Yaburina 7:1-10

¹Dawudaa mawugan bɛtina, a naxan baxi Alatala xa Kusi Bunyamin kaana fe ra.

²Alatala n ma Ala, n bata n luxun i yi. N xunba, i yi n nakisi ne birin ma naxanye n fɔxɔ ra.

³Yaxune nama n yibɔ alo yatana, naxan ma se suxi mi xunbɛ.

⁴Alatala n ma Ala, e n kansunma naxan na, xa n sɔnna na a ra,

⁵xa n bata fe ɲaxin dɔxɔ muxun na, nxu nun naxan dɔxi bɔɲɛ xunbenli, xa n bata n yɛngɛfaan muɲa tɔɲɛgɛni,

⁶nayi, i xa tin n yaxune xa n kedi, e yi n suxu, e yi n mabodon, e yi n fatin lu saxi gbangbanni.

⁷Alatala keli i ya xɔlɔni, keli n yaxu xaɲɛne xili ma. Keli, n ma Ala, i sariya kɛndɛn sa!

⁸Siyane malanxin xa i rabilin, i mangayaan liga e xunna.

⁹Alatala xa siyane makiti. Alatala, i xa n ma kitin sa n ma tinxinni, bayo fɛ yo mi n na.

¹⁰Danna sa muxu ɲaxine gbalone ra! I xa tinxin muxune ratanga, i tan Ala tinxinxina, i tan naxan muxun bɔɲɛne nun sɔndɔmɛne rakɔrɔsima.