11गेपुकीमी चहिं सुमी आम आफ आस कली ‘इन कली गेचा माल्शो थोव़क लाइश्शा, कुरबन कली गेता’ दे माइक्बा, मेकोमी आम आफ आस कली मारेइ गेचा ममाल्ब दे शेंनीनी। ‘कुरबन गेता’ देंशो चहिं ‘परमप्रभु कली गेता’ देंशो रुम्सीब।
12मोपा इन शेंतीक लोव़मी आम आफ आस कली वारच पचा तेक्नीनी।
13इन वोइश्शो रिती थितीमी परमप्रभु यावे आ देंशो टिचा प्रोंइपाइक्नीनी। मिनु मोदेंशो कपटी गेय शुश पाइनीनी” दे हुइक्तीमी बाक्त।
14मिनु येसुमी मुर आन कली लेंशा ब्रेश्शा “गे नेल्लेमी नोफा दाइश्शा नेंशा रुपीने।
15लाङगा रे ओव़शो थोव़कीमी मुर कली ग्रांग्रा दिशो सेल्ने मचाप्ब। मुर रे ग्रूशो थोव़कीमी चहिं मुर कली ग्रांग्रा दिशो सेल्ब। प्रेरित १०:१४-१५
16सु के नेंब नोफा बाक्मे, मेकोमी नेंनल” दे शेंदीमी बाक्त। मर्कूस ४:२३
17मिनु मुर आन कली प्रोंइशा, खिं ओव़मेनु, आ शेंसीबपुकीमी “इन शेंशो लोव़ थमा पा मार रुम्सीबा?” दे हिल्लो पामे बाक्त।
18मिनु येसुमी “मार, गे यो एको लोव़ मरुप्नी? लाङगा रे ओव़शो थोव़कीमी मुर कली ग्रांग्रा दिशो सेल्ने मचाप्ब,
19मारदे हना मुर आ थुंमी मओव़ब। आ कोव़जीम ओव़शा ग्रिम्शा, क्यी लां पा ग्रूब, दे मतुइक्नीनी?” दे शेंदीमी बाक्त। मो देंशोमी जचा थोव़क नेल्ल ग्रांग्रा मबाक्नीम, दे शेंदा बाक्त।
20मिनु मेकोमी “मुर रे मार ग्रूबा, मेकोमी मुर कली ग्रांग्रा दिशो सेल्ब।
21मुर आ थुं रे दोदेंशो ग्रांग्रा दितीके ग्रूब देंशा हना, तेल्लेम पचा, खुइ पचा, साइक्चा,
22ग्युंबे पशो मुर अर्को नु इप्चा, शिंम पचा, जोल पचा, गेहे पचा, नें तोक्चा, ठेयब लेत्चा, ममिम्थु गेय पचा।
23मोदेंशो पतीके मुर आ थुंम बाक्ब। मेको ग्रूशा, मुर कली ग्रांग्रा दिशो सेल्ब” दे शेंदीमी बाक्त।
24मिनु बोक्शा, मेकेर रे टायर नु सीदोन गे लशा, खिं का ओव़माक्त। सुइमी मतुइक्तमेक्ल देंत हना यो, ख्रुइश्शा बाक्ने मचबा बाक्त।
25मिनु ग्रांग्रा दिचा ङा वोलम सुम्शो आइक्च आल आ ममामी “येसु जाक्माक्त” देंशो नेंशा, येसु आ बाक्तीके जाक्दीम्माक्त।
26मेको मीश मुर अर्को रागी ङा, सुरोफोनीसीयामी जरमेशो ङा बाक्माक्त। मिनु मेको जाक्शा, येसु आ ङोंइती खुम्की पा बाप्शा “आं तमी रे वोल ग्रुंइदीने” दे पुना बाक्त।
27मिनु येसुमी “ङोंइती आल आन कली थुल्चा माल्ब। आल आन कली गेचा माल्शो शोब्ले कुचुम आन कली गेचा मदुम्ब” दे मदा बाक्त।
28मिनु मेको मीश मुरुमी “मदुम्ब, प्रभु, तन्न कुचुमपुकीमी यो आलपुकीमी तोक्शो शोब्ले जचा ताइनीम” देंमाक्त।
29मिनु येसुमी “इ मो देंतीके इ पुंइशो गेतन। वोल इ तमी रे ग्रूत” दे मदा बाक्त।
30मिनु आ खिं लेश्शा जाक्मेनु, वोल ग्रूशा, आल सेस दुम्शा इप्शो बाक्माक्त।
31मिनु टायर रे लेश्शा, सीदोन नु डेकापोलीस सहर दाते लां पा लशा, गालील ङा समुन्द्र जाक्दीम्माक्त। मत्ती १५:२९-३१; मर्कूस ५:२०
32मिनु नोफा मनेंब मुर का चाक्शा “एको तार इन गुइ वोतीने” दे पुन्मे बाक्त।