Mak 7:11-32

¹¹“Arile ado Parasi ma ado lau ta leheya kandriyen tiri Juwis tiye i buku doh, ‘I buku none ari ndramak luk tan ta aseben taman uru tinen, arile iy tiye turu i buku doh, “Luk jo anya kaseben ah na aliy badeh, Korban (moson ta aliy, ndraleheyani ta adeu i ta Kindrei).”’

¹²Ya, ta san doh ado baseken iy baseben taman uru tinen bwe.

¹³Ta kandriyen doh le ado atehei sahou ta Kindrei i andri mara-ei, ma hawe lahou ra-on ja badu hawen, ya ado bwese-ei iri kandriyen solo-an ado akohok ta tubu aha iri ja eme loken mara-ei.”

¹⁴Eme Jises aloh iri lau mwan ma badih a hawen ja, ya eme iy tiye tiri i buku doh, “Aha mari kanuhun jo, ma aha kabudon kamwenen.

¹⁵Saba lakou badu manan i bolo boho ari ndramak, badeh winiyan bamesekei iy bandra-i bwe. Arile lakou udu bolo bohon eme len idoh kameh, mesekei ndramak andra-i adeh.”

¹⁶“I buku none are ndramak ndranyen udu aliy, badeh iy kanuhun!”

¹⁷Ano iy ruwani iri lau ma iy ili bolo asiu, eme ma oro lau tan ndremenya iy ta sahou sokek nane.

¹⁸Eme ma Jises tiye i toro, “Buku sah? Ado ale budon tado baleu bwe le? Sebwe ado tana ado bwe, sasah udu manan i bolo ndramak, badeh winiyan bamesekei ndramak bandra-i bwe,

¹⁹tasah idoh winiyan bala budon bwe, arile ili ndrabai ano ndramak iu akeh ili sareu.” (Eme sehek ta aliy, Jises anya, nyamon mari mwasin ta aimon le ai.)

²⁰Eme Jises asehek ili le, “Saba lakou ala udu bolo boho ndramak eme len, lakou don adeh, mesekei ndramak andra-i.

²¹Lakou ala udu bolo budon ta ndramak eme len, ma lolowa ndramak amekes lomondra ndra-in. Lakou buku none, kandriyen mari ta karei, kandriyen ta bahana, kandriyen ta adai ndramak imek, ma kandriyen ta amekes tasou andra-i.

²²Ya i buku none kandriyen ta madalakis ta lakou ta ndramak, ya kandriyen ta ramwes, kandriyen ta wendreya l au, kandriyen ta aten lau, kandriyen ta atudun nyaram, ma hawe kandriyen ta nyaladan.

²³Iri kandriyen mari doh badu bolo ndramak eme len ma mesekei ndramak andra-i adeh.”

²⁴Ano Jises suri iy ma iy iu ili loboho kon tinan Tair ma Saidon. Eme ya iy i bolo asiu ra-em. Eme Jises anya, iri sala tanan iy udu doh, arile iy winiyan batone iy bwai.

²⁵Eme suwi labai badih ari anuhun nyalan, eme ya iy eme taku i andri kati Jises, tasah nadun badih badeh, malawin ndra-in udu la-un.

²⁶Badih dah kandriyen tan badu Grik, arile iy badu Siroponisiya, eme iy lelen Jises katikahei malawin ndra-in udu la-u nadun badih keme len.

²⁷Eme Jises tiye i tan i buku doh, “Kanyohan iri nah bwena op, tasah bamwenen ta ari lakou bwe, i buku none iri andrei nyamon tiri nah ma iri akahei i na nadu mwi.”

²⁸Arile, iy tiye i ta Jises i buku doh, “Laban, ou asehek sahou handru. Arile iri nadu mwi an bahandra sau badeh, aimon kahu nyamon tiri nah.”

²⁹Eme iy tiye i tan, “Ya ta sehek ta aliy, ou au ai. Malawin ndra-in nane udu la-u nadum badih badeh, ndra-au.”

³⁰Eme badih dah iu i kon, ma iy atou nadun ales in bada sau, ya malawin ndra-in badeh, ndra-au.

³¹Ano Jises udu loboho Tair edek iu ili Saidon, ma iy edek ja ili loboho gwa li Galili, ano ili loboho kon ma ronoh udu bolo Dekapolis.

³²Eme iri lau ra-on tiyani ndramak ari ndranyen siu ma iy bohon bwe, eme oro ndremenya Jises katehei minen ki bwele-en.