Taha Bapare Sâcmutâc 7:19-35

¹⁹“Qowi biucnezi wiac mamakâcne he heuac eocmu ine mi nânʒepieŋ, i ʒocko râepie ʒazejec. Ŋic ɋaɋacne juŋgopieŋzi qowi gâcne nâzo murâ nânʒepieŋ.

²⁰Mâc ŋic moc e wâwânâŋhec juhuc wama bâzi Wofuŋte biŋe mukicne irec qowi nâocmu e mi juzejec.

²¹Me ŋic moczi ŋic me qowi wâwânâŋhec me wiac wâwânâŋne ba bâuac erâ wama bâzi Wofuŋte biŋe mukicne irec qowi nâocmu e wâc mi juzejec.”

²²Wofuŋzi Mose ʒiŋuc âzâcnewec:

²³“Go Israe ŋic ʒiŋuc jazac: Ŋoŋe bulimakao me lama me noniŋ irec wokemaŋ moc mi nânʒepieŋ.

²⁴Qowi e jahac hâmoekac me qowi mimicne gâcne jaŋe kisuc qâsuckeeŋgopieŋ irec wokemaŋ i wiac irec me irec rozo murâ ronʒepieŋ, nânâ ine moc mi nânʒepieŋ.

²⁵Me ŋic moc e Wofuŋte biŋe bâzi rikeniŋmu irec wokemaŋ nâocmu e mi juzejec.

²⁶Erâ i sawa mâcne, ŋoŋe ira me ira juhuc qâqâc me qowi soc moc mi nânʒepieŋ.

²⁷Moc e soc i nâocmu e mi juzejec.”

²⁸Wofuŋzi Mose ʒiŋuc âzâcnewec:

²⁹“Go Israe ŋic ʒiŋuc jazac: Moc e wama bâzi‐ticne Wofuŋtao râeocmu e irec tofane Wofuŋte biŋe qazejec.

³⁰Ehuc Wofuŋte biŋe alatao rikeeŋgopieŋ i e jahac bafisizejec. Wokemaŋ â qowi amec siecne hâcne bafisizejec, eme amec siecne i Wofuŋte maio fenʒoŋkehuc taha râenʒepieŋ.

³¹Ehame taha bapa e wokemaŋ alatao râeme ʒaha amec siecnezi Aroŋ â ŋokâfâcne jaŋere biŋe ezejec.

³²Wama bâzire ŋefacne fâreopec i ine taha bapa râcne tahac enʒepieŋ.

³³Ŋefacne fâreopec i Aroŋ ŋokâfâcne jaŋeraonec moczi soc tiehuc wokemaŋ rikeocmu ere biŋe ezejec.

³⁴No Israe ŋic wama bâzi‐jeŋic irecnec amec siecne â ŋefacne nore biŋe rorâ taha bapa Aroŋ â ŋokâfâcne jarepo. I Israe ŋic jaŋe honerâ iŋuc erahuc juniŋte epo hâcne.

³⁵Wofuŋ bâzi rikecneniŋmu irecnec wiac izi hâcne Aroŋ â ŋokâfâcne jaŋere biŋe ezejec. Iŋuc fuaocte Wofuŋzi taha bapafâc‐ticne erâ juhuc kiŋaŋ qacneniŋte rowosâec‐jopawec dameŋ ira hâcne mupaŋkekicne.