Lukas 24:9-42

⁹Iwe, ra liwinsefäl seni ewe peias o apworausa ngeni ekewe engol me eman chon kaiö, pwal ngeni ekewe ekoch aramas ekewe mettoch meinisin ra rong o küna.

¹⁰Ikei iten ekewe fefin: Maria Maktalene, Joanna me Maria inen James. Ir me pwal ekoch fefin mi etiir ra apworausa ekei mettoch ngeni ekewe soukünö.

¹¹Nge ekewe soukünö ra ekieki, pwe met ekewe fefin ra apworausa ngeniir esap wor allükülükün, iei mine resap lüküür.

¹²Nge Petrus a ütä o sä ngeni ewe peias. A pworotiu o nenelong lon ewe peias, nge a chök küna finifinin somän Jesus kewe. Mürin a weitifengen ren mine a fis o a liwinsefäliti imwan.

¹³Iwe, pwal lon ewe chök ränin ruoman me lein ekewe chon tapwela mürin Jesus ra feila ngeni eu sopw itan Emaus, ina epwe ükükün fisu mail toauan seni Jerusalem.

¹⁴Ra kakapasfengen lefiler usun ekewe mettoch meinisin ra fisitä.

¹⁵Lupwen ra kakapas o ekiekifengeni usun ekei mettoch, Jesus a kaneto rer o etiir le fetal.

¹⁶Iwe, ra küna i, nge resap esilla.

¹⁷Jesus a aisiniir, “Met ei oua pwopworausfengen usun, lupwen oua fefetal?” Iwe, ra üla o wololilen.

¹⁸Mürin eman me leir itan Kleopas a pölüeni, “Ifa usun, en chök eman me lein ekewe wasöla lon Jerusalem kosap silei ekewe mettoch a fen fis lon ekewe rän?”

¹⁹Jesus a aisiniir, “Ikafan ekewe mettoch?” Iwe, ra pölüeni, “Ekewe mettoch mi fis ngeni Jesus, ewe re Nasaret. Ei mwän eman soufos a wor manamanen an kapas me an föför mwen mesen Kot me aramas meinisin.

²⁰Nöüm kewe souasor mi lap me sounemenem ra atoow ngeni Pilatus an epwe apwüng ngeni mäla, nge mürin ra iräpengesi.

²¹Nge äm aia apilükülükü, pwe i ewe eman Kot a tinato pwe epwe angasa Israel. Nge lükün ekei, iei ewe aülüngatin rän mürin a fis ekei mettoch.

²²Nge pwal ekoch fefin seni äm mwich ra amairükem. Ra feila ren ewe peias lesosorusich,

²³nge resap küna somän Jesus we. Nge lupwen ra liwinto rem, ra apworausa pwe a wor künaer chon läng mi üreniir pwe a manau.

²⁴Mürin ekoch me lon äm we mwich ra feila ren ewe peias o alletä pwe ekewe mettoch ekewe fefin ra kapas usun, ra pwüng. Nge resap küna Jesus.”

²⁵Iwe, Jesus a üreniir, “Pwota iei me miritimangemi me mangen letipemi! Inet ämi oupwe lükü meinisin mine ekewe soufos ra apasa?

²⁶Ifa usun, esap wisen Kraist pwe epwe küna ekei riaföü meinisin me mwen an epwe tolong lon an ling?”

²⁷Mürin Jesus a awewe ngeniir met a mak lon ekewe Puk mi Pin usun püsin i. A popuetä seni ekewe puken Moses tori ekewe puken soufos meinisin.

²⁸Nge lupwen ra arap ngeni ewe sopw ra mochen feila lon, Jesus a tipin föri usun itä nge epwe sopwela an sai.

²⁹Nge ir ra fokun pesei o tüngor ngeni, “Kose mochen kopwe nonom rem, pun a lekuniolula, nge epwe le pwinituk.” Iei mine a tolong lon imwer pwe epwe nonom rer.

³⁰Lupwen an mottiu ngeni chepel pwe epwe mongö rer, a angei ewe pilawa o iotekin afeiöchü. Mürin a kini o ineti ngeniir.

³¹Mürin meser ra usun itä ra kärän nennela pwe ra esilla Jesus, nge i a mörukela seniir.

³²Iwe, ra kapasfengen lefiler, “Ifa usun, esap usun eu ekkei mi ngetenget lon lelukach, lupwen a kapas ngenikich won al o afata ngenikich wewen ekewe Toropwe mi Pin?”

³³Mürin ra müttir ütä o liwinsefäliti Jerusalem o ra churi ekewe engol me eman chon kaiö, pwal ekewe ekoch ra mwichfengen.

³⁴Iwe, ekewe chon kaiö ra üreni ekewe ruoman, “Enlet, ewe Samol a manausefäl pwe a pwä ngeni Simon!”

³⁵Mürin ekewe ruoman ra apworausa ngeniir met a fis lupwen ar fetal won ewe al, pwal usun ar esilla ewe Samol lupwen a kinifeseni ewe pilawa.

³⁶Iwe, lupwen än ekewe ruoman ra apworausa ngeniir ei pworaus, Jesus a püsin ütä lefiler o üreniir, “Kinamwe epwe torikemi.”

³⁷Nge ir ra fokun rükö o niuokus, pun ra ekieki pwe ra küna eman anü.

³⁸Jesus a üreniir, “Pwota oua niuokus? Pwota oua tipemwaramwar lon letipemi?

³⁹Oupwe nengeni pei me pechei, pwe oupwe silei pwe ngang ei. Oupwe atapaei o mefi, pun eman anü esap wor ren fituk me chü usun oua küna pwe a wor rei.”

⁴⁰Iwe, a apasa ekei kapas, lupwen a pwäri ngeniir pöün me pechen.

⁴¹Pokiten ra fokun pwapwa o weitifengeniir, resap fen mwo lükü. Iei mine a aisiniir, “Ifa usun, esap wor och mongö ikei pwe üpwe mongö?”

⁴²Iwe, ra ngeni ekis fituken ik mi kapwich.