Mboe 7:1-10

¹Mboe ki Dabit Tomtom ta, ni zaana Kus mi uunu ipet la ki Benyamen. Iŋgal sorok sua pa Dabit, to Dabit itooro mboe tiŋgi. O Yooba, Anutu tio, nio aŋpase pu be we ur pio mi menderkaala yo. Uulu yo mi kamke yo pizin wal tau tiketoto yo i.

²Pa nio leŋ tomtom sa som. Sombe nu uulu yo som, inako timaŋga pio, mi titatutut yo kembei ta laion ma aŋsaana kat.

³Yooba, Anutu tio, nio leŋ uunu sa isaana som.

⁴Wal ta niamŋan ambuk sua be amlup yam ma amwe tamen na, aŋkam sanaana sa pizin som. Mi koŋ koi bizin tomini. Aŋkam kuumbu pa koroŋ kizin sa som.

⁵Mibe aŋkam mbulu sa ta kembei, na ambai be koŋ koi bizin tiketo yo mi tikis yo, mi tipalkeete yo su toono. Mi sombe tipasaana zoŋ ma aŋwe koroŋ sorok, ina indeeŋe men.

⁶Yooba, maŋga mi swe ketem malmalŋana ku pa koŋ koi bizin. Pa zin na, keten malmal kat pio. Anutu tio, loŋa mar mi uulu yo. Ur kadoono ndeeŋeŋana pa koŋ koi bizin.

⁷Lup zin tomtom su kerem uunu, mi mbulem su murim peeze kana ta imbot kor a, mi ur kadoono pizin.

⁸Yooba, nu itum ta tiiriŋana katuunu. Tana tiiri yo mi so kat ta kembei: Nio leŋ uunu sa isaana som. Nio tomtom ndeeŋeŋoŋ.

⁹Anutu, nu ndeeŋeŋom. Mi nu ta tirtiiri karkari ta boozomen lelen ma ŋgar kizin, mi ute zin lup. Yembut mbulu sananŋana kizin wal zorzooroŋan ma imap kat. Mi zin wal ta tikamam mbulu ndeeŋeŋana na, pombol zin.

¹⁰Anutu, ni iwe siŋgiao pio mi iporoukalkaala yo. Mi ni iuluulu zin wal ta lelen ŋgeezeŋan.