Yipuru wangkapayiku 9:3-12

³Tiipulangka tjangi ngaranyingka wirriḻi mantarra kutjupangku waralyngarala yangatjunangi. Mantarra palula wirriḻi Katutjaku ngurra ngarangi. Ngurra palunya yaṉangu tjuṯangkuya yini yalatjiya watjalpayi, “Katutjaku ngurra yunngunya.”

⁴Ngurra palula tiipula puḻi kuultatjanu palyaṉutja ngarangi. Palulanguru kutjara puyu paṉṯi palyatjarra puyutjunkupayi Katutjaku. Tiipula palula yila pukutju yurrunpa palyaṉutja tjana ngaratjunu. Yurrunpa kuulta pangki nguwanpa tjana palyara pukutju palula tjayiṯiwana nganytjatjunu. Pukutjungka yunngu ngarringi tiitji kuultatjanu palyaṉutja, mangarri yini maanatjarra. Pukutju palula puḻi wirulypa kutjarra ngarringi, wati Yiranaku watiyaṯarra. Watiya paluru yirriṯi yukiritjarrarringu. Puḻi wirulypa kutjarra palula Katutjalu watjara wakaṉu.

⁵Pukutju palula katu ngarangi ilkari ngurrara nguwanpa kutjarra, kuultatjanu palyaṉutja yuṉpapula ngaparrku ngaranytjala. Katutjanya ngangkari tiṉatjarra nyinanytjakutupula ngaparrku ngarala nintiṉingi. Pukutjungka katu Katutjanya aḻṯurunytju nyinapayi. Paluru tjanampa kuya waṉipayi. Yalatji yulytja paluru tjana kalikingka ngarangi. Yulytja kutjupa tjuṯaṯarra palula ngarangi, yunngu. Ngayulu wiya nyurrangarrinya wangka yulytja palunyatjarra piyuku nintilku.

⁶Yulytja paluru tjana yalatji tjaatji kalikingka ngaranytjala tuḻkuku mayutju tjuṯa rawalingku palula tjarrparra waarrkarringkupayi, Katutjaku tuḻku palyalkitja. Katutjaku ngurrangka yunngulingku wiya tjana tjarrpapayi, Katutjaku ngurra ngururrpa kutjuya ngarala palyalpayi waarrka.

⁷Mantarra waralyngarala yangatjunanyingka wirriḻi wati kutju tjarrpapayi, tuḻkuku mayutju tiṉa. Paluru tjuṯangara wiya tjarrpapayi, warri kutjupangka warri kutjupangka kutju. Warringka kutjungara paluru tjarrpapayi. Tjarrparra pulukakuṉu ngurrka yintilpayi, Katutjalura kuya palumpaṉu waṉinytjaku. Ngaṉṯilpi tjanampa piyuku yintilpayi, Katutjalu yaṉangu tjuṯaku kuya waṉinytjaku.

⁸Katutjaku kurrunpangku nganaṉanya yalatji nintiṉi. Tjaatji kaliki yalatji ngaranytjala yaṉangu kuyakuya tjuṯa wiya kalikingka tjarrparra Katutjaku ngurra yunngukutu tjarrpapayi palula wangkakitja.

⁹Kaliki palunya kulira nganaṉa kuwarri tjukarurrungku kulintjaku. Nganaṉa tjaatji tiṉakutu kuka tjawirrilyi katirra ngaratjunkupayi, pungkula Katutjaku kutjantjaku. Yalatji tuḻkuku mayutjungku pungkula kutjantjala nganaṉa wiya Katutjaku kalyparringkupayi.

¹⁰Luwu yalatji tjawirrilyi Katutjaku katinytjaku ngaranyi. Luwu kutjupa tjuṯaṯarra ngaranyi yalatji. Mangarri pala tjuṯa kutjula ngalkuntjaku, kutjupa tjuṯa nganaṉa ngalkuntjawiyangku wantinytjaku. Kuka pala tjuṯa kutjula ngalkuntjaku, kutjupa tjuṯa nganaṉa ngalkuntjawiyangku wantinytjaku. Nganaṉa ngaatjanya kutju tjikintjaku kutjupa tjuṯa wiya nganaṉa tjikintjaku. Nganaṉa tjukarurrungku paltjintjaku, yaṉangu walytja. Luwu paluru tjana rawawiya ngaraku. Ngarala ngula luwu paluru tjana wiyarriku. Katutjalu nganaṉanya watjalku luwu kutjupawanalpi piyuku nyinanytjaku.

¹¹Kala, Yiitju Kurayitjanya kuwarri nganampa tuḻkuku mayutju tiṉa nyinanyi ngurra palyangka kutu kanyilkitja. Paluru ilkaringka tjaatji kaliki nguwanpangka tjarrpangu. Tjaatji kaliki palunya wiya yaṉangu manta ngurrara tjuṯangku palyaṉingi, Katutjalu palyaṉu.

¹²Yirriṯi tuḻkuku mayutju tjuṯa tjana tjuṯangara tjarrparra waarrkarringkupayi. Ilkaringka kaliki nguwanpa palula Yiitjunya kutjungara tjarrparra tjukarurru yanu Katutjaku ngurra yunngukutu nganampa kuya waṉikitja. Wiya paluru pulukakuṉu tjinguru nanikutakuṉu ngurrkatjarra tjarrpangu. Ngurrka walytjatjarra paluru tjarrpangu yurrunpa watiyangka waralyngarala ngurrka yintirra mirrirringkulaṯarra.