Tinata Valavalar 23:13-29

¹³Koko una ngo ma ra varvapagumanene pire ra bul, Tago ba u tova ma ra virvirit, pa na virua.

¹⁴Una luba ia ma ra virvirit, Ma una valaun ra tulungeana kan ra ruarua na tulungen.

¹⁵Natugu, ba ra balam i kabatau, Ra balagu iat na gugu bula.

¹⁶Maia pa, ra tulungeagu na ga, Ba ra ngiem i vatang ra ko na tinata.

¹⁷Koko ra balam na varngu ure ra umana tena varpiam, Una ongor ika ta ra variru tadav ra Luluai ta ra bungbung parika.

¹⁸Tago a dovotina, ra e namur i ki, Ma ra magit u ki nunur upi ia pa na tukum.

¹⁹Natugu, una valongore ma una kabinana, Ma ra nuknukim na mur ra nga i takodo.

²⁰Koko avat a la varurung ma ra umana lup mome vain, Ma koko una ki maravut ra umana lup kirip, a umana lukai;

²¹Tago ra lup nimomo ma ra lukai dir a luveana boko, Ma ba tikai i mata vava ka, na mal boko ma ra mal i tarada.

²²Una toratorom tai tamam nina i ga vangala u, Ma koko una pidimuane tinam ba i tubuan.

²³Una kul ra dovotina, ma koko una ivure mule; Damana bula ra kabinana, ma ra varvateten, ma ra minatoto.

²⁴Tama i ra tena takodo na manga gugu; Ma nina i vangala ra bul i kabinana, na ga tana.

²⁵Boina ba tamam ma tinam dir a gugu, Ma nina i ga kava vaarike u na ga.

²⁶Natugu, una tul tar ra nuknukim tagu, Ma boina ba ra matam na manane kaugu lavur uga.

²⁷Tago ra paiga na vavina i da ra ngala na tung; Ma ra enana vavina i da ra ubu i varvaim.

²⁸I kiki uai da ra tena nilong, Ma i vapeal ra umana tena vavagu pire ra tarai.

²⁹Ia i kairane ra kinadik? Ia i ki na tabun? Ia i tup ia ra varngangar? Ia ra tinata na urur i tur pirana? Ia i kinkin ma pa ta vuna tana? Ia i gavul ra matana?