Taha Bapare Sâcmutâc 27:18-33

¹⁸Me ŋic e mâreŋ‐ticne sabata jara hombaŋ faicnao sawa Wofuŋte biŋe qaocmuo ine irecnec fuŋkerâ wose rakupie sabata jara hombaŋ moc maickeocmu dameŋ ŋondeŋ ira jara wezimuc foocmu irec sâc manahuc furine bawahanʒepieŋ.

¹⁹Me mâreŋ‐ticne Wofuŋte biŋe qaocmu i mocwâc furine bazo murâ ine mâreŋte furi mukicne irec sâc erâ 5‐konec wâŋ ʒuhuckerâ râeme e jahacne biŋe fozejec.

²⁰Me mocwâc furine bazo mi ecneocmuo me moneŋte erâ ŋic moc mutaracneocmuo ine furi bapare sâc mocwâc mi eocmu.

²¹Aricne, mâreŋ i sabata jara hombaŋko behepie Wofuŋte biŋe tirine eha taha bapazi rauckezejec.

²²Me ŋic moc e merâfâc mâreŋ mâcne, mâreŋ furune moc furine bakicne i Wofuŋte biŋe qaocmuo

²³ine taha bapazi mâreŋ Wofuŋte biŋe qakicne dameŋ ira fuŋkerâ wose rakume sabata jara hombaŋ maickeha jara wezimuc eocmu irec sâc ʒoaŋ ijaha furine râeme Wofuŋte taha tirine ezejec.

²⁴Sabata jara hombaŋko ira ine mâreŋ i mocwâc mârâc rune ere biŋe ezejec, mamac ŋosafâc‐ticne jaŋere meonec rorâ bajuwec erao hâcne risiezejec.

²⁵Furine sasawa ine furufic moneŋte hawari fokac irec sâc efârezejec. Gera moneŋ 20 izi siliwa moneŋ wâŋ irec sâc ezejec.

²⁶“Qowi mârâc fufua i biac Wofuŋte biŋe ekacte ŋiczi Wofuŋte biŋe mocwâc mi qanʒepieŋ; bulimakao me lama, qowi iŋucne i Wofuŋte biŋe mukicne hâcne.

²⁷Me qowi iŋucnezi sahac fâsâc mi fuawecko ine runezi furine mukicne irec sâc erâ 5‐konec wâŋ ʒuhuckerâ râeme e jahacne biŋe ezejec. Me eki furine mi baocmuo ine ŋic moczi furine mukicne irec sâc sawa râeme ere ezejec.

²⁸“Ŋic moc e ŋic me qowi me hae mâreŋ wiac sipirickeocte mukicne i Wofuŋte biŋe qame ŋic moczi irecnec furine mi bazejec. Wiac sisipiricte biŋe mukicne sasawa i Wofuŋzi honeme tirine jâmbâŋ ekac.

²⁹Ehame ŋic moc sisipiricte biŋe râembiŋko moczi furine moc mi bazejec, e hâmocte biŋe ekac hâcne.

³⁰“Mâreŋkonec wiac sasawa, wiac ukicne me jâchândâŋ, irecnec hâcne teŋkonec wâŋ i Wofuŋte biŋe, eki honeme tirine ekac.

³¹Wiac teŋkonec wâŋ râezo mukicne irec okacne ŋic moczi moneŋ râezo murâ ine furine mukicne irec sâc erâ 5‐konec wâŋ ʒuhuckerâ râezejec.

³²Erâ lama bulimakao â qowi sasawa soŋaŋ‐jeŋic jâuruhuc rahapie gunu‐ticnezi wose qârâwiŋ ejarehuc teŋkonec wâŋ bâtirieocmu i Wofuŋzi honeme tirine eocmu.

³³Ehame ŋic moczi, qowi i biaŋne me sâqocne, iŋuc mu wioc ehuc okacne mi râezejec. Me sifu râeocmuo ine qowi qanaŋ bâwosâekicne i mecne erâ okacne râekicne i mecne mâmâc jaha râec‐jofame tirine ezepirec, jahe furi bapare sâc mi ekopirec.”