Roma 14:3-18

³Mo hii ke! Atuil sarani man in kaa saa tuun na, boel ngat kabaul atuil in dai kaa siis lo ngas deken. Ela kon nol atuil sarani in dai kaa siis lo ngas, tek atuil in kaa sisi ngas deken noan, “Hoe! Kaa sisi lam kula!” Undeng Ama Lamtua Allah sium oen duas son le daid Un atulin!

⁴Eta ku taan in kritik ku pail-kakam in parsai ngas ela sii kam, ku nangan noan, ku nia mo asii la? Ku muik hak saa le hutun kula ka bel atuil didang ngia? Un nam mo, ku atulin in dake lo! Nol ku niam, un tuang lo. Ta suma un Tuang nga sii, man muik hak le tekan nol langa-langa noan, asa man un in dake na toma, tamlom kula. Mo nadidingun deken. Ta atuling na Tuang nga, man mam sium un nol babanan, undeng un Tuang nga tao un le daid in kuat-tes, nol keeh nala.

⁵Muik atuli dehe nutus noan, lelo mes lam banan dui deng leol tenga las. Muik atuli teng pait man nangan noan, totoang lelon nas hnika mes sii, muik in kisa lo. Atuli li mesa-mesam musti nutus dais na esan.

⁶Eta atuli nangan noan, muik lelo dehe man banan dui deng leol tenga las, sam, un tao ela le tulu in todan bel kit Lamtuan na. Atuil in kaa sisi ngas, kaa le tulu in todan bel kit Lamtuan na, ta oen nodan mamo se Ama Lamtua. Ela kon nol atuil in kaa siis lo ka. Un kon le tulu in todan bel kit Lamtuan na, nol un kon nodan mamo se Ama Lamtua.

⁷Eta kit nuling ngam, kit nuling suma taung kit apan ni sii lo. Nol eta kit mateng ngam, kit mateng suma taung kit apan sii lo.

⁸Ta eta kit nuling nabale lam, kit butu-kil nol kit Lamtuan na. Ela kon, eta kit mateng ngam, kit butu-kil nol kit Lamtuan na nabale. Tiata, kit nuling tamlom mo, kit mateng kon no, kit daid Un nenan nabale.

⁹Undeng na le, Kristus mate, hidim Un nuli pait. Un tao ela le halin Un daid Lamtua taung atuil in maet son nas, nol taung atuil in nuil nabale ngas kon.

¹⁰Tiata, tasao le ku nikit apam ma banansila el atuil in nutus dasi, le kritik ku kaak-palim in sarani ka lia? Nol tasao le ku ngat kabaul una lia? Mam kit totoang laok saol Ama Lamtua Allah, le Un presa-ketan kit in nuli ki mesa-mesa.

¹¹Ta dulan son ne Ama Lamtua Buk Niu ka noan, “Kit Lamtuan na esa man tek noan, ‘Mam totoang atuli li hai bukun le suda se Au, nol tulu in todan bel Au. Mam atuli li mesa-mesam nini oen bahan nas le hao noan, Auk daid oen Lamtuan, undeng Auk niam, Lamtua Allah.’”

¹²Tiata, mam kit totoang musti laok situ-tala, le tek Ama Lamtua deng totoang kit in lako-daek son nas.

¹³Hmunan nu mi in se Roma ngias taan in bel kula mi kaak-palin in sarani ngas tutungus. Tao ela bakun na! Banan dui ka, kit nutus elia: kit boel tao kit kaak-palin nas le tunun deken. Kit boel kiu nahu oen le didiin oen tao kula deken.

¹⁴Undeng auk butu-kil nol kit Lamtuan Yesus, ta auk taan parsis elia: muik tahan asa mes lo kon man tao nal atuli li le hmomos, didiin un kohe-kanas nal lo se Ama Lamtua. Mo eta atuli mes nangan noan sa-saa mes tao un le daid hmomos, didiin un nataka kam un muik hak le kohe-kanas lo kam, nang le dais na daid sa-saa in luli taung una.

¹⁵Tuladang el eta ku kaa sisi, le nini na halin tao ku kaak-palim ma dalen ili lam, ku tulu in namnau ka bel un lo son, ta loo? Keeh apam ma le! Tao didaan ku kaak-palim ma suma undeng ku in kaa sa-saa mesa ka deken! Ta Kristus kon mate taung una.

¹⁶Eta ku daek asa mesa man ku nataka kam banan taung ku, mo atuil didang aa le tao didaa ku ngalam ma, undeng oen nataka kam asa man ku in dake na kula kam, banan lo!

¹⁷Nangan babanan! Ta Ama Lamtua Allah nam, kit Lahin. Mo kit daid Lahing na atulin, suma undengan kit in kaa-niun muid atorang nga tuun na lo. Ta eta kit le daid Lahing na atulin nam, kit musti daek asa man in toma ka, kit dalen niu, kit nuil lolo-lolo nol dame, nol kit dalen kolo. Totoang nias dadis, eta kit butu-kil tutungus nol Ama Lamtua Koo Niu ka.

¹⁸Atuil in lii-lau Kristus ela ka, tao Ama Lamtua dalen kolo. Nol atuil didang ngas kon tinang atuling na in nuli ka babanan, hidim naka un noan, “Un nam, atuil banan!”