Romanos 14:3-18

³Pero tin e unata que bueno tuaꞌ ucꞌuxi tunor ma erer uyare tin e war ucꞌuxi e cajr taca que matucꞌa ucꞌampibꞌir, y tin e war ucꞌuxi e cajr taca ma erer aqꞌuecran taca tin e war ucꞌuxi tunor, porque chꞌajmon tunoron umen e Dios.

⁴Pues ¿y tuqꞌuet net tuaꞌ iyojron upater uman Cawinquirar? Pues jax Cawinquirar xeꞌ axin uwira jay imbꞌutz o jay majax imbꞌutz lo que war uche uman era. Pero ucꞌani tuaꞌ aquetpa imbꞌutz lo que war uche e man era umen que Cawinquirar cꞌani utacre tuaꞌ uyubꞌi alocꞌoy imbꞌutz tunor era.

⁵Pues entonces ayan otronteꞌ chequerir. Ayan tin e war ubꞌijnuobꞌ que inteꞌ día ayan más ucꞌampibꞌir que e inmojr día porque jax e día conda anojqꞌuiniobꞌ e gente tuaꞌ e Israel. Pero ayan ubꞌan tin e war ubꞌijnuobꞌ que intera día taca porque tunor e día ajcꞌubꞌir umen e Dios. Pero non erer cabꞌijnu inteꞌ intion tuaꞌ canata lo que cꞌani cache tama tunor era.

⁶Pues tin e war ucojco inteꞌ día cocha era war uche tunor era tuaꞌ utattzꞌi ucꞌabꞌa Cawinquirar. Y tin e machi war ucojco inteꞌ día cocha era umen que war ubꞌijnu que intera día taca war utattzꞌi ucꞌabꞌa Cawinquirar ubꞌan. Y tin e war ucꞌuxi tunor war uche cocha era tuaꞌ utattzꞌi ucꞌabꞌa Cawinquirar, y war uyajcꞌu gracias e Dios tamar. Y tin e war ucꞌuxi e cajr taca war uche cocha era umen que war ubꞌijnu que bꞌan ucꞌani e Dios y war utattzꞌi ucꞌabꞌa Cawinquirar tamar, y war uyajcꞌu gracias e Dios tamar ubꞌan.

⁷Pues mamajchi aturuan tuaꞌ taca uche lo que ucꞌani jaxir, sino que ucꞌani tuaꞌ ubꞌijnu tucꞌa ucꞌani Cawinquirar. Y bꞌan ubꞌan que mamajchi erer ubꞌijnu tucꞌa día tuaꞌ achamay.

⁸Entonces jay caturuan war caturuan tuaꞌ cache lo que ucꞌani Cawinquirar, y jay caxin cachamay, cachamay tuaꞌ caxin tut Cawinquirar. Y tamar era erer cabꞌijnu que jay caturuan o jay cachamay, tuon Cawinquirar.

⁹Porque Cawinquirar Jesucristo chamay tuaꞌ aquetpa Uwinquirar tin e chamen, pero sutpa bꞌixcꞌa tuaꞌ aquetpa Cawinquirar tama tunoron xeꞌ bꞌixiron.

¹⁰Entonces ¿tucꞌa tuaꞌ war atuchꞌi ut awet ajcꞌupesiajir? ¿Y tucꞌa tar war aware que matucꞌa ucꞌampibꞌir? Pues tunoron ucꞌani tuaꞌ cawawan tut e Dios tuaꞌ catojya uyeror ut tama tunor lo que cꞌapa cache tara tor e rum.

¹¹Porque bꞌan chꞌar tzꞌijbꞌabꞌir tama uyojroner e Dios: Cocha nen bꞌixiren, che Cadiosir, cꞌani inwareox que tunor e winicobꞌ cꞌani ayopobꞌ taniut tuaꞌ acotuanobꞌ, y cꞌani uchecsuobꞌ nicꞌabꞌa que nen jax Udiosirenobꞌ. Bꞌan che tama uyojroner e Dios.

¹²Y tamar era chequer que inteꞌ intion ucꞌani tuaꞌ cawawan tut e Dios tuaꞌ cachecsu cabꞌa tut jaxir.

¹³Pues entonces machi ixto tuaꞌ catuchꞌi inteꞌ cawet ajcꞌupesiajir umen que war uche lo que ma chequer jay imbꞌutz o jay majax imbꞌutz tut e Dios. Sino que caturbꞌic cabꞌa tuaꞌ machi cache acucrema inteꞌ cawet ajcꞌupesiajir tama Cawinquirar.

¹⁴Pues nen era war innata que tunor e comida erer acꞌujxa y imbꞌutz tut e Dios, y bꞌan war innata umen que ajcꞌupesiajen tama Cawinquirar Jesús. Pero jay ayan inteꞌ xeꞌ war ubꞌijnu que ayan lo que ma erer acꞌujxa, entonces jaxir ma erer ucꞌuxi.

¹⁵Y tamar era jay ayan inteꞌ awet ajcꞌupesiajir xeꞌ axin acꞌuxun uyalma conda uwira lo que war acꞌuxi, entonces ucꞌani tuaꞌ awacta ucꞌujxar e comida era, porque jay machi awacta, entonces machi war ixana tama ucꞌunersiaj e Dios. Entonces ira ache asatpa otronteꞌ xeꞌ cꞌani ani acorpesna tamar uchamer e Cristo umen taca que net cꞌani acꞌuxi lo que acꞌani net.

¹⁶Y ira ache lo que erer ubꞌijnu e gente que mabꞌambꞌan ani motor que toit net war anata que majax mabꞌambꞌan lo que war abꞌijnu ache era.

¹⁷Porque lo que cacꞌuxi y lo que coychꞌi ma erer cabꞌijnu que jax lo que nojta tama uchinam e Dios, sino lo que nojta tama uchinam e Dios jax e cuxtar xeꞌ erach y jax e cuxtar xeꞌ bꞌutꞌur taca e jiriar y taca e tzayer lo que uyajcꞌon Unawalir e Dios.

¹⁸Pues tin e axana imbꞌutz tut e Cristo cocha era war utzayjres e Dios y cꞌani eꞌrna umen e gente que imbꞌutz ubꞌan.