Taha Bapare Sâcmutâc 13:27-58

²⁷Eme ʒoaŋ gie bapa namba 7 ira taha bapazi ŋic e hone manac ecnezejec. Ehuc wic i fua sokac eme honerâ ʒiŋuc âzâcnezejec: Go wicsanaŋ fua‐garekacte wâwânâŋhec ekomec.

²⁸Me wic i mârâc fowec ijaha fohuc mi sosoka mâc gowaeme ʒiŋuc muzo: Ʒocbâruŋzi ʒame siwiŋnewec. Irec taha bapa e ŋic ʒiŋuc âzâcnezejec: Ʒocte râfâ sawa ekacte ɋaɋackekomec.

²⁹“Eme ŋic me ŋokac moc utunao me mecqaŋeŋnao wic moc fuacneme

³⁰taha bapazi wic i honezejec. Ehame sahac‐ticne dockeha sahac ʒâwâne bâŋeŋkeme taha bapazi ŋic ʒiŋuc âzâcnezejec: Utugao me mecqaŋeŋgao wic fua‐garekac i wicsanaŋ ekacte wâwânâŋhec ekomec.

³¹Me sahaczi biac mi dockeha â sahac ʒâwâzi gâgâpâc mocwâc mi ehuc bâŋeŋkeme taha bapazi wicte fuŋne iŋuc honerâ ŋic wichec e ficko râeme ŋehuc juha ʒoaŋ gie bapa 7 tarazejec.

³²Eme ʒoaŋ gie bapa namba 7 ira taha bapazi i mocwâc honezejec. Eme wiczi soka ŋedâmârec mi ewec, me sahac ʒâwâzi bâbâŋeŋ mi fuame â wiczi mi dockeme

³³ine ŋic e mecʒâwâ hehuc wicko ine mi hezejec. Ehame taha bapazi ŋic wichec e ficko râeme ʒoaŋ gie bapa 7 ʒuhuckerâ ŋezejec.

³⁴Eme ʒoaŋ gie bapa namba 7 ira taha bapazi wic honezejec. Ehame wiczi soka ŋedâmârec mi eme â sahaczi wâc mi dockeme taha bapazi ŋic ʒiŋuc âzâcnezejec: Go ɋaɋackekomec. Iŋuc âzâcneme ŋic e qoruc wiac‐ticne ʒure‐fârerâ ɋaɋacne juzejec.

³⁵Me irec faicnao wicticnezi mocwâc soka ŋedâmârec eme

³⁶taha bapazi honezejec. Ehuc fua sawec ewecko ine sahac ʒâwâ bâbâŋeŋte ʒâŋe mi fihuc mâc ʒiŋuc sawa âzâcnezejec: Go wâwânâŋhec jukomec.

³⁷Me wic sâfirune mârâc fowec ijaha foha sahac ʒâwâ gâgâpâc mocwâc fuame honerâ ʒiŋuc muzo: Wiczi somiekacte ŋic e ɋaɋackekac. Eme taha bapazi ʒiŋuc âzâcnezejec: Go ɋaɋackekomec.

³⁸“Me ŋic me ŋokac moc sahac‐ticnao ɋâɋâfoŋ fuame

³⁹taha bapazi honezejec. Ehame sahac‐ticnao ɋâɋâfoŋ fuakaczi qaʒueme ʒiŋuc manazo: Wic omanezi sawa fuakacte ŋic e ɋaɋackekac.

⁴⁰“Ŋic moc qizec susuc‐ticne waha‐fâreme utu pârâc eocmuzi sifu ɋaɋacne juocmu.

⁴¹Me ŋic moc e qizec susuc‐ticne mai‐ticnao me naki‐ticnao domakac izi waha‐fâreme mai pârâc erâ sifu ɋaɋacne juocmu.

⁴²Me utu pârâc me mai pârâc‐ticnao sahaczi bâruŋkeme ʒiŋuc muzo: Utu pârâc me mai pârâc‐ticnao wicsanaŋ fuakac hâcne.

⁴³Iŋuc fuame taha bapazi honezejec, ehame sisiwiŋ bâbâroŋ fuakac i sahacko wicsanaŋ fuaekac irec sâc eme ʒiŋuc manazo:

⁴⁴Ŋic e wicsanaŋhec ehuc wâwânâŋhec ekac. Irec wicsanaŋzi qizec‐ticnao fuakacte taha bapazi ʒiŋuc âzâcnezejec: Go wâwânâŋhec ekomec.

⁴⁵“Ŋic moc wicsanaŋ ecneocmu e ŋaqi suckekicne heme hume juzejec, erâ qizec susuc‐ticne beheme ʒorazejec. Ehuc mecʒâwâ‐ticne faicpec bâsoŋkerâ ʒiŋuc muhuc owackezejec: Wâwânâŋhec, wâwânâŋhec.

⁴⁶E wicsanaŋ focneocmu sâc wâwânâŋhec jaha juocmu. Erâ wâwânâŋhec ekacte hae râpenao bucticne juzejec.

⁴⁷“Ŋaqi ʒâwânehec me ʒâwâ tâmiric

⁴⁸â qoruc wiac ʒâwânehec me ʒâwâ tâmiric, erâ qowi sahac me wiac gâcne qowi sahaczi bakicne

⁴⁹i gukuckehuc qondaŋ qarâ gufeme honerâ taha bapa jâutunʒepieŋ.

⁵⁰Eme taha bapazi honerâ ŋaqi qoruc gukuckekicne i ficko râeme foha ʒoaŋ gie bapa 7 tarazejec.

⁵¹Ehame ʒoaŋ gie bapa namba 7 ira mocwâc honezejec. Eme gukuczi ŋaqi qoruc me qowi sahac me wiac gâcne qowi sahaczi bakicne i sâcke‐fâreme honerâ ʒiŋuc manazejec: I wiac repicnezi wâwânâŋhec.

⁵²Iŋuc manarâ ŋaqi qoruc ʒâwânehec me ʒâwâ tâmiric â wiac gâcne qowi sahaczi bakicne i ʒocko rikezejec.

⁵³“Me taha bapa e ʒiŋuc mecne honeocmu: Gukuczi ŋaqio me qoruc wiacko me wiac qowi sahaczi bakicnao mi sawewec.

⁵⁴Iŋuc honerâ wiac gukuckekicne i ʒureniŋte mutâcne‐jarezejec, ʒurepie ficko râeme foha ʒoaŋ gie bapa 7 tarazejec.

⁵⁵Eme wiac gukucnehec ʒurekicne i taha bapazi mocwâc honezejec. Eme gukuczi mi sawewec â hawari‐ticne wâc mi hetikiewec, iŋuc honerâ sifu ʒiŋuc manazejec: I wâwânâŋnehec ekac. Irec gukuczi ŋifec fuame ʒocko rikezemec.

⁵⁶“Me wiac gukucnehec ʒurepie gowaeme taha bapazi honerâ ŋaqi me qowi sahac me qoruc tofane gukuckewec i bâsuckerâ behezejec.

⁵⁷Eme ŋaqio me qoruc wiacko me wiac gâcne qowi sahaczi bakicnao mocwâc saweme go wiac gukuckekicne hâcne ʒocko rikezemec.

⁵⁸Me ŋaqi me qoruc wiac me wiac gâcne qowi sahaczi bakicne i ʒurepie gukuc omaeme harierâ ʒurepie ɋaɋacke‐hâmozejec.”