19मारेइ ग्रांग्रा दिशो थोव़कम थिशो श्ये ब्वचा मदुम्ब। मेको चोचा माल्ब। तन्न सुइ चोव़खो दुम्शो बाक्तेक्म हना, अरु श्ये ब्वने चाप्नीम।
20तन्न सुइ ग्रांग्रा दिशो दुम्शा, परमप्रभु यावे कली दुशा बाक्चा आ पर्बम चढ़ेशो श्ये ब्वाप्तु हना, मेको आ खिं ङा मुर रे तिल्चा पुंइसीब।
21मिनु इन दातेमी सुमी मारेइ मारेइ ग्रांग्रा दिशो थोव़क थिशा, मुर आन ग्रांग्रा दिशो, ग्रांग्रा दिशो जन्तु कि मारेइ ग्रांग्रा दिशो थिप्तु हना, नोले परमप्रभु यावे कली दुशा बाक्चा आ पर्बम चढ़ेशो श्ये ब्वाप्तु हना, मेको आ खिं ङा मुर रे तिल्चा पुंइसीब’ दे माइक्मी” दे परमप्रभु यावेमी मोसा कली देंत।
22मिनु लेंशा परमप्रभु यावेमी मोसा कली
23“गे इस्राएली आन कली ‘गेपुकीम ब्यफ, भेडा नु क्यारश आन बोंसो काइ मब्वने। लेवी ३:१७
24आंमा बेक्शो, मारेइमी साइश्शो बस्तु भाव आन बोंसो अर्को मारेइ गेयम चलेने चाप्नीनी। तन्न गेपुकीमी मेको ब्वचा मदुम्ब। प्रस्थान २२:३०
25मिनु इन दातेमी सुमी परमप्रभु यावे कली मीम चोशा चढ़ेतीके आ बोंसो ब्वाइबा, मेको आ खिं ङा मुर रे तिल्चा पुंइसीब।
26गेपुकी ते बाक्तीनी हना यो, तेकोइ चिक्ब नु बी ब्यफ, क्यारश भेडा आन हुश ब्वचा मदुम्ब।
27मिनु सुमी हुश ब्वाइबा, मेको आ खिं ङा मुर रे तिल्चा पुंइसीब’ माइक्मी” देंत।
28मिनु परमप्रभु यावेमी मोसा कली
29“गे इस्राएली आन कली ‘सुमी परमप्रभु यावे कली गे रिम्शो पाइब बाक्नीनी, दे ठेयब सेल्शा चढ़ेतीक चाड सेल्बा, मेकोमी आ चढ़ेशो रे परमप्रभु यावे आ बाक्तीकेम आंमान चाक्चा माल्ब।
30मेकोमी परमप्रभु यावे कली मीम चोशा चढ़ेचा कली बोंसो नु कुथ्रु चाक्चा माल्ब। मिनु मेको कुथ्रु परमप्रभु यावे कली क्युक्शा चढ़ेतीक चढ़ेचा माल्ब। प्रस्थान २९:२४
31मिनु चढ़ेबमी मेको बोंसो कली मीम चोचा माल्ब। तन्न मेको कुथ्रु हारून नु आ तौ आन के दुम्ब।
32मिनु इन दुशा बाक्चा आ पर्बम चढ़ेतीके रे आ ग्युरा फिला चढ़ेब कली क्युक्शा चढ़ेचा कली गेचा माल्नीनी। लेवी ९:२१
33हारून आ तौ तेकोम दुशा बाक्चा आ पर्बम चढ़ेतीक चढ़ेबा नु हुश ब्रुइक्बा, ग्युरा फिला मेको के दुम्ब।
34मारदे हना गो इस्राएली आन “गे रिम्शो पाइब बाक्नीनी” दे ठेयब सेल्शा चढ़ेशो कुथ्रु नु ग्युरा फिला गेपुकी रे ताक्शा चढ़ेब हारून नु मेको आ तौ आन कली गेना हना यो कली गेतामी’ दे माइक्मी।
35हारून नु आ तौपुकी तेको नाक्त रे परमप्रभु यावे कली चढ़ेब दुम्मा, मेको नाक्ती रेन परमप्रभु यावे कली मीम चोशा चढ़ेशो चढ़ेतीक रे मेको आन भाग गेतामी।
लेवी 7
लेवी 7:19-35