Roma 14:3-18

³Tehuu mamanene bou! Hataholi salanik fo nameda naꞌa sudi hata, na, boso makadadaek hataholi fo ta nau naꞌa mbaa. Leondiak boe, hataholi salanik ta mana naꞌa mbaa, boso nafada hataholi mana naꞌa mbaa, nae, “Wei! Naꞌa mbaa ndia na, sala!” Huu Manetualain simbok nala dua sala, fo dadik neu Ndia hataholi nala!

⁴Mete ma o mambue sapa o tolanoo kamahele mala leondiak, na o dudua mae o ia, see? O maena hak hata, fo soli salak neu hataholi feꞌek? Hataholi ndia, o atam ta ndia! Ma ndia malanggan ta o. Te kada ndia Lamatuan naena hak, fo nafada ledo-ledo ndia tataon ndia, tetebes, do sala. Tehuu boso mafalende henin. Neu ko ndia Lamatuan, simbok hataholi ndia no malole, huu ndia Lamatuan nabeꞌi taon boe balakai, fo bisa nakatataka.

⁵Hambu hataholi luma fo laketun, lae, faik esa malole, neme fai feꞌe kala mai. Hambu hataholi feꞌek duduꞌa, nae, basa fai kala leo esak, ta hambu mana feꞌek. Hataholi esa-esak musi naketu aon, laꞌeneu dedeꞌak ndia.

⁶Mete ma hataholi duduꞌa nae, hambu faik fo lolen lena fai feꞌe kala, na ana tao leondiak, fo natudu hada-holomata neu ita Lamatuan. Hataholi manaꞌa mbaa, ma nanaꞌa feꞌe kala, bisa naꞌa, fo natudu hada-holomata neu ita Lamatuan, huu noke makasi neu Lamatuak. Leondiak boe, no hataholi ta manaꞌa mbaa. Ndia boe nau natudu hada-holomata neu ita Lamatuan, ma ndia boe oo noke makasi noꞌuk neu Lamatuak.

⁷Naa! Faik fo ita tasoda, na ita ta kada tasoda soaneu ita ao-ina hehelin. Ma mete ma ita mate, na ita ta kada mate soaneu ita ao-ina hehelin.

⁸Te mete ma ita bei tasoda, na, ita nanambaꞌak to ita Lamatuan. Leondiak boe mete ma ita mate, te ita bei nanambaꞌak to ita Lamatuan. De, mae ita tasoda, do ita mate boe, ita bei dadik neu Ndia enan.

⁹Huu ndia de Karistus maten, boe ma nasoda fali. Ana tao leondiak, fo Ana bisa dadik neu Lamatuak, neu hataholi mana mate kala so, ma neu hataholi bei kasoda kala boe.

¹⁰De, boso o soꞌuk aom leo mana kee dedeꞌak, fo sapa o tolanoo salanim. Ma boso o makadadaek ndia. Te dei fo ita basa nggata musi tasale Manetualain, fo Ana palisak ita esa-esak sodan.

¹¹Nana sulak neme makahulun mai, nai Lamatuak Susula Malalaon, nae, “Ita Lamatuan mesa kana nafada, nae, ‘Basa hataholi la dei fo ala sendek lunggulanggak fo lakaluku-lakatele neu Au, ma natudu hada-holomata neu Au. Hataholi esa-esak dei fo pake sila bafa nala, fo manaku, lae, Au dadik neu sila Lamatuan, huu Au ia, Manetualain.’ ”

¹²De, ita basa nggata dei fo musi tanggon-natataak, fo tafada ita Lamatuan, tae, ita tao leobeek ma hatina de ita tao leondiak.

¹³Makahulun, ei nai Roma na mambue soli salak neu ei tolanoo salani mala. Boso leondiak bali! Malolenak, ita taketun leoiak: boso tao tala ita tolanoo nala lakatunu. Boso ita soba tao tatuda sala, losa ala tao salak.

¹⁴Huu au nanambaꞌak ua ita Lamatuan Yesus, de au bubuluk no teteben, leoiak: ta hambu dedeꞌak esa boe, fo bisa tao nanggenggeo hataholi, losa ta bisa hule-haladoi neu Lamatuak. Tehuu mete ma hataholi esa ana duduꞌa laꞌeneu hata esa fo ana tao nala ndia nanggenggeo, losa nameda ndia ta naena hak fo hule-haladoi bali, na ela dedeꞌak ndia dadik nalulik neu ndia.

¹⁵Conto leo, mete ma o muꞌa mbaa, na, ndia tao nala o tolanoom dalen hedis, na, o ta matudu o susuem neu ndia, hetu? Makatataka aok dei! Boso tao makalulutu o tolanoom, huu kada o nau muꞌa hata esa! Te Karistus boe maten soaneu hataholi ndia.

¹⁶Ta malole, mete ma o tao dedeꞌak esa fo mae malole, tehuu hataholi feꞌe kala, kokolak tao laboo o nadem, huu ala lae o tataom ndia, manggalauk.

¹⁷Duduꞌa matalolole! Te Manetualain ndia, na ita Manen. Tehuu ita ta dadik Manek hataholin, huu kada ita taꞌa-tinu tungga heti-heuk. Ta! Mete ma ita nau dadik Manek hataholi nala, na, ita musi tao dedeꞌak ndoos, ma ita dale nala malalaok, ita tasoda ndoos mole-dame, ma ita dale nala lamahoko. Basa ia la bisa dadi, mete ma ita nanambaꞌak to Lamatuak Dula-Dale Malalaon.

¹⁸Hataholi fo ono-lau Karistus leondiak, na ana tao nala Lamatuak dalen namahoko. Ma hataholi feꞌek boe lita neulalau hataholi ndia sodan, basa de soꞌuk hataholi ndia naden, nae, “Ndia ndia, malole!”