Aposol 2:29-45

²⁹Nafuhete, nagra fatgo hu'na neramasmu'e, mago tahiti'a Deviti'a frige'za asentageno, keri'amo'a menina tagrane me'ne.

³⁰Na'ankure agra kasnampa nekino antahine, Anumzamo'a mago negeho avareno tra'are (kini trate) antesigeno mani'nigu averino huvempa hu'ne.

³¹Deviti'a kegamuteno, Kraisi friteno otisniazana ke'ne, fri vahe kumapina (Heidis) avufamo'a atresigeno zaza kna omaneno, onkasrisia zanku hu'ne. (Sam-Zga 16:10)

³²E'i ana Jisasina, Anumzamo'a fri'nefinti azeri otigeta, tagra maka'mota tavufinti ke'nona zanku nehune.

³³Ana higeno Anumzamo ragi nemino, azantamaga kaziga'a avarentegeno, huvempama hu'nea Ruotge Avamura Nefampinti erino, eritagitregeta menina negeta nentahita nehaze.

³⁴Na'ankure Deviti'a monafinka mareori'neanagi, Deviti agra'a huno, Ramo'a, nagri Ramofonku huno, Naza tamaga kaziga mani'nege'na,

³⁵Nagra ha' vaheka'a zamazerina kagia tra antesugenka, kagiareti arentrako hugahane huno hu'ne. (Sam-Zga 110:1)

³⁶E'ina hu'negu, maka Israeli vahe'motma tamage hutma antahi ankereho, tamagrama aheta hanti'naza nera, Anumzamo azeri otigeno, Ra vahe tro huno Kraisi mani'ne.

³⁷Ana kema zamagrama nentahizageno, kemo'a zamarimpafi agonaza zamareaza hige'za, Pitanku ene ruga'a aposol nagaku anage hu'naze, tafuhete tagra na'a hugahune?

³⁸Hazageno, Pita'a zamagrikura anage hu'ne, tamagu'a rukrahe nehutma, Jisas Kraisi agifi mono tina frenkeno, kumi'timia apaseramante'na, ruotge Avamu'mofo museza tamagra erigahaze.

³⁹Na'ankure huvempama hu'neana tamagri'ene, mofavre tamimofonku'ene, afete mani'namokizmigu'ene, ruga'a vahera tagri Ra Anumzamo zamagi hanige'za, Agrite egahaze.

⁴⁰Rama'a ruga'a ke Pita'a huama nehuno, zamazahuke zamasami'ne. Kefo zampima mani'naza vahe'pintira, manigneta manisaza zamo tamagu'vazina, knare huta manigahaze.

⁴¹Agri kere zamentintima haza nagapintira, monoti fre'naze, anazupage tima fre'nazana, 3tauseni'a nazamo'za fre'naze.

⁴²Ana vahe'mo'za aposol nagamokizmi naneke antahiza atru hu'za monora rempi hu'za nentahiza, magopi breti kori'za nene'za (Lords sapa) nunamuna hu'naze.

⁴³Aposol nagamo'za hakare ruzahu'zane, kuguva'zana erifore nehazageno, maka'a vahe'mo'za nege'za zamanogu nehu'za amazana na'za fore'nehie hu'naze.

⁴⁴Hanki Jisasinku zamentinti hu'naza vahe'mo'za tragote'za nemani'za, maka'za zamia omi'ami nehu'za,

⁴⁵mago'a zazamine, mopa zaminena agafa hu'za zagore atrage'za, miza'sage'za zago eri'za upama hu'naza vahe refako hu'za zami'naze.