Te Israel Tobolu Bidi Dabe 3:20-28

²⁰Te gavman tuni bidi agaduba deli te kedau asobo be habu te ugwadu daide dulaludali, Ehut agaba asama te po wali, “Eno te nago po te Godidu asali po me deli te nage dali wabo po elalubao,” wali. Te gavman tuni bidi dolugulali,

²¹tama Ehutgo te bainat hwą te pobase nogogo selama, tama te hwą ge te tuni bidigo tabide elali madi te hwą ge te tabi tomoba bula sigi pali.

²²Ehutgo te bainat hwą te tuni bidigo tabide dįą sabeo. Tama te hwą poai yali me te hwą ge sigi me te tigidali mu tomoba bula sigi pali. Tama te tabi iligo te hwą ge mesega sali, tama te bainat poai yali te tudi badu pedaligi soali.

²³Ehutgo te be sunumi paliama, dąų walama, tama te gasa sunumidu buluba teda soali, tama aga palio.

²⁴Te sę bidi dabe aselama suali, te be sunumi palialubo suali, tama augwaligo te homu yali, “Te gavman tuni bidi te di beba pali da,” te homu yalio.

²⁵Augwaligo sesabi gana elama tonaluali goli, agai te be sunumi dabo sube. Tama augwaligo ki selama, te be sunumi dalama, tama augwaligo suali, te augwa genuai bidi isama, tama te be degedude pila mubo suali.

²⁶Te sę bidi dabego homu hauwa eyu tonalu dali sogo, te Ehut aga wi soai. Aga palima, te masigi togobo pesage dabe te edelama, tama wi peyu, te bulu me nogi Seira teba geme wi duala sigi pai.

²⁷Nosali aga te Israel dabego tǫba pedelama, tama agai Efraimgo bidali bulu duba sabolama, te bu wabo nai biugel bu olama, te Israel bidi i olama, te hwįagasao wai. Tama augwali nosali asobadi aga polasa peyu, tama augwali te bulu duba dabe aiyaba dulali.

²⁸Ehutgo te Israel dabebolo wali, “Dage ena wali asiąo! Genuai Bidigo duga boi bidi, te Moap dabe, te dagego nogoba manio. Te dagego augwali aiyaba elaluaibao,” wali. Tialima, augwaligo te Ehut wali palima, tama augwaligo te Moap dabe soabo sunumi geą sigi pali, te Moap dabe augwali te wę Jordan nogeidali weyu tama tiali. Tama me deli te wę nogelama te me soabeo. Mu menio.