Yittsadhaanasa Waadimano 2:7-40

⁷Kattsi targadhayse yin ke giyade: “Marrato! Igina giyayna eena wul Galila eenatayu?

⁸Ta keeda wodi wul wonnon aponka kenin giyenka woda qanse. Yin hamin ko maataa?

⁹Wodi Bharte eenabee, Meedon eenabee, Elaam eenabee, Mesbhethoomia eenabee, Yiwda eenabee, Qebhedoqia eenabee, Bhanthoos eenabee, Isiya eenabee,

¹⁰Pirgia eenabee, Bhinpilia eenabee, Gibth eenabee, Qerena katamansa gasante dohon Liibia eenabe; pir Roome katamara nivaana Ayiwd eenabee Barjodar woylamin qajintanka Ayiwd eenadar ardaana eenabe;

¹¹tapir Qerthes eenabee, Areb eenabe dahayse Barjosa gebhon waadimanam wodi wul wonnon aponka kenin giyenka qansite wo dahade” ke hamade.

¹²Eena wul targadhayse yinin giyen bashadhayse, kinka kikal “Kono yer hare?” ke hamade.

¹³Waani eeno ko hanna, “Wucadhenam wucayse ke bardhade” hamayse keam ko bagade.

¹⁴Ogo wodanka Bhethiroos tabhi kalaana Kiristoos yisa tarjamonnante kinin yittsaanabesana kinka woyayse, upsi gebhika eenana yin ki giyade: “Yedi Yiwda peen eenabee Yerusaalem gidir dahaana eena wulbeto, inin yena giyenam qansee; payya hayayse dhesee.

¹⁵Yenin qaabendettsi eena igina bardhaanatehe; peen sedhaysaka savaat makkamne.

¹⁶Ko dahaannaar ta ko yenin qansayno dhalqino ena Barjokala qansayse eenna giyea Yuveelin giyoonone:

¹⁷‘Barjo yin ki giyade: “Macchin rooroaka yin koda maate: Een wuldar isa Manpasinam ida laale. Naana yenna annginabee maanabe Barjokala qansayse eenna keda giye; barshina naana yennaar Barjoyn kena dhohon shedintonam keda haape; yesa donzanaar haama keda haape.

¹⁸Igina rooronaka annginabee maanabe ina waadimayna eenadar isa Manpasinam ida laale; kediar ikala qansayse eenna keda giye.

¹⁹Tura cecinte tarshen yerinaam, mia peentear milkitinam ida dhee; zombhibee, nuubee, cubabe koda haapadhe.

²⁰Kattsi gebhi maatayno tarshayno Barjosa rooronin nivonsa birayse hayno thipa ko thipe, arpinoar zombhidettsi maatayse koda ookime.

²¹Barjosa naabenam eelayna wul dhaqa ke dhaqe” ki hamade’ hamayse ki giyade.

²²“Yedi Israveel eenato, upsina kinaam qansee: Yenin dhesendettsi Barjo Naazret ea Yesusbar yesa shaarinte kinin waadadhon kattsi tarshen yerinbee milkitinbe goynka Barjokalanka nivaa ea kinin dohonam yena ki tarjade.

²³Yesusam Barjo birayse kinin bhocchonbee kinin dhesondettsibe yena saskate kiam ko imbhade; yediar seeson eenasa aaninka kinin ziitadhoadettsi hayayse ye dettsade.

²⁴Barjoar dembhisa gaalenam bashayse diira kiam ki dhaasade; harrna hambhidianna, dembhinoar kiam yedayse kinin dhaabhoamadettsi marana damadehe.

²⁵Dawtaar kinnon goynsa yin ki giyade: ‘Barjoam rooro wul isa birante ida shede; imbesana kinka kinin dohonna gibazattine.

²⁶Ogonante isa woylammo ko wozadhade; isa atambhoar wozanka ko thoothade; pir isa waanoar Barjodar qaabe hayayse koda dee.

²⁷Harrna hambhidianna, isa sadanam diyaana eenayn dohon raqinte garattane; Gazaa hasa Naasaar kinin capoadettsi kiam hayattane.

²⁸Sadaka daadhensa goynam ina ha dhettsade; imbesana kinka hanin dohonna, ina wozanam hada thoose’ ki hamade.

²⁹“Imbanaanato, ena wosa eykea Dawt kinin diyonbee, kinin duukadhonbee, kisa duukinoar kinaka yekka wosa gasante dohonbeam qothimima yena ida giye.

³⁰Dawt Barjokala qansayse eenna giyea kinin dohonnabee, Barjo ‘Hasa muldhara hasa bitamon borkotondar ida wode’ hamayse malla kina yinin ardonam yinin dhesonnabe,

³¹birayse shedayse, Barjoyn yiam qadhaa Kiristoosam diyaana eenayn dohon raqinte kinin garoamadettsibee kisa waanar duukinte konin capoamadettsibe diira kinin dhaabhenam ki giyade.

³²Kaa Yesusam Barjo diira kiam ki dhaasade; yerin kosa wodi wul tarjana eenane.

³³Ogonante Barjo yisa mizaqimbar dheg dheg hayayse kiam ki wodade. Kisa Imbaa Barjo ‘Yena Manpas Gazanam imayda ime’ hamonam Yesus tiyayse ogo yenin haapenbee yenin qansenbeam ki laalade.

³⁴Dawt yina cecindar utadehe; ko dahaannaar Dawt yinti yin ki giyade: ‘Barjo isa Imbaana, “Haam jibbayna eenaam hasa hayamon demente inin hayenka yekka, isa mizaqimbar dooqaa” kina ki hamade’ hamayse ena ki giyade.

³⁶Ta keeda yenin ziitaa kaa Yesusam Imbaabee qadhadhaa Kiristoosbe kiam Barjoyn hayonam Israveel eena wul gon ke dhese” ki hamade.

³⁷Eenaar dhalqin ogoam yinin qansenka, yisa woylaminka kattsi atayse Bhethiroosbee waani Kiristoos yisa tarjamonnante kinin yittsaana eenabena “Imbanaanato, ta keeda yer har wo hayo?” kena ke hamade.

³⁸Bhethiroosaar kena yin ki giyade: “Seeson waadiman yennonam garayse Barjodar maatee; yesa seesonam yena shiishadhoadettsi yedi yesa meteka meteka Yesus Kiristoossa naabenka shiidhee; Barjo yena imayno Manpas Gazanamaar tiyeeda tiye.

³⁹Harrna hambhidianna, Barjo ‘imayda ime’ kinin hamon Manpas Gazano yembee, yesa naanabee, Imbaa wosa Barjo yikal kinin eelayna pegente dahaana eena wulbenane” ki hamade.

⁴⁰Bhethiroos thoothi kena yinin tarjenka, “Ko wodanka dahaana siyana eenadar niven Barjosa wacimera dhaqee!” hamayse keam ki kiilade.