Loma 14:3-18

³Nee tata dupa pitaka nenge endakali dokome nee tata mendapua iki nenge endakali doko kilya kanja nayapenge. Dee nee tata mendapua iki nenge endakali dokome nee tata pitaka nenge endakali dokome kopeta pilyamona lao yapala nayapengeaka. Doko aipuma? Goteme dolapo lapota lanyia.

⁴Embame akali waka mendenya kendemane mendeme dopa pilyamo dapa pilyamo lao yapao kalyeno doko emba angi akali apipi? Baa kyoto joo katatamopi isa pyakatamopi doko baanya akali andake dokonya kalai. Dee baa kini kyoto joo katata. Doko Kamongome baa kapa pao kyoto injisepenge.

⁵Endakali mendeme yuu gii waka dupa yuu gii mendai mendeme ita miningina lao masingi. Dee endakali mendeme yuu gii dupa pitaka mendai dopaleakana lao masingi. Endakali mendai mendai lao dokome mana minatamo doko tangenya moname kapana lao masokondape pipenge.

⁶Yuu gii mendai mende andakena lao masilyamo endakali dokome Kamongo lao lalyoo dopa lao masingi. Dee nee tata dupa pitaka nelyamo endakali dokome Kamongo lao lalyoo nenge. Doko baame Gote lao yaka pilino lao nenge. Nee tata mendapua iki nelyamo endakali dokome Kamongo doko lao lalyoo nenge. Dopa pilyamo endakali dokome apata Gote lao yaka pilino lengeaka.

⁷Doko, naima kalyamano doko naimanya endakali mendaipi mende naima tangenya lao nakatenge. Dee kumilyamano doko naimanya endakali mendaipi mende naima tangenya lao kumala naenge.

⁸Naima kalyamano kandao doko, Kamongonya katakamaingi. Kumilyamano kandao doko, Kamongonya kumakamaingi. Dopana, naima kalyamanopi kumilyamanopi doko Kamongonyaka.

⁹Doko, Kataisame endakali kumapaepi sakapi dupa isoo kalyanya baa kumapala dee lenge tao sakatea.

¹⁰Dopana, akali embame aipuma embanya endakali yango doko-kisa koo silyamona lao baa yapao kalyepe? Dee akali embame aipuma embanya endakali yango doko kilya kandelepe? Naima pitaka Goteme yapena lao baanya enomba dokonya katatama.

¹¹Doko, pii pepa pyapae singi dokonya, “Kamongo dokome, ‘Namba kiningi kalyoli pyoo kiningi eteteaka endakali dupa pitakame namba lao luma lakapala namba Gotena lao lao panatamina,’ lelyamona,” lapae silyamo.

¹²Dopana, naima pitaka mendai mendai lawame naima tangenya mana minatamano dupa dopa pyoo miniamana lao Gote lamaitama.

¹³Dokonya naimame naimanya mendeme kopetea pilyamona lao deaka mende yapa yapa napimana. Dopa napinya, kaiminingi mende lomabsowapi koo pina lao mapisowapi napimana lao yapao masoo katamana.

¹⁴Nambame Kamongo Jisasapa pakatae katao masalakao masoo lelyona, opale mendaipi mende koyapae daa. Dopaka doko, koyapaena lao masetamo endakali doko-kisa koyapae jeta.

¹⁵Embame nee nele dokonya embanya kaiminingi doko mona kenda kaenge tamo kandao doko, auu kayamaingi mana doko yakinatatenosa pita. Embame nee nate dokome Kataisame alo pyoo kumiamo endakali doko koyasala nayape.

¹⁶Nyakamame mana kapa pao minapengena lao masingi dupanya endakali mendeme pii koo lapenge jia kandeno doko, naminalapape.

¹⁷Doko, neepi endakalipi mendapua nengepi nanengepi doko Goteme isingi dokonya mende daa. Oli Sipitisame tolatae joo katasingipi, mona lyuu lao katasingipi, mona yaepao katasingipi, dupa Goteme isingi dokonya lamo.

¹⁸Mana dopale dupa minao Kataisanya kendemane joo katenge doko Goteme auu kaenge. Dee endakali dupame baa epena lao masingimaka.