Ioni 14:5-21

⁵ʼInega Tomasi Ieisu ʼinaya vonaya, “Kaiwabu, imaʼa ge ada alamania maʼinaya utautauya, ʼinega maʼoda ʼeda nana ana alamani ʼaiqei?”

⁶ʼInega Ieisu vonea vonaya, “Yaʼa ʼEda nana be Vonahaqiaqi ta wese Yawai ʼiuna. Ta ge taha toga ana fata be nalugu Tamagu ʼinaya mali ʼedega, ta ʼesi yaʼa agu ʼaidega otaqa ʼiguyega nalugu.

⁷ʼEguma oʼa uda alamania yaʼa togama, ʼinega wese Tamagu uda alamania. Ta ʼesi tuta baʼe ʼinega niʼau ualahalamania, ta wese niʼau uʼiteʼitea!”

⁸ʼInega Filifi vonaya, “Kaiwabu, Tamau nana una veʼitema ta matamega ana ʼitea, ʼinega benaʼe taʼiwa ta ge wese taha tolaʼai weaqina ana vetalaʼaieu.”

⁹ʼInega Ieisu veʼiea vonaya, “Filifi, yaʼa omiʼa maega tuta kuena katoatoa, ta nage oʼa nawale ge uda alamanigu, waisa? Ta ʼeguma taha toga yaʼa niʼa ʼitegu, e ʼinega tauna wese Tamagu niʼa ʼitea. ʼInega tolaʼai weaqina uvonaya, ‘Tamau uveʼitema’?

¹⁰Nage ge uda vetumaqanegu vonigo yaʼa be Tamagu kavona ʼaidegama, ge taha ada vedumaduma? Ta baʼe egu vonayavo ʼiuya ge taugumo egu nuenuega eda vonavonayedi, ta ʼesi Tamagu mayawaina ʼiguya toatoa ena nuanua viaviaqia ʼiguyega.

¹¹Ta tuta nana yavonevoneu vonigo yaʼa be Tamagu kavona ʼaidegama ʼinega una vetumaqanegu. Ta ʼeguma ge au fata be baʼe vona nana una vetumaqanei, ʼinega luaqiaqieu be una vetumaqanegu egu viaqa ʼebenuavoqana be viaqa waiwaidi ʼidiega.

¹²“Yavona aqiaqiemi, ʼeguma taha toga vevetumaqanegu ʼinega tauna ana fata egu viaqa waiwaidi wese naviaqidi. Ta wese ana fata viaqa waiwai vaʼinedi naviaqidi, ta ʼabiboda egu viaqayavo, mana yaʼa yatautauya Tamagu ʼinaya.

¹³Ta ʼeguma agu wawega toyani weaqina ona venoqiegu, ʼinega yaʼa ena veʼiea, mana yaʼa egu viaqayavo ʼidiega Tamagu awatubo lobelobea.

¹⁴Vonahaqiaqi, ʼeguma yani taha taha weaqina agu wawega ona venoqiegu, e ʼinega yaʼa wese ena veʼiea.

¹⁵“Ta ʼeguma omiʼa oveveyolubegu ʼinega tolaʼai niʼa yavonayedi ʼimia ona matayagedi.

¹⁶ʼInega Tamagu ena venoqiea ta Toiula taha wese navetunei namai ʼimia ta tuta qabuna maega ona toatoa,

¹⁷ta tauna vonahaqiaqi Niboanina. Ta bwaʼobwaʼo ana tomotauyavo Niboani nana ge ina ʼawahaqiaqiei, mana ge ida ʼitei ta ge ida alamania. Ta ʼesi omiʼa niʼa oalamania, mana tauna omiʼa maega otoatoa, ta wese tauna giwalimia ʼenoʼeno.

¹⁸Ta yaʼa ge wese ena nogemi be ona vetamatama geqa, ta ʼesi ena mai ʼimia.

¹⁹Tuta kukusana ʼinaya totoa bwaʼobwaʼo ge wese ina ʼitegu, ta ʼesi omiʼa ona ʼitegu, mana yaʼa ena yawaha ʼevivi ta ʼinega omiʼa wese mayawaimi ona toatoa.

²⁰Ta tuta nana ena yaʼitoto ʼevivi ʼaligega, ʼinega omiʼa ona alamani aqiaqiea vonigo yaʼa be Tamagu ʼaidegama, ta wese omiʼa be yaʼa ʼaidegada.

²¹Ta tomeqabu egu vonayavo ivelumatamatayagedi taudina wese iveveyolubegu. Ta Tamagu naveyolubedi, mana taudi iveveyolubegu, ta yaʼa wese ena veyolubedi. Ta tauguyega ena veʼita ʼifoqeyegu taudi ʼaidega ʼaidega matadia.”