Sua Tutŋana 30:23-33

²³To iwe tel pa na, mbulu tau moori sa iwoolo, mi tamen kusiini iurur leleene pini som. Mi iwe paŋ pa na, mbulu tau mbesooŋo moori sa ikam moori ta imborro i na muriini ma iwe biibi pini.

²⁴Koroŋ munmun paŋ ta timbotmbot toono, mi len ŋgar biibi kat. Koroŋ ta kembei:

²⁵Ta na, moolo. Pa zin len mburan biibi som. Tamen mazwaana ki zoŋ na, tikamam uraata biibi bekena tindoundou kan kini. Beso yaŋ imar ma lele isaana, to kan kini imbotmbot. Tiru zalan som.

²⁶Mi iwe ru pa na, moozo. Pa zin tomini len mburan biibi som. Tamen gorgori tirru len lele be tike lela mi timbot ambai.

²⁷Mi iwe tel pa na, siizi pakan. Pa zin len king sa som. Tamen sombe tipa, na tiparto zin mi tipa raraate men.

²⁸Mi iwe paŋ pa na, ŋguloŋ. Pa ina koroŋ musaana. Irao teteege pa namanda. Tamen timbotmbot lela ruumu bibip kizin king tomini.

²⁹Mi koroŋ paŋ ta tizarra kan mbooro mi tiwwa. Tana lelende be terre lende.

³⁰Ta na, laion. Pa ni mburaana biibi ma ilip pa koroŋ boozomen ta tiwwa pa toono na. Tana kosasa irao ikami ma iko na som.

³¹Mi iwe ru pa na, man tatariigi ta iwwa. To iwe tel pa na, mekmek. Mi iwe paŋ pa na, king ta iwwa raama zin malmal kan kini.

³²Sombe nu kamam ŋgar be kam mbulu kankaanaŋana mi pakur itum, som lelem iurur pa mbulu sananŋana, na ambai be so sua sa pepe. Maane men, mi zem ŋgar pa mbulu tana.

³³Sombe totooro tui, nako iwe bata. Mi sombe tumbuulu tomtom sa kuzuunu, nako takam ma siŋ isu. Mi sombe tapamalmal tomtom keten, nako takam ma malmal ipet!