Pisalem 55:1-13

¹Meenei God, hagalongo mai gi dagu dalodalo. Goe hudee huli gi daha mo dagu dangidangi!

²Hagalongo mai mo di helekai mai. Au gu duadua i dogu de nnoomaalia.

³Au gu madagu huoloo i nia lee haga madagudagu dangada o ogu hagadaumee. Au gu beehi go digau huaidu ala e hai au haga huaidu. Digaula e gaamai gi di au di haingadaa; digaula e hagawelewele mai gi di au, ge hagadugina ginaadou au.

⁴Au gu madagu huoloo, di madagu o di made gu daamaha i ogu lodo.

⁵Di madagu mo di bolebole guu honu i ogu lodo. Au gu madagu huoloo.

⁶Au bolo gii hai hualaa ogu bakau be di mwuroi, gi maangi au gi daha, gii gida dogu gowaa e hagamolooloo iei au.

⁷Au ga maangi gi mogowaa loo, gaa hai dogu guongo i lodo di anggowaa.

⁸Au ga halahala dagu gowaa hagalimalima e bala iei au i di madangi damana mo di madangi gono.

⁹Meenei Tagi, hagahinihini ina nia helekai o ogu hagadaumee! Au e mmada gi nia daangada e hai be digau e dadaaligi nadau daangada, ge hagalongoaa i lodo di waahale.

¹⁰Boo mo aa nia haihai huaidu e hula e haganiga i hongo di abaaba di waahale deelaa, e haga honu di maa gi nia huaidu llauehe mono haingadaa llauehe.

¹¹Di haga mooho la i nia madagowaa huogodoo. I hongo nia ala guu honu i nia halahalau mo nia hagahuaidu.

¹²Maa nei bolo di hagadaumee e haganneennee au, gei au e manawa balabala hua ginai, gei di maa di hoo ni oogu ma ga haga balumee au, gei au e mee di hana gi daha mo mee.

¹³Gei di maa kooe dela go dogu ihoo ngalua mo dogu ihoo hagaaloho donu.