Waiwia 2:29-45

²⁹Ri ai kan mueid on ia, en aima padaki on komail duen jam atail Dawid, me pil matalar o jaredier, o japwilim a joujou mi re atail lao lel ran wet.

³⁰A jaukop amen, ap mani, me Kot kotin kaula inauki on i, me kijan wa men pan kaipokedi pon mol a.

³¹Ari, ni a mamani duen en Iejuj a iajada, ap kotin majani, me a jota likidmalielar nan wajan mela, o pil uduk a jota mor pajan.

³²I Iejuj, me Kot kotin kaiajadar, kit karoj jaunkadede en mepukat.

³³A lao japwilekidar pali maun en Kot, a kotin aleer jan ren Jam, en kapwaiada inau duen Nen jaraui, ap kotin kamoredi, me komail kin udial o roneron.

³⁴Pwe kaidin Dawid, me kotidala nanlan kan, a pein i kotin majani: Kaun o kotin majani on ai Kaun: Mondi ni pali maun i!

³⁵I lao wiaki om imwintiti utipan nä om akan.

³⁶Ari, men Ijrael karoj en aja melel, me Kot kotin kajapwilada i, en Kaun o Krijtuj i Iejuj me komail kalopuelar.

³⁷Irail lao ronadar met, ap lel on nan monion arail, re ap indai on Petruj o wanporon tei kan: Ri at oko, da me jen wiada?

³⁸Petruj ap majani on irail: Komail kalula, o amen amen en paptaij on ni mar en Iejuj Krijtuj, pwe dip omail akan en lapwada. A komail pan tunole Nen jaraui.

³⁹Pwe nan inau wet on komail o noumail jeri kan, o on irail karoj men ilawei, me Kaun, atail Kot, pan kotin molipe.

⁴⁰O pil jon en majan toto, me a kadede on irail, o panaui kin irail, majani: Komail en dorela pein komail jan nan di jued wet!

⁴¹Irail me duki on a majan ap paptaijela; ari, ni ran o aramaj impan jilekid me jaulanalar.

⁴²Irail dadaurata padak en wanporon akan, o ar minimin pena, o kamadip jaraui, o kapakap akan.

⁴³Lomwi ap kipadi aramaj karoj o manaman o kilel akan toto wiauier ren wanporon akan.

⁴⁴O karoj me pojonla, kin pokopokon o aneki pena kapwa takij.

⁴⁵O netikila ar kapwa kan o nene on irail karoj, duen ar jamama amen amen.