San Marcw 7:11-32

¹¹Per lëjt rëbidi guial zileꞌ guiëb bejn loj xDadaman o xniaaman: “Ad zajct günan lüj yudar, din gra ni raꞌpan na̱j Corbán” (Corbán rën guiëb gran na̱j par Dios).

¹²Rëbidi, bén guiëb zian, ad zileꞌtri güün xdad xniaaman yudar.

¹³Abiꞌ rbëëladxidi xtiidx Dios persi zinal xcostumbridi ni rulüü lasaꞌdi, në zien ree ni ren rüjndi lasaꞌ ree ni guin.

¹⁴Dxel gurejdx Jesús bén zien guin ree, rëbaman: ―Gol bacaagdiajg gradi gol bigniaꞌ tëë ni ganin:

¹⁵Ad ni rawt bejn rüjn persi rüjnman dol. Ni ririi roꞌman në ni rüjnman, laan rüjn persi rüjnman dol.

¹⁶¡Bén rën gucaagdiajg, gol bacaagdiajg!

¹⁷Chi baza Jesús lod zaꞌ ree bén guin bayuman lënü, dxel gunabdiidx ree xbejnman xhie rën guiëb ni rëbaman.

¹⁸Dxel rëbaman loj reeman: ―¿Në lëjt ad rigniaꞌt ni canin ya? ¿Nid ragbeedi ya guial ad ni rawt bejn rüjn persi rüjnman dol,

¹⁹din ni raw bejn ad rejtan luxdooman, rejn lënman, abiꞌ rariin? Zian basigniaꞌman guial ad rüjnt bejn dol por ni rawzaman.

²⁰Rëbaman: ―Ni ririi roꞌ bejn në ni rüjnman, laan rüjn persi rüjnman dol.

²¹Din guijc bejn zëëd graloj xgab mal, guial rüjn ni dxuudx, guialgubaan, guialrugüjt lasaꞌ,

²²guial rzunë béngunaa ren o xinguiaaw ren, guialrzëëbladx xieen ben ren, guial rüjn ni mal, guialrusquiee, guialrajp vijs, guialnadëdloj, guialrbëë xtiidx bejn, guialrüjn benroꞌ, në guial rüjn ni ad rayalt.

²³Graczi ree ni guin zëëd guijc bejn, abiꞌ laan rüjn persi rüjnman dol.

²⁴Chi baza Jesús niz yagaj, zëman niz Tiro në Sidón. Dxel guyuman tijb lënü guial ad guyëntaman niagbee ree bejn, per ad gojct nuquieꞌch lojman.

²⁵Din gogbee gajc xniaa tijb bindoo yuꞌ xindxab luxdoo. Abiꞌ wej xniaam lod zaꞌ Jesús zianz bazuxibaman lojman.

²⁶Ad najtaman bén Israel, najman bén Sirofenicia. Dxel guzajcaman liaadx loj Jesús din yabëëman xindxab guin luxdoo bindoo guin.

²⁷Per rëb Jesús lojman: ―Badëëdxgaj mod gaw yaloj ree xindoo, din ad rayalt chiquied bejn guiadxtil loj xiꞌnman din gudëëman laan gaw ree bëꞌcw.

²⁸Badxiꞌ bén guinan rëbaman: ―Waliquil, Dad, per në ree bëꞌcw raw xguiadxtil laay reem ni ryajb xan mex.

²⁹Dxel rëb Jesús: ―Laaqui guneel. Ma zajc yaguiajl, ma barii xindxab guin luxdoo xiꞌnl.

³⁰Chi badxin lidx bén guin, baguiaaman laa bindo guin nagaꞌ loj loon, ma barii xindxab guin luxdoom.

³¹Baza Jesús niz Tiro, gudëdaman niz Sidón, në loj ree guiedx rigaꞌ Decápolis abiꞌ bidxinman roꞌnijsdoo Galilea.

³²Ni bidxinnë reeman tijb xinguiaaw nacwaꞌtix ad rajc tëët rnieex zagdxe. Abiꞌ rëb reeman loj Jesús din gudxiib yaaman guijquix.