloma Ahame afaꞌ atotofa, aeꞌ ape anen, anen nape aeꞌ, aꞌa owaꞌ? Basef aeꞌ agasiꞌipafi, ifimba aeꞌ ina andaꞌef okom aeꞌami atom, owaꞌ. Ahame nape aeꞌ eaꞌ anen atona nandaꞌ maol ananini hiani.

¹¹Ipaꞌ pindahapifa basef ifimba. Aeꞌ ape Ahame, Ahame nape aeꞌ. Iꞌi owaꞌma, ipaꞌ ukup pendapoma maol banagani hiani andaꞌani. Ipaꞌ piti maol inimba, pindahapifi.

¹²“Basef endilisifi atif deiꞌ aꞌipipa. Epen ami nigahapifa aeꞌi, maol hiani deiꞌ andaꞌani, anin wapani atiasi nendaꞌan. Ama anaf nendaꞌ maol luꞌwani aꞌowaꞌ nikilaꞌ maol aeꞌani. Deiꞌ main? Aeꞌ efeꞌma Ahame.

¹³Hiahawes hiasi ipaꞌ pendabeten pigahaliꞌanasa agol aeꞌagilii, atiasi aeꞌ indaꞌasi. Ama Ahame a nogofaꞌ agol luꞌwagilima maol aeꞌ Nogamana ananiwai atiasi indaꞌani.

¹⁴Hiahawes ipaꞌ pigahaliꞌ aeꞌmasi ma agol aeꞌagili, pihapifi endilisi, daoꞌ atiasi indaꞌasi.

¹⁵“Iꞌi ipaꞌ ukup piꞌi aeꞌ endilisi, daoꞌ ipaꞌ pindagiꞌma muꞌuli aeꞌani andeandeꞌ.

¹⁶Ama atiasi ihaliꞌ Ahame, ma nogasiꞌipai anona notopalopepa nogowaꞌ banagaipai. Anen nope nogaloma ipaꞌ lifilafi dondoli.

¹⁷Anamba Ambal buꞌunai Godi nagaꞌi basef endilisifii. Esis amam nematawa sagaila waf itapafi ina atiasi sotolona sogawana sofaꞌana, owaꞌ. Apaꞌ ipaꞌ pegawana eaꞌ nape nalomepa, eaꞌ atiasi aꞌ nuwis nope nomon opalef ipeꞌilimbi.

¹⁸Aeꞌ ina aꞌ ikwahipa tol pepe dowaf, siꞌi awasi isimba alifisi ahasas mamasas akasi, owaꞌatin. Atiasi aeꞌ igafiꞌmipai.

¹⁹Nogota kwaiaꞌuta esis amam nematawa sagaila waf itapafii ina atiasi sotolowe wapani, owaꞌ. Apaꞌ ipaꞌ pigatolowai. Aeꞌ ape namowe ambal namili, eaꞌ naꞌamba atin ipaꞌ pepe namipa ambal namili wapani.

²⁰Ama nemaf afamba ipaꞌ apegawa aeꞌ ape Ahame, ape nomona ipaꞌ, ipaꞌ pape aeꞌ.

²¹Epen ami negefaꞌ muꞌuli aeꞌani nigiꞌmana nigailan andeandeꞌi, anin aꞌ okom maimaila aeꞌ endilisi. Atiasi Ahame aeꞌanai okom mila anin. Eaꞌ aeꞌ wapani okom mimilan anin eaꞌ etaga endawalapa anin alihiwi.”