SAN JUAN 14:5-21

⁵ꞌBa Tomás kitsure: —Naꞌen, bi ꞌyee̱ ñá= teꞌmi. ¿Jótsaꞌen xiani̱ ndiyo?

⁶ꞌBa Jesús kitsure: —An= ña̱ ndiyo ꞌba an= ña̱ kjuakixiu ko kjuabenichun. Niꞌyá ma fechu ña tijña Naꞌenchana tsa bi ngatꞌana̱.

⁷Tsa ꞌyaxkunnuu̱, ꞌba=nde xiaxkun Naꞌenna̱. ꞌBa ꞌnda ngandaꞌe je ꞌyaxkun, ꞌba je kichutsejenꞌo.

⁸ꞌBa Felipe kitsure: —Naꞌen, takunii̱ Naꞌenchana ꞌba tu ku̱annini̱ kibiu.

⁹ꞌBa Jesús kitsure: —Je ndaꞌe tejñajin_nuu̱ ꞌba tojo kje ꞌyaxkunjínnaa̱, Felipe. Xi tjibena̱, ꞌba=nde tjibe Naꞌenchana. ¿Ánñu ꞌba teꞌmininaa̱: “Takunii̱ Naꞌenchana”?

¹⁰¿A bi makjainri nga an tejñajin_ra̱ Naꞌenchana ꞌba Naꞌenchana tijñajinna̱? En xi texin_nuu̱ bi kuenda tsaꞌan tenchjaa̱. Tusa Naꞌen xi tijñajinntsjaina̱, kui= xi titsaꞌen xa xi tseꞌe.

¹¹Ngatjamakjainnu nga an tejñajin_ra̱ Naꞌenchana ꞌba nga kui tijñajinna̱. ꞌBa tsa tsajain, nisi tu ngatꞌare xa xi tetsaꞌaa̱n ngatjamakjainnu.

¹²’Kjuakixi= xi texin_nuu̱. Xi ku̱akjainre ngatꞌana̱, ndekui xa saꞌenni joni xi tetsaꞌaa̱n. ꞌBa ngisa= yaꞌe ngisa xa xi saꞌen xutabiu, ngatꞌa an tefi=ña̱ ña tijña Naꞌenchana.

¹³ꞌBa ngayéje xi xjoꞌo ngatꞌare jaꞌenna̱ sja_nuu̱, tuxi sꞌe̱jñatsejenni kjuajere Naꞌenchana ngatꞌare Kiꞌndiu.

¹⁴Tsa tjin xi xjoꞌo ngatꞌare jaꞌenna̱, sja_nuu̱.

¹⁵’Tsa nimejénnuu̱ an, tikꞌetjusun kjuatexumana̱.

¹⁶ꞌBa an skuiꞌa_ra̱ Naꞌenchana, ꞌba kui sjanu ngijngu xi ꞌba nde kuasekonu ꞌba xi kꞌuejñajinntsjainu ngatsiꞌu.

¹⁷Kui= xi Isennixtjintsjere Naꞌenchana xi kuakutsejen mé= xi kjuakixi. Xuta ngasunꞌndebi bi ku̱an sakure, ngatꞌa bi be ꞌba bi bexkun ꞌyá= ni kui. Tunga jun, je ꞌyaxkun ꞌyá= ni kui, ngatꞌa kui= xi tijñajinnu ngatsiꞌu ꞌba jaskan kꞌuejñajinnu nga jngu jngu.

¹⁸’Bi sikꞌendu suba_nuu̱, kjuaꞌekun ngani_nuu̱.

¹⁹ꞌBa tu ngingutjun= ngisa tu je bi nde skuenina̱ xuta ngasunꞌndebi, tunga jun xianuu̱. Ngatꞌa tejñakunña̱, kui kjuañu ꞌba nde kuetsubakunñu.

²⁰Kui nixtjinbiu xio nga an tejñajin_ra̱ Naꞌenna̱ ꞌba jun tetsubajinnuu̱ ꞌba an tejñajin_nuu̱.

²¹Xi kjuaꞌatjo kjuatexumana̱ ꞌba sikꞌetjusun, kui= xi tsimejénna̱. ꞌBa xi tsimejénna̱, Naꞌenna̱ ꞌba=nde simején ꞌba ꞌba=nde simijía̱n an ꞌba kuakutsejen_ra̱ yojona̱.