WALOMA 14:3-18

³Munhu yoja vinhu vose sambiyamzabuze ayo yoleka kuja vinhu vose, na munhu yoleka kuja vinhu vose, sambiyamtaguse munhu ayo yoja vinhu vose, kwavija Mulungu kamtogola.

⁴Avo gweye kwa munhu yalihi hata umtaguse mtumigwa wa munhu iyagwe? Mndewa wake mwenyego iyo yondayalamule kamba yadahe ama yalemewe. Na heyo kokwima, kwavija Mndewa Mulungu kodaha kumtenda yeme.

⁵Munhu imwe kogelegeza kamba zua dimwe ding'ala ng'hani kubanza zua diyagwe, na munhu iyagwe kogelegeza kamba mazua gose galinga. Kila munhu yawinze vija nzonzi zake vuzimulongoza.

⁶Awo womtambikila Mulungu mdizua kisinyo, wotenda avo sama ya kumuhishimila Mndewa. Vivija awo woja vakuja vose, woja sama ya kumuhishimila Mndewa, kwavija womgwelela Mulungu hewela. Na awo woleka kuja, hawaja sama ya kumuhishimila Mndewa na kumgwelela Mulungu hewela.

⁷Kwavija haduhu munhu mmwanza wetu yodaha kuwa mgima mkulonda mwenyego, na vivija haduhu munhu mmwanza wetu yodaha kudanganhika mkulonda mwenyego.

⁸Ihawa towa wagima, towa wagima sama ya Mndewa, na ihawa todanganhika, todanganhika sama ya Mndewa. Avo, ihawa towa wagima ama todanganhika, tweye twa wanhu wa Mndewa.

⁹Mkilamso kino, Kilisto kadanganhika na kuzuka giladi yawe Mndewa wa wose wadanganhike na wali wagima.

¹⁰Habali umtagusa ndugu yako? Ama habali umzabuza ndugu yako? Kwavija tweye tose tokwima haulongozi wa kigoda cha nhaguso cha Mulungu.

¹¹Kwavija yandikigwa Mzinyandiko Zing'alile, “Mndewa kolonga, ‘Nowalongela ikweli kamba kila vindi donifugamila, na kila lulimi lotogola kamba nie iyo Mulungu.’ ”

¹²Avo, kila munhu mmwanza wetu kozipeta mbuli zake mwenyego ha Mulungu.

¹³Avo, tuleke kuitagusa wenyego kwa wenyego. Ila zigalule nzewele zako, uleke kwika kikwangwazi ama king'hwaso mnzila ya ndugu yako.

¹⁴Novitanga na notogola mkuilumba na Mndewa Yesu kamba haduhu kinhu chochose kinyolodoke kihawa chenyego. Ila kamba munhu yahakigelegeza kamba kinyolodoka, basi kinhu hicho kinyolodoka ha munhu hiyo.

¹⁵Kamba ndugu yako yahanyunguala sama ya kija chuuja, hauli mdinoge. Sambiumbanange ndugu yako sama ya kija chuuja kwavija Kilisto kadanganhika sama yake.

¹⁶Avo sambimtogole kija kimgelegeza kamba kinoga kilongigwe kamba kiha.

¹⁷Kwavija Undewa wa Mulungu siyo kuja na kung'wa, ila kuwa bule uzenzeleganye, tindiwalo na ndeng'ha mgati ya Loho wa Mulungu.

¹⁸Kwavija munhu yoyose yomsang'hanila Kilisto muinzila ino, kotenda gamnogele Mulungu na kutogoligwa na wanhu.