SAN LUCAS 24:9-42

⁹Nda̱ca ye na̱n ya̱yan me, cona̱hn ye, ne neca̱h cuande ye ihyan apóstol che ndichia̱ma chahn ma̱n, ihyan chena̱hn che nduco ye ma̱n.

¹⁰María yahn ya̱n Magdala ma̱n, Jua̱na ma̱n, María che chaco Jacobo ma̱n, nduco ihyan nda̱hta chena̱hn chahn ne, a ihyan chahn che neca̱h cuande ye ihyan apóstol che tihca̱ chi.

¹¹Ate ihyan apóstol chahn ne, hua chitahno ye, ne ra̱hco ye te co hua va cua̱co dave yahn ihyan nda̱hta chahn che tihca̱ ra̱hn ye.

¹²Tuhme necuan Pedro, cuahn ye rano ye na̱n ya̱yan me. Nda̱ ye min ne, ndihchero ye che a dema̱n tino che chacotuma Dihvo vo quendite min. A̱ma cuahn ino ye che tihca̱, ne cona̱hn ye.

¹³A ro min no ne, cuahn o ihyan chahn a̱ma ya̱n lihn che duche Emaús, ri tenduh ndichio da̱hno che renda̱ ya̱n Jerusalén.

¹⁴Numanahn che chenun yune ihyan chahn ne, rente ye nduco vih yahn nducuahn che chi.

¹⁵Ura min nda̱ ma̱n Dihvo vo na̱n ihyan chahn, ne cuahn ye da̱ma nduco vih.

¹⁶Ate hua nchana̱n ihyan chahn ihyan, te a tihca̱ va ca̱de che hua nchana̱n ye ihyan.

¹⁷Tumerune Dihvo vo ihyan chahn: ―¿Deh che rente nchuhn va̱n ma̱n ne nduco vih che a̱ma ra̱n ne ne?

¹⁸A̱ma cha ihyan chahn che duche ye Cleofas ne, ndahconan ye: ―¿A dema̱n ndih che ta̱ma ya̱n cochi ne, che hua devano ne dehtenduh che chi ya̱n Jerusalén ro cuh?

¹⁹Tumerune Dihvo vo: ―¿Deh chi min ne? Tuhme ndahconan ihyan chahn yahn ye: ―A̱ma ndeh na̱n dehtenduh chahno chi Jesús yahn ya̱n Nazaret. Ihyan min ne, a̱ma ihyan profeta che quenan cuma ye vederihquentiyon chahte na̱n Dendiohs ma̱n, na̱n ihyan ma̱n, che din ye vederihno ma̱n, chicuahn ye ma̱n.

²⁰Chidocuya̱n ndina̱n ma̱n, sa̱hn intiyahn ma̱n ne, chih nunde se yahn ye, ne neca̱h se ihyan ta̱h sa̱hn che nahn ya̱h se ihyan.

²¹Nuhn ne, chenan ino nuhn che a ihyan min che ndedevahn ye ihyan nación yuhn vo, Israel. Ma̱n ne, a chi ino ro che chihno se ihyan.

²²Ava̱ne ne, a̱ma rendedecadino nuhn, te a̱ma o ihyan nda̱hta che chinduco ye nuhn ne, chahn ye na̱n ya̱yan ura che chi dave,

²³ate hua nta̱ca ye ihyan min chete ya̱yan me. Cuahn che ndaconan ye ne, ra̱hn ye te ndihchero ye ángel. Angel chahn ne, ra̱hn ye te a ntuche ihyan min.

²⁴Tuhme chahn a̱ma o combiero yahn nuhn na̱n ya̱yan me, ne nta̱ca ye nduhca̱ che ra̱hn ihyan nda̱hta chahn, ate hua ndihchero ye ihyan min.

²⁵Tuhme ra̱hn Dihvo vo ri ye ihyan chahn: ―¡A̱ma tuntu nchuhn! ¡Ta̱ca che hua renahn ne nduhca̱ che dirun ihyan profeta!

