Yaburina 55:1-13

¹Dawudaa fala ɲaxumɛna, bɛti baane kuntigin xa. A xa ba kondenne ra.

²Ala, n ma maxandi xuiin namɛ. I nama i xun xanbi so n ma mawugani!

³I tuli mati n na, i yi n yabi. Xaminna bata n suxu han n kuisan

⁴n yaxune fala xuine fe ra. Muxu ɲaxine n yigbɛtɛnma, e n tɔrɔma. E bata xɔlɔ n ma, e yi n naɲaxu.

⁵N bata kɔntɔfili. Sayaan gbalon bata n xun matugan.

⁶Gaxun nun xuruxurunna bata n suxu. Gbalon yi n nabilin.

⁷Xa gabutɛɛn yi n ma nun alo ganbana, n yi tuganma nɛn nun n sa dɔxɔden fen.

⁸N yi n gima nɛn, n siga yire makuyeni. N yi lu burunna ra.

⁹N yi maratangaden fenma nɛn mafurɛn n keli foye gbeen nun gbalon bun.

¹⁰Muxu ɲaxine raxuya ayi, Marigina, e fala xuine yifu! Bayo, n gbalon nun yɛngɛn toma taani han!

¹¹Kɔɛɛn nun yanyin na, e taan nabilinma, hakɛn nun yɛngɛne nan taani.

¹²Kala tiin gboma ayi taani. Bɛsɛnxɔnyaan nun mayifuun nan taani.

¹³Xa yaxun nan tun yi n makonbima nun, n yi diɲama a bun ma nɛn. Xa n naɲaxu muxun nan tun yi a yɛtɛ yigboma n yɛ nun, n yi n luxunma a ma nɛn nun.