San Marcos 7:11-32

¹¹Pero nomejwah nonkijtoah kualiká tla aka kilia ita noso ina: “Ayakmó nimitspalewis, porke tlan nimitsmakaskia yonikxelo para niktemakas tiopa.”

¹²Iwa tla aka ijkó kijtoa, nomejwah nonkikawiliah ayakmó moneki makimpalewi itajwah.

¹³Ijkó kiné, nomejwah nonkixpanawiah itlanawatil Dios, iwa san nonkinchijtiwitseh tlan okichiwayah nomotatawah. Iwa oksiki kemi ni, nonkichiwah.

¹⁴Jesús oksepa okínnotski n tlakah mawikih inawak, iwa okinmili: —Techkakikah non nochteh iwa xikajsikamatikah:

¹⁵Tlan kikua se tlakatl, amo ye tlan kijtlakolia iyolo, yej tlan kisa de itech iyolo n tlakatl, ye noni tlan kijtlakolia iyolo.

¹⁶Tla nonkinekih nonkajsikamatiskeh, xikkasikamatikah.

¹⁷Satepa, ijkuak Jesús okinkajteh n tlakah iwa okalak itech kali, itlamachtijkawah okitlajtlanilijkeh makinmajsikamatilti tlan okijtojka.

¹⁸Ye okinmili: —¿Nomejwah noiwa amo nonkajsikamatih? ¿Amo nonkajsikamatih tlan kalaki ijtik se tlakatl amo ye tlan kijtlakolia iyolo?

¹⁹Porke mach kalaki itech iyolo, yej kalaki san kan itlalax, iwa satepa kisa kanik ikuitlaxkolwah. Ika noni okinek okijto nochi tlákuale chipawak.

²⁰Noiwa okijto: —Tlan kisa ijtik iyolo se tlakatl, noni kijtlakolia iyolo.

²¹Porke de ijtik iyolo n tlakatl, kisa tlan amo kuali, awilnemi, tlachteki, temiktia,

²²momekatijtinemi, tominápistli, kichiwa tlan amokuali, tlakajkayawa, kichiwa tlajtlákoli, xíkojtli, xolópijtli, moweyijkachiwa iwa mach kimati tlakaki.

²³Nochteh ninteh amo kualteh tlamachílisteh kisah inmijtik inyolo n tlakah iwa kinyolijtlakoa.

²⁴Jesús oyá kan tlalmeh de Tiro iwa Sidón. Okalak kan se kali, iwa amo okinekia aka makimati kan okatka, pero mach owéletki okinmotlatili.

²⁵Se siwatl non ichpoch okipiaya se espíritu amokuali, okima kan Jesús okatka iwa owala inawak iwa omotlankuáketski ikxitla.

²⁶Nin siwatl de Grecia iwa itajwah owalewatokah de sirofenicia. Okitlatlaujtiko n Jesús makikixtili n espíritu amokuali non ichpoch okipiaya.

²⁷Pero Jesús okili: —Xikinkawa achto maixwikah n tepilwah, porke amo kuali matikinkixtilikah intlakual iwa matikinmakakah n chichimeh.

²⁸N siwatl okinankili: —Milák, Noteko, pero noiwa n chichimeh non nemih itlampa mesa kikuah n kamapáyaxtli non kitepewah n tepilwah.

²⁹Ijkuakó Jesús okili: —Kuali tlan otikijto, ya weletis tias. N espíritu amokuali yokikakajte mochpoch.

³⁰Ijkuak n siwatl okalakito icha, okajsito ichpoch wetok itech ipetl, iwa n espíritu amokuali yokikakajte.

³¹Jesús, oksepa okiski de kan tlali de Tíro, iwa opanok kan tlali de Sidón iwa ijkó okalakito kan weyi atl de Galilea, iwa omoka itech tlalmeh de Decápolis.

³²Ompa okiwikilijkeh se tlakatl kamapojpólochtli iwa amo otlakakia, iwa okitlatlautijkeh n Jesús makitlalili ima itech non kókoxki.