²⁶¿A ndiyu a nihnde ca̱de che ihyan che a va ca̱de che chi ye, ndedevahn ye ihyan iyehnse ne, chuhrihn ye dehtenduh che tuhchan ma̱n, nda̱ ye vahchetero ma̱n?

²⁷Tuhme ca̱h cuande ye ihyan chahn Ndudo yahn Dendiohs, cana̱n ye nde che dirun Moisés ma̱n, che dirun nducoya̱ca ihyan profeta ma̱n, yahn nduhca̱ che cuahno ye co.

²⁸Nda̱ ihyan chahn ya̱n lihn me, ne din ca̱ Dihvo vo che nahn chuh da̱ma ye, ca̱hn ye tahque yahn ca.

²⁹Ate din ihyan chahn fuerza ihyan che conan ye min, te a chi chino. Tuhme chenda̱ ye chete vah, chinduco ye ihyan chahn.

³⁰Ura che chahte ye, cheh vino ye ne, cheta̱h Dihvo vo pa̱n, neca̱h ye nundihve cuahn Dendiohs, ne ndeh ye, ca̱h ye ihyan chahn.

³¹Ura min nchana̱n ihyan chahn te a ihyan min che Dihvo vo, ne adena̱n no chehna̱n ihyan chahn ihyan.

³²Tuhme ra̱hn ye nduco vih: ―¿A ndiyu yeno chedave yuhn vo numanahn che rente ye nduco vo ma̱n, ricuahn ye uvo Ndudo yahn Dendiohs ma̱n, cua̱hn yune?

³³Ndeta̱hno ndaconan ihyan chahn ya̱n Jerusalén, ne nta̱ca ye ihyan apóstol che ndichia̱ma chahn che ndi da̱ma ye nduco ihyan chena̱hn chahn.

³⁴Ihyan che ndi da̱ma ye min ne, rente ye va̱n ma̱n ye nduco vih: ―Cua̱co che ntuche Dihvo vo, te chihnde ro ye na̱n Simón.

³⁵Tuhme neca̱h cuande ihyan che o chahn nduhca̱ che chahno ye chi cua̱hn yune ma̱n, nduhca̱ che nchana̱n ye Dihvo vo ura che ndeh ye pa̱n ma̱n.

³⁶Numanahn che rente ihyan chahn yahn dehtenduh che tihchan ne, adena̱n china̱n ye Dihvo vo che nti ye menda̱hn. Ra̱hn ye ri ye ihyan chahn: ―Dehve ra̱hco nchuhn.

³⁷Dihya ihyan chahn chi, ra̱hco ye te co a̱ma vaco ndihchero ye.

³⁸Ate ra̱hn Dihvo vo ri ye ihyan: ―¿Dehco che a̱ma va̱h nchuhn ma̱n, ndeh rendedecadino ne ma̱n?

³⁹Condihche ne ya̱hvetá̱h ma̱n, cá̱h ma̱n, te a u che ntí na̱n ne. Conahn ta̱h ne u, ne condihche ne te va yute yáhn ma̱n, va ine yáhn ma̱n, ndiyu a̱ma vaco nduhca̱ che rendedecadino ne.

⁴⁰Chihno ra̱hn ye chemin ne, na̱hma ye ya̱hveta̱h ye ma̱n, ca̱h ye ma̱n, ihyan chahn.

⁴¹Ate nducote a̱ma cuahn ino ihyan chahn ma̱n, a̱ma yeno ye ma̱n ne, nde ametah cotahno ye. Chemin che tumerune Dihvo vo ihyan chahn: ―¿A va deh che chuh vo muhn ne?

⁴²Tuhme ca̱h ihyan chahn a̱ma ndi ya̱hca ndiyuche nduco a̱ma ndi va̱conedih yahn.