Tjaanakuṉu 4:9-19

⁹Minyma paluru puṯu kulira Yiitjunya watjaṉu, “Nyuntu Tjuwu nyinanyi, kanya ngayulu Tjamiriyanya ngurrara. Wiyatjun kapiku tjapintjaku.” Tjuwu tjuṯangku wiya Tjamiriyanya ngurrara tjuṯangka tjungurringkula kapi tjikilpayi.

¹⁰Yiitjulu palunya watjaṉu, “Katutjanya yunytjurringanyi nyuntunya nintintjaku, yalatji nyuntu wiya kuliṉi. Ngayunyaṯarra nyuntu wiya kuliṉi. Ngayunya kulira nyuntu ngayunya tjapinmara kapi kutjupa kanalpayinya nguwanpa tjikilkitjangku.”

¹¹Minyma paluru watjaṉu, “Nyuntunu pilikanawiya nyinanyi. Kapi ngaatja ngaṯi tiṉangka ngarrinyi. Yaalytjiyaalytjin mantjilku panyapa kapi kanalpayi?

¹²Nganampa walytja Tjikupalu kapi ngaatjanya tjawara yutitjanu, nganaṉalpi ngaṉṯitja tjuṯangku tjikintjaku. Paluru kapi ngaatja yurrunpa tjikiṉangi katjapiṯingku, yuṉṯalpiṯingku, puluka tjuṯangkuṯarra. Tjikupanya mayutju tiṉalampa yurrunpa nyinangi. Nyuntu palula wirriḻi nyinanyi ilta?, wiya, nyuntun yaṉangu nyinanyi.”

¹³Minyma palunya watjaṉu, “Kapi ngaatjanya nyuntu tjikira piyukun yanymarriku.

¹⁴Kapi kanalpayinya ngayuluṉa yungkuku, nyuntu tjikira wiya piyuku yanymarriku. Kapi kanalpayi panyapa kutu ngarrimalpa wiyarrinytjawiya. Yaṉangungku kapi palunya tjikira kana kutu nyinamalpa.”

¹⁵Minyma paluru watjaṉu, “Kapi panyapaṉi yuwa! Kapi ngaatja pilikanangka wiyarringanyingka piyukuṉa yanymarrirra ngalyankupayingkamarra.” Minyma paluru wiyawanangku kuliṉu, kapi kanalpayi mantjira tjikilkitjangku. Yiitjulu kapi kanalpayi palunya yungkukitjangku wangka kutjupawana watjaṉu, minyma palunya kana nyinatjunkukitjangku, paluru Yiitjukuṉu wangka kulira palumpa walytjarringanyingka.

¹⁶Yiitjulu minyma palunya watjaṉu, “Nyuntupa miiṯa yankula yaḻṯi! Yaḻṯirrapula ngaakutu ngalya yarra!”

¹⁷Minyma paluru watjaṉu, “Miiṯa walytjangka wiyaṉa nyinanyi.” Yiitjulu palunya watjaṉu, “Tjukarurrun panyapa watjaṉu.

¹⁸Wati kutjungka nyinarra nyuntu wantikatirra kutjupangkalpi nyinangi. Palunyatjanu nyuntu wati palunya wantikatirra kutjupangkalpi nyinangi. Yalatji nyuntu miiṯa payipala kanyiṉingi. Kuwarri nyuntu nyinanyi wati kutjupangka miiṯa walytjawiyangka. Panyapaṉin tjukarurrungku watjaṉu.”

¹⁹Minyma paluru, kuliṉingi, “Yaalytjiyaalytji wati ngaatja ninti ngayuku, tjinguru ngaatja Katutjaku wangka watjalpayi.” Paluru Yiitjunya watjaṉu, “Kuliṉilpiṉanta nyuntu Katutjaku wangka watjalpayi. Nyuntu ninti puntu nyinarra nintilaṉi yara ngaaku